උසාවියේ විභාග වෙමින් පවතින නඩුවකට අදාලව පාර්ලිමේන්තුවේ අදහස් පලකිරීම නිසා දෙමළ ජනතා නියෝජිතයකුගේ දෝශ දර්ශනයට ලක්ව සිටින අධිකරණ අමාත්‍යවරයා, මැතිසබයේ සිදු කරන ප්‍රකාශවල විශ්වසනීයභාවය සම්බන්ධයෙන්ද ප්‍රශ්නකාරී තත්වයක් මතු වී තිබේ.
අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය විජේදාස රාජපක්ෂ දෙසැම්බර් 04 වැනි සදුදා පාර්ලිමේන්තුවේ සිදු කළ ප්‍රකාශයකට පිළිතුරු ලබා දෙමින් ජනාධිපති නීතිඥ පාර්ලිමේන්තු මන්ත්‍රී එම්. ඒ සුමන්තිරන් සදහන් කළේ අමාත්‍යවරයාගේ ප්‍රකාශය සම්බන්ධයෙන් තමන් කනගාටු වන බවයි.
“නඩු කටයුත්තක් සම්බන්ධයෙන් කතාබහ කිරීම සුදුසු නැහැ. අධිකරණ ඇමැති ඒක දැනගෙන ඉන්න ඕනේ. වැරදි ප්‍රකාශයක් ඉතාම පහත් ආකාරයෙන් එතුමා පාර්ලිමේන්තුවේ ඉදිරිපත් කිරීම ගැන මම ඉතාමත් කනගාටු වෙනවා.“
පාර්ලිමේන්තු මන්ත්‍රී එම්. ඒ සුමන්තිරන් ඝාතන තැතක් සම්බන්ධයෙන් පාර්ලිමේන්තුවේදී විස්තර කරමින්
අධිකරණ අමාත්‍ය විජේදාස රාජපක්ෂ චෝදනා කළේ ඝාතනය කිරීමේ උත්සාහය ගැන සැක කෙරෙන පිරිසකට එරෙහිව ත්‍රස්තවාදය වැලැක්වීමේ පනත යටතේ ක්‍රියාමාර්ග ගැනීමට එකඟ සුමන්තිරන් මන්ත්‍රීවරයා අනිකුත් අපරාධකරුවන්ට එම නීතිය ක්‍රියාත්මක කරන විට එයට විරුද්ධ වන බවයි.
“ සුමන්තිරන් මන්ත්‍රීවරයා මරන්න කියලා කොන්ත්‍රාත්තුවක් දුන්නා දෙමළ ඩයස්පෝරාව. ලක්ෂ 20 යි කොන්ත්‍රාත්තුව. එතකොට මටත් පුදුම හිතුනා සුමන්තරන් මන්ත්‍රීතුමාගේ වටිනාකම ලක්ෂ 20 ද කියලා. එතකොට ඒ උතුරේ ද්‍රවිඩ තරුණයෝ 5 දෙනෙක් යොදාගෙන එතුමා මරන්න ගියාට පස්සේ අපේ හමුදාවයි, බුද්ධි අංශයයි බුද්ධිමත්ව කටයුතු කරපු නිසා ඒ සිද්ධිය ඒ ඝාතනය වලක්වලා එතුමා බේර ගත්තා. එතකොට එතුමා බේරාගෙන ඒ චුදිතයෝ 5 දෙනාට විරුද්ධව නඩු පවරලා තියෙන්නේ ත්‍රස්තවාදය වැලැක්විමේ පනත යටතේ. එතකොට එතුමා මරන්න එන මිනිස්සුන්ට විතරක් ත්‍රස්තවාදය වැලැක්වීමේ පනත යටතේ නඩු පවරලා එල්ලන්න ඕන. හැබැයි අනික් මිනිස්සු මරපු අපරාධකාරයන්ට ත්‍රස්තවාදය පනත යටතේ නඩු පවරලා දඩුවම් දෙන්න එපා කියලා කියන්නේ.”
අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය විජේදාස රාජපක්ෂ එහිදි සුමන්තිරන් මන්ත්‍රීවරයාට අභියෝග කර තිබුනේ ඝාතන තැත සම්බන්ධයෙන් අත්අඩංගුවට ගත් පිරිස නිදහස් කරන ලෙස පවසන ලෙසයි.
“ඉතින් විශේෂයෙන් මම කියනවා සුමන්තිරන් මහත්තයෝ ඔබ ත්‍රස්තවාදය වැලැක්වීමේ පනතට විරුද්ධයිනේ. ඒක නිසා ඉස්සරලා කියන්න ඔබව ඝාතනය කරන්න ආපු පස් දෙනාව නිදහස් කරන්න කියලා. ඒ ගොල්ලන්ට නීතිය ක්‍රියාත්මක කරන්න එපැයි කියලා කියන්න. තමන්ව මරන්න එනකොට පී.ටී.ඒ එක හරි හොදයි. අත්‍යවශ්‍යයි. මේ රටේ සුවහසක් අහින්සක ජනතාව මරපු ඒ අපරාධකාරයෝ මිනි මරුවෝ වෙනුවෙන් පී.ටී.ඒ එක හොද නෑ.”
අධිකරණ අමාත්‍යවරයාට පිළිතුරු ලබා දෙමින් එම්. ඒ සුමන්තිරන් මන්ත්‍රීවරයා අවධාරණය කළේ අත්අඩංගුවට ගත් සැකකරුවන් පස් දෙනා ත්‍රස්තවාදය වැලැක්විමේ පනත යටතේ අත්අඩංගුවට ගැනීමක් සිදු නොවු අතර ඔවුන්ට එරෙහිව ත්‍රස්තවාදය වැළක්වීමේ පනත භාවිත නොකරන ලෙස තමන් ඉල්ලා සිටි බවයි.
“ එහෙම කට්ටිය අත්අඩංගුවට ගැනීම සම්බන්ධයෙන් මම කිසිම පැමිණිල්ලක් කරලා නැහැ. මම ඒ කාරණේ සම්බන්ධ පැමිණිලි කරුවෙක් නෙවෙයි. ඒගොල්ලෝ අත් අඩංගුවට ගත්තු ගමන්ම මම අවධාරනයෙන් කියා සිටියා ත්‍රස්තවාදය වැළක්වීමේ පනත පාවිච්චි කරන්න එපා කියලා. ඒගොල්ලෝ අත් අඩංගුවට ගත්තේ ත්‍රස්තවාදය වැළක්වීමේ පනත යටතේ නෙවෙයි, ත්‍රස්තවාදය වැළක්වීමේ පනත යොදාගෙන නඩු ඇහුවෙත් නැහැ.”
තමන් ඝාතනය කිරීමේ සැලසුමක් සම්බන්ධයෙන් අත්අඩංගුවට ගත් සැකකරුවන් ත්‍රස්තවාදය වැළක්වීමේ පනත යටතේ රඳවා තබා ගැනීමක් සිදු නොවු බවත් එම්. ඒ සුමන්තිරන් මන්ත්‍රීවරයා එහිදී තව දුරටත් පවසා තිබුනි.
“ ඒගොල්ලෝ අත් අඩංගුවට ගත්තට පස්සේ ඒගොල්ලන්ව ඇප දීලා නිදහස් කළා. ඒගොල්ලන්ට ඇප දීලා නිදහස් කිරීම සම්බන්ධයෙන් මම කිසිම විරෝධයක් දැක්වුවේ නැහැ. ඊට පස්සේ, නීතිපතිතුමා නඩු කටයුතු පවත්වාගෙන යාමේදී වුනත්, ඒ ගොල්ලන්ට ඇප දීම සම්බන්ධයෙන් මගේ නීතිඥවරුන්ගේ මාර්ගයෙන් ඇප දීමට මගේ කිසිම විරෝධයක් නැහැයි කිව්වා. ඒ ගොල්ලෝ ඇප පිටමයි ඉන්නේ. ඒ නිසා ඒගොල්ලන් ත්‍රස්තවාදය වැළක්වීමේ පනත යටතේ රඳවා තබා ගත්තේ නැහැ. ත්‍රස්තවාදය වැළක්වීමේ පනත යොදාගන්න එපා කියලා මම දැඩි කොට කියා තිබෙනවා.”
Facebook Comments
