පොලිස් අත්අඩංගුවේදී පහර දී දෙමළ තරුණයකු ඝාතනය කිරීම සම්බන්ධයෙන් චෝදනා ලැබ සිටින පොලිස් නිලධාරීන් සිව් දෙනාගේ අනන්‍යතාව හඳුනාගැනීමේ පෙරට්ටුවකදී තහවුරු වී තිබේ.
යාපනය මහේස්ත්‍රාත් ඒ.ඒ.ආනන්දරාජා ඉදිරියේ දෙසැම්බර් 08 වැනි දා සිදු කළ හදුනා ගැනිමේ පෙරට්ටුවේදී වඩුක්කෝට්ටේ පොලිස් ස්ථානයේ අපරාධ අංශයේ හිටපු උප පොලිස් පරීක්ෂකවරයා ඇතුළු පොලිස් නිලධාරීන් සිව් දෙනා පළමු සාක්ෂිකරු විසින් හඳුනා ගන්නා ලද බවයි පළාත් බද අධිකරණ වාර්තාකරුවන් පවසන්නේ.
චෝදනා එල්ල වී තිබෙන පොලිස් නිලධාරීන් සිව් දෙනාගේ ඡායාරූප සමාජ මාධ්‍ය තුළ සංසරණය වී ඇති බැවින් ඔවුන් හදුනාගැනීමේ පෙරට්ටුවට ඉදිරිපත් නොකරන ලෙස චුදිත පොලිස් නිලධාරීන් වෙනුවෙන් පෙනී සිටි නීතිඥයන් අධිකරණයෙන් සිදු කළ ඉල්ලිම ප්‍රතික්ෂේප කරමින් යාපනය මහේස්ත්‍රාත් ඒ.ඒ.ආනන්දරාජා පෙරට්ටුව නියම කළ බව ඔවුහු වැඩි දුරටත් පවසති.
අත්අඩංගුවට ගෙන අධිකරණ නියෝග මත බන්ධනාගාරගත කර සිටියදී මරුමුවට පත් යාපනය දිස්ත්‍රික්කයේ සිත්තන්කේනියේ පදිචිව සිටි නාගරාසා ඇලෙක්ස් ගේ ඝාතනය සම්බන්ධයෙන් චෝදනා එල්ල වී සිටින පොලිස් නිලධාරීන් සිව් දෙනා දෙසැම්බර් 19 වැනිදා තෙක් තවදුරටත් බන්ධනාගාර ගත කිරීමට මහේස්ත්‍රාත්වරයා එහිදී නියෝග කර තිබේ.
නාගරාසා ඇලෙක්ස් සහ විසි හැවිරිදි සුදාකරන් තුවාකරන් යන තරුණයන් දෙදෙනා සොරකම් කිරීමේ චෝදනා මත වඩුක්කෝට්ටේ පොලිසිය විසින් නොවැම්බර් 8 වැනිදා අත්අඩංගුවට ගෙන ඇති අතර, තුවාකරන් දැනට ඇප මත නිදහස්ව සිටි. ශ්‍රී ලංකා පොලිසිය විසින් වඩුක්කෝඩෙයි ප්‍රදේශයේදී අත්අඩංගුවට ගත් නාගරාසා ඇලෙක්ස් මල්ලාවි මහේස්ත්‍රාත් අධිකරණය හමුවට පමුණුවා ඇත්තේ දින හතරකට පසුය. එහිදී අධිකරණය විසින් තරුණයා රිමාන්ඩ් භාරයට පත් කරන ලදී. අධිකරණ නියමයක් නැතිවම ඇලෙක්ස් කැඩුම් බිඳුම් ප්‍රතිකාර සඳහා ආයුර්වේද වෛද්‍ය වරයකු හමුවට පමුණුවා ඇති බවද අධිකරණයේදී හෙළිවිය.
මහේස්ත්‍රාත් ඒ.ඒ ආනන්දරාජා යටතේ අධිකරණ වෛද්‍ය නිලධාරි විසින් පවත්වන ලද මරණ පරීක්ෂණ වාර්තාවේ දැක්වෙන්නේ අත් අඩංගුවේ සිටි නාගරාසා ඇලෙක්ස් නැමැති විසි හය හැවිරිදි තරුණයා නොවැම්බර් 19 වැනි ඉරිදා යාපනය ශික්ෂණ රෝහලට ගෙන එන විටත් මරණයට පත්ව සිටි බවයි.
වඩුක්කොඩෙයි, සිත්තංකේනි ලිපිනයේ පදිංචිකරුවකු වු විසි හය හැවිරිදි නාගරාසා ඇලෙක්ස් තරුණයා අත්අඩංගුවේ සිටියදී මරණයට ලක්වී තිබීම “ස්වාභාවික මරණයක් නොව මිනීමැරුමක්” බවට යාපනය මහේස්ත්‍රාත් ඒ.ඒ.ආනන්දරාජා නොවැම්බර් 24 වැනි සිකුරාදා අධිකරණයේදී කියා තිබුනි.
Facebook Comments
