උතුරු නැගෙනහිර ඒකාබද්ධ කළ පෙඩරල් ව්‍යවස්ථාවක් තුල ස්වපාලනයක් ලබාගැනීම වෙනුවෙන් දෙමළ ජනතාව හා එක්වන ලෙස උතුරේ මහ ඇමැතිවරයා නැගෙනහිරදී මුස්ලිම් ජනතාවට ආරාධනයක් කළේය.
දහස් සංඛ්‍යාත ජනකායක සහභාගිත්වයෙන් මඩකලපුවේ පැවැත්වුනු ‘එලුග තමිල්’ දෙමළ පිබිදීම රැළිය අමතමින් මහ ඇමැති සීවී විග්නේස්වරන් කියා සිටියේ මුස්ලිම් ජනතාවගේ අයිතිය සහතික කිරීම දෙමළ ජාතිය සතු අත් හළ නොහැකි වගකීමක් බවයි.
නැගෙනහිර පළාතේ මුස්ලිම්-දෙමළ සබඳතා වඩා ඉහළට නංවමින් උතුරේ මහ ඇමැතිවරයා රැළිය සංවිධානය කළ දෙමළ ජනතා සභාවේ ටී වසන්තරාජා සමගින් කාත්තන්කුඩි මුස්ලිම් දේවස්ථාන සම්මේලනයේ නියෝජිත පිරිසක් සමග සාකච්ඡාවකටද සහභාගි විය.
සිංහලයන්ගේ අයිතිය
“දෙමළ ජාතිය සතු භූමිය තුළ සංඛ්‍යාත්මක සුළුතරයක් වන සිංහලයන්ගේද අයිතිවාසිකම් සහ නිදහස කිසිවිටකත් අහිමි කළ නොහැකිය,” යනුවෙන් දෙමළ ජනතා සභාව විසින් සංවිධානය කරන ලද රැළියේ ප්‍රසිද්ධ ප්‍රකාශනයෙහි දැක්වෙයි.
“අපේ අරමුණ ව්‍යවස්ථා සම්පාදන ක්‍රියාදාමය අවුල් කිරීම නොවේ. දෙමළ ජනතාවගේ හඬද ඒ ක්‍රියාවලියට එක් කිරීමයි,” යනුවෙන් එහි වැඩිදුරටත් සඳහන් වෙයි.
රටේ දිගටම පැවති ආණ්ඩු විසින් දෙමළ ජනතාවගේ අයිතිවාසිකම් ලබා නොදී සිටීම නිසා තරුණයන්ට ආයුධ අතට ගන්නට සිදුවූ බව කී උතුරේ මහ ඇමැතිවරයා තවමත් සහතික වී නැති උරුමය දිනා ගැනීම පිණිස ‘එලුග තමිල්’බහුජන ව්‍යාපාරය ලෙසින් සංවිධානය වන්නට සිදුවී තිබෙන බව කියා සිටියේය.
“නිදා සිටින මිනිහෙක් නැගිට්ටවන්න පුළුවන්. ඒත් හොරට නිදා ඉන්නා කෙනෙක් ඇහැරවන්න බෑ,” යි මහ ඇමැති විග්නේස්වරන් දෙමළ අයිතිවාසිකම් ලබා දීම සම්බන්ධයෙන් ආණ්ඩුව පවත්වාගෙන යන ක්‍රියාකලාපය දෝෂ දර්ශනයට ලක් කළේය.
විවේකානන්ද පාසල් භූමියේ රැළියට සහභාගි වීම පිණිස කල්ලඩි පාලම අසල සිට ගමන් කළ පෙළපාලියට දෙමළ ජාතික සන්ධානයට අයත් වූවන් මෙන්ම ඉන් පරිබාහිර වුද දේශපාලන පක්ෂ නායකයන් සමග අතුරුදහන් වුවන්ගේ ඥාතීන් සිය සමීපතමයන්ගේ ඡායාරූපද රැගෙන එක්ව සිටියහ.
ජාත්‍යන්තර විමර්ශනයකින් යුද අපරාධ සම්බන්ධයෙන් යුක්තිය ඉටු කරන ලෙසත්, හමුදාව තම භූමියෙන් ඉවත් කරන ලෙසත්, දේශපාලන සිරකරුවන් නිදහස් කර අතුරුදහන් වුවන් සොයා දෙන ලෙසත් ඉල්ලා හඬ නැඟුනු පෙළපාලියේ යුක්තිය ඉටු කිරීම වෙනුවෙන් රජයට බල කිරීමට ඉදිරිපත් නොවීම ගැන එක්සත් ජාතීන් ඇතුළු ජාත්‍යන්තර බලවතුන්ද දෝෂ දර්ශනයට ලක් වුනි.
(Radiogagana)
Facebook Comments
