පුරා විද්‍යා දෙපාර්තමේන්තුවේ පාලනය යටතේ පවතින භූමියක සියවස් දෙකකට අධික කාලයක සිට වන්නි වාසී හින්දු බැතිමතුන් පිරිසකගේ වන්දනාවට පාත්‍ර වු පර්වතයක් මත පිහිටි ශිව දේවාලයක කිසියම් පිරිසක් විසින් හානි පමුණුවා තිබේ.
කෝවිලට සිදු කර තිබෙන හානිය පිළිබදව වව්නියාවේ පිහිටි මානව හිමිකම් කොමිෂන් සභාවේ ප්‍රාදේශිය කාර්යාලයට මාර්තු 27 වැනිදා පැමිණිලි කළ කෝවිලේ පාලනාධිකාරිය පවසන්නේ ඒ සම්බන්ධයෙන් පොලීසියට පැමිණිලි කිරීමටද කටයුතු කරන බවයි.
වව්නියාව දිස්ත්‍රික්කයේ නෙදුන්කේනි ප්‍රදේශයේ වෙඩුක්කුනාරි කන්දේ පිහිටි ආදී ලිංගේස්වර කෝවිලට හානි සිදු කළ පිරිස කඳු මුදුනේ තැන්පත් කර තිබූ ආදිලිංගේශ්වරර් ප්‍රතිමාව ගලවා ලඳු කැලෑවට දමා ඇති බවයි පළාත් බද වාර්තාකරුවන් පවසන්නේ.
ආදී ලිංගේස්වර පිළිමයට අමතරව එම ස්ථානයේ තැම්පත් කර තිබු ගණදෙවි, අම්මන් සහ බහිරව යන ප්‍රතිමා ත්‍රිත්වයත් එම ස්ථානයෙන් අතුරුදහන් කර ඇති බව ඔවුහු වැඩි දුරටත් පවසති.
වෙඩුක්කුනාරි කන්දේ පිහිටි ආදී ලිංගේස්වර කෝවිලට වසර දෙසීයක කාලයක් තිස්සේ පරම්පරා පහකට අයිති ප්‍රදේශයේ හින්දු බැතිමතුන් වන්දනාමාන කළත් 2018 වසරේ දී ශ්‍රී ලංකා පුරාවිද්‍යා දෙපාර්තමේන්තුව ප්‍රදේශවාසීන්ට දැනුම් දී ඇත්තේ වව්නියාව, නෙදුන්කේනියේ ඕලුමඩු ප්‍රදේශයේ පිහිටි වෙඩුක්කුනාරි කන්දට නොයන ලෙසයි.
එයට හේතු ලෙස පුරා විද්‍යා දෙපාර්තමේන්තුව පවසා ඇත්තේ වෙඩුක්කුනාරි කන්ද තම පාලනය යටතේ පවතින බවයි.
පළාත් බද මාධ්‍යවේදීන් පවසන පරිදි පුරා විද්‍යා දෙපාර්තමේන්තුව එවැනි නිවේදනයක් නිකුත් කර තිබුනද නෙදුන්කේනි පොලීසිය දැනුවත් කිරීමෙන් පසු සෑම සිකුරාදා දිනකම ආදී ලිංගේස්වර කෝවිලේ දේව වන්දනය සිදු කිරීමට දෙමළ හින්දු බැතිමතුන් කටයුතු කර ඇත.
පුරාවිද්‍යාත්මක වැදගත්කමක් ඇති ස්ථානයකට හානි කරන බවට චෝදනා කරමින් කෝවිලේ පාලනාධිකාරියට එරෙහිව 2021 වසරේදී පුරාවිද්‍යා දෙපාර්තමේන්තුව විසින් වව්නියාව මහේස්ත්‍රාත් අධිකරණයේ නඩුවක් ගොනු කළ තිබෙන අතර නඩු කටයුතු වවුනියාව අධිකරණයේ විභාග වන අතරවාරයේ ම කෝවිලේ ප්‍රධාන හින්දු පූජකවරයෙකු ඇතුළුව තුන් දෙනකු බන්ධනාගාර ගත කිරීමට අධිකරණය නියෝග කර තිබේ.
පසුව ඔවුන් තිදෙනා ඇප මත නිදහස් කිරීමට අධිකරණය නියෝග කළත් එම නඩුව තව දුරටත් විමර්ශනය කෙරෙන බව පළාත් බද මාධ්‍යවේදීහු වැඩි දුරටත් පවසති.
පළාතේ දෙමළ ජනතාව අද වන විට මෙම කෝවිල වෙඩුක්කුනාරී ආදී ලිංගේස්වර කෝවිල ලෙස හැදින්නුවද අතීතයේ එම ස්ථානය වඩ්ඩමාන පර්වත විහාරය ලෙස හඳුන්වන ලද බවට සිංහල බෞද්ධයන් අතර මතයක්ද පවති.
Facebook Comments
