ජාතික ප්රශ්නයට විසඳුමක් ලෙස ගෙන ඒමට සුදානම් වන යෝජිත නව ව්‍යවස්ථාවට විරෝධය පෑ බෞද්ධ භික්ෂුවක් සියලූ ජාතීන්ගේ එකඟතාවයෙන් ජාතික ප්රශ්නයට විසඳුමක් දැකිය හැකි නායකයා ජනපති මෛත්‍රීපාල සිරිසේන පමණක් බව පෙන්වා දී තිබේ.
රට ඉදිරියේ පවතින බරපතළ අභියෝග ජයගැනීම සඳහා විශාල ශක්තියක් සහ හැකියාවක් ජනාධිපතිවරයා සතු බව ශ‍්‍රී ලංකා පාලි හා බෞද්ධ විශ්වවිද්‍යාලයේ ජ්‍යෙෂ්ඨ කථිකාචාර්ය පූජ්‍ය මැදගොඩ අභයතිස්ස හිමි කිය සිටියේ 29 ඉරිදා පැපිළියාන සුනේත‍්‍රා මහාදේවි පිරිවෙන් රජමහා විහාරස්ථානයේ කඨින පූජෝත්සවය සහ වාහල්කඩ සහ සම්මන්ත‍්‍රණ ශාලාව විවෘත කිරීම වෙනුවෙන් සංවිධානය කොට තිබූ උත්සවය අමතමිනි.
රටට නිදහස ලැබුණු දා සිටම සුළු ජනවර්ග හා මහ ජනවර්ග අතර ගැටුම් අවුලවනුයේ අවස්ථාවාදී දේශපාලනඥයින් බවත්, එසේ ඇවිලවිය හැකි යම් මූල බීජයක් පවතින්නේ නම් එය ඉවත් කොට සියලූ ජාතීන්ට සමගියෙන් ජීවත්විය හැකි පරිසරයක් නිර්මාණය කිරීම තම ඒකායන අරමුණ බව ජනපති තමන් සමඟ පැවසු බව අභයතිස්ස හිමියෝ සිහිපත් කළහ.
බෞද්ධ ප‍්‍රතිපත්තිය
කිසිඳු ජීවිතයක් විනාශ නොකරමින් සහ විනාශවන්නට ඉඩ නොතබමින් ගැටුම් නිරාකරණය කර ගැනීම බෞද්ධ ප‍්‍රතිපත්තිය බව මෙම අවස්ථාවට එක් වු ජනපති මෛත්‍රීපාල සිරිසේන ප්‍රකාශ කළේය.
“ගැටුම් නිරාකරණය පිළිබඳ ගැඹුරින්ම දේශනා කළ ශාස්තෘවරයා බුදුරජාණන් වහන්සේ බවත්, ගැටුම් නිරාකරණයට විවිධ ක‍්‍රමවේද තිබිය හැකි වුව ද බෞද්ධ ප‍්‍රතිපත්තිය වනුයේ, කිසිම ජීවිතයක් විනාශ නොකිරීම මෙන්ම කිසිම ජීවිතයක් විනාශවන්නට ඉඩ නොතබමින් ගැටුම් නිරාකරණය කර ගැනීම” යි ජනාධිපතිවරයා වැඩි දුරටත් කියා සිටියේය.
Facebook Comments
