කරන්න බැරි කොම්පැනි “කම්කරු පාලනයට බාර දෙන්න”

ලාබ නැති බව පවසමින් හාම්පුතුන් විසින් කම්කරුවන්ගේ වැටුප් කප්පාදු කිරීමට ගන්නා උත්සාහයට විරෝධය පළ කරන දිවයිනේ පුද්ගලික අංශයේ මුල් පෙලේ වෘත්තීය සමිතියක්, පවත්වාගෙන යා නොහැකි බව කියන ව්‍යාපාර කම්කරු පාලනයට භාර දෙන ලෙස ආණ්ඩුවෙන් ඉල්ලා තිබේ.

රැකියා සහ කම්කරු සබඳතා අමාත්‍ය දිනේෂ් ගුණවර්ධන වෙත ජුනි 12 සිකුරාදා ලිපියක් බාර දෙමින් ලංකා වෙළද, කාර්මික සහ පොදු කම්කරු සංගමය අවධාරණය කර ඇත්තේ ඉදිරි මාස සදහා සේවකයන්ට සියයට පනහක් හෝ රුපියල් 14,500 ක් ගෙවීම සදහා සේවායෝජකයන් විසින් කරන ලද යෝජනාවට දැඩි විරෝධය පල කරන බවයි.

ලංකා සේව්‍ය සම්මේලනයේ අධ්‍යක්ෂ ජනරාල් කාර්ය සාධක බලකා රැස්වීමේදී ඇති කළ බව කියන ඊනියා “ත්‍රෛ පාර්ශව ගිවිසුම” මේ වනවිට ඔවුන්ගේ සාමාජික හාම්පුතුන් මෙන්ම වෙනත් සේව්‍යයන් විසින්ම බොහෝ තැන්වල උල්ලංඝණය කර ඇති බව වෘත්තීය සමිති නායක සිල්වෙස්ටර් ජයකොඩි අමාත්‍යවරයා වෙත යොමු කළ ලිපිය මගින් සිහිපත් කර තිබේ.

“මැයි මස 5 වන දින කාර්ය සාධක බළකායේ රැස්වීමට පසු ඊනියා “ත්‍රෛයි පාර්ශවීය ගිවිසුමක්” ගැන සේව්‍ය සම්මේලනය විසින් සිය සාමාජිකයන්ට යවන ලද චක්‍රලේඛය පිළිබඳවද, අප විසින් ප්‍රශ්න කර ඇත්තෙමු.”

ඔවුන්ගේ සාමාජිකයන්ට උවමනා ආකාරයට චක්‍රලේඛ යැවීමට සේව්‍ය සම්මේලනයට හැකියාව ඇති නමුත් වෘත්තිය සමිති සමග ගිවිසුමක් ඇතිකළ බවට අසත්‍ය, සදාචාර නොවන ප්‍රකාශයක් කිරීම අනුමත නොකරන බවයි ලංකා වෙළද, කාර්මික සහ පොදු කම්කරු සංගමයේ ප්‍රධාන ලේකම් සිල්වෙස්ටර් ජයකොඩි අවධාරණය කරන්නේ.

පාලකයන් සේව්‍ය සම්මේලන චක්‍රලේඛය පෙන්වමින් තමන් ගෙවමින් සිටි වැටුප් පවා කප්පාදු කිරීමට පියවර ගෙන ඇති බවට තම සංගමය වෙත වාර්තාවන බවද ජූනි 11 දින පැවැති කාර්ය සාධක බළකායේ රැස්වීමේදී පෙන්වා දුන් බව වෘත්තිය සමිති නායකයා අමාත්‍යවරයාට සිහිපත් කර දී තිබේ.

“ඊයේ, ජූනි 11 වන දින පැවති කාර්ය සාධක බලකායේ රැස්වීමේදී, මාර්තු අප්‍රේල් මාස වල පැවැති තත්ත්වයට වඩා වෙනස් ලෙස කර්මාන්ත ශාලා සහ ආයතන සිය සාමාන්‍ය කාර්යයන් ආරම්භ කළ සන්දර්භයක් තුළ පවා EFC අධ්‍යක්ෂ ජනරාල් කනිෂ්ඨ වීරසිංහ මහතා ඉල්ලා සිටියේ, තවත් මාස දෙකකට රුපියල් 14.500 හෝ වැටුපින් 50% ගෙවීමට අනුමැතිය ලබා දෙන ලෙසයි.”

පාලකයන්ගේ කෑදරකම

මෙය හුදෙක් සේවාදායකයන් ජීවත් වූවත් නැතත්, ලාභ සඳහා වන පාලකයන්ගේ “සංයුක්ත කෑදරකම” මැනවින් පෙන්වා දීමක් බව වෘත්තිය සමිති නායකයා අවධාරණය කර තිබේ.

“කර්මාන්ත හිමියන්ගේ සංගමයක් වෙනුවෙන් යෙහාන් ලෝරන්ස් මහතා කියා සිටියේ එය දෙසැම්බර් මාසය දක්වා තවත් මාස 6 කට දීර්ඝ කළ යුතු බවයි.”

ඒ පිළිබඳව සිය සංගමය එකඟ නොවන බව ඉතා පැහැදිලි ව දන්වා සිටි බව වෘත්තිය සමිති නායකයා නැවත වරක් අමාත්‍යවරයාට අවධාරණය කර තිබේ.

සේව්‍ය සම්මේලනය විසින් මැයි ජුනි මාසවල දහස් ගණන් සේවකයන් සේවයෙන් පහ කිරීම හා වෘත්තීය සමිති ක්‍රියාධරයන්ට රැකියාව නොදීම පිළිබඳවද, තොරතුරු ඇති බැවින් වහාම කම්කරු කොමසාරිස්වරයා විසින් කටයුතු කළයුතු බව අමාත්‍යවරයාට අවධාරණය කරන වෘත්තිය සමිති නායක සිල්වෙස්ටර් ජයකොටි වැඩි දුරටත් ඉල්ලා ඇත්තේ මෙම තත්ත්වය තුළ ජූලි මස සිට සම්පූර්ණ වැටුප් සියලුම අදාළ සේවාදායකයන්ට ගෙවිය යුතු බවයි.

කම්කරු කොමසාරිස්වරයා වෙතත් පිටපතක් යොමු කරමින් අමාත්‍ය දිනේෂ් ගුණවර්ධන වෙත බාර දුන් ලිපිය මගින් සිල්වෙස්ටර් ජයකොඩි ඉතා ඕනෑකමින් ඉල්ලා ඇත්තේ හැකි ඉක්මණින් ජාතික කම්කරු උපදේශක සභා (NLAC) රැස්වීමක් කැඳවන ලෙසයි.