පෑළියගොඩ පොලිස් අත්අඩංගුවේ සිටි සැකකරුවෙකු මිය යාමේ සිද්ධිය සම්බන්ධයෙන් අත්අඩංගුවට ගත් පොලිස් නිලධාරීන් 5 දෙනා ලබන 6 වන දා දක්වා රක්ෂිත බන්ධනාගාරගත කර ඇත.
සිද්ධියට අදාළව පෑලියගොඩ පොලිසියේ නිලධාරියෙකු සහ කොස්තාපල්වරුන් හතරදෙනෙකු සැකපිට අත්අඩංගුවට ගෙන ඇති අතර සැකකරුවන් ඊයේ අලුත්කඩේ මහේස්ත්‍රාත් අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාර ගත කළ බවයි පොලිසිය පවසන්නේ.
පෑළියගොඩ පොලිසියේ අපරාධ අංශය විසින් ප්‍රශ්නකිරීම සඳහා අත්අඩංගුවට ගනු ලැබූ පුද්ගලයා මියගොස් ඇත්තේ රෝහල්ගත කිරීමෙන් අනතුරුව බව පවසන පොලිසිය ඔහුට පහරදී ඇති බවට පශ්චාත් මරණ පරීක්ෂණයෙන් හෙළිදරව් වී ඇති බවද පැවසීය.
පොලිස් මාධ්‍ය ප්‍රකාශක, නියෝජ්‍ය පොලිස්පති ප්‍රියන්ත ජයකොඩි පවසන්නේ සිද්ධිය සම්බන්ධයෙන් පොලිස්පතිවරයාගේ පෞද්ගලික අධීක්ෂණයට යටත්ව ජ්‍යෙෂ්ඨ නියෝජ්‍ය පොලිස්පතිවරයෙකු යටතේ විශේෂ පොලිස් කණ්ඩායමක් පරික්ෂණ ආරම්භ කර තිබෙන බවයි.
මෙලෙස පොලිස් අත්අඩංගුවේදී මිය ගොස් ඇත්තේ බියගම මාබිම රක්ගවත්ත ප්‍රදේශයේ පදිංචිව සිටි 41 හැවිරිදි චදික් ශ්‍යාමන් වික්‍රමාරච්චි නමැති පුද්ගලයෙක් වන අතර වයස අවුරුදු 7ක පුතෙකු‍ගේ සහ මාසයක් වයසැති දියණියකගේ පියෙකු වූ ඔහු බියගම රක්ගහවත්ත ප්‍රදේශයේ පදිංචි කුලී රථ පැදවීම රැකියාව ලෙස කළ අයෙකි.
Facebook Comments
