පසුගිය දෙවසර තුළ මෙරට අධිකරණ ක්ෂේත‍්‍රයට ජාතික වශයෙන් මෙන්ම අන්තර්ජාතික වශයෙන් ද චෝදනා එල්ල නොවන ලෙස කටයුතු කිරීමට හැකිවීම පිළිබඳ ජනාධිපතිවරයා ලෙස තමා සතුටුවන බව ජනපති මෛත්‍රීපාල සිරිසේන පවසයි.
අධිකරණ ක්ෂේත‍්‍රයේ සියලුදෙනාට නිදහස් මනසකින් සහ තෘප්තිමත්ව සිය රාජකාරී ඉටුකළ හැකි පරිසරය ගොඩනගා දීමේ වගකීම වත්මන් රජය විසින් ඉටු කරන බවට ජනපතිවරයා කියා සිටියේ රුපියල් මිලියන 382 ක වියදමින් නිම කිරීමට අපේක්ෂිත පොලොන්නරුව නව අධිකරණ සංකීර්ණයට ඊයේ (25) මුල්ගල තබමිනි.
අපක්ෂපාතී, ස්වාධීන සහ ආදර්ශමත් අධිකරණ පද්ධතියක් රට තුළ ගොඩනැගීමට වත්මන් රජය කැපවී සිටින බව පෙන්වා දුන් ජනාධිපතිවරයා අධිකරණ පද්ධතිය තුළ තෘප්තිමත්ව සිය රාජකාරී ඉටුකළ හැකි පරිසරය ගොඩනගා දීමේ වගකීම වත්මන් රජය විසින් ඉටු කරන බව ද අවධාරණය කළේය.
ඉදිරි සතියේදී සිය ධූරයෙන් විශ‍්‍රාම ගැනීමට නියමිත අගවිනිසුරු කේ. ශ්‍රී පවන්ගේ සේවා කාලය ද මෙහිදී ජනාධිපතිතුමාගේ ඇගයීමට ලක් විය.
අධිකරණ අමාත්‍ය විජයදාස රාජපක්ෂ, නියෝජ්‍ය අමාත්‍ය දුෂ්මන්ත මිත‍්‍රපාල, උතුරු මැද පළාත් ප‍්‍රධාන අමාත්‍ය පේෂල ජයරත්න යන අයවලුන් සහ අගවිනිසුරු කේ. ශී‍්‍ර පවන්, නීතිපති ජයන්ත ජයසූරිය සහ අධිකරණ හා නීති ක්ෂේත‍්‍රයේ ප‍්‍රවීනයින් ද, අධිකරණ අමාත්‍යාංශයේ ලේකම්, පොලොන්නරුව දිස්ත්‍රික් ලේකම් ඇතුළු රාජ්‍ය නිළධාරින් ඇතුළු පිරිසක් මෙම අවස්ථාවට එක්ව සිටියහ.
Facebook Comments
