ලංකාවේ දෙමළ ජනයාගේ සුවිශේෂ ප්‍රශ්නය හඳුන්වා දීමට ග්‍රන්ථයක් එලි දැක්වේ

ශ්‍රී ලාංකික දෙමළ ජනතාවට, දෙමළ වීම නිසා ම ඇති ප්‍රශ්නය කුමක්දැයි විමසන පැනයට පිළිතුරු දීම වෙනුවෙන් ලියැවුන කෘතියක් යාපනයේදී ජනගත කර තිබේ.

වැල්වැටිතුරේ පුරවැසි කමිටුවේ හිටපු සභාපති වරලත් ගණකාධිකාරි සෙල්වේන්ද්‍රා සබාරත්නම් විසින් රචනා කළ “ශ්‍රී ලංකාවේ දෙමළ ජනයාට එරෙහි ව්‍යුහාත්මක වර්ග සංහාරය සහ වාර්ගික ශෝධනය” (Structural Genocide and Ethnic Cleansing of Tamils in Sri Lanka) ග්‍රන්ථය එළි දැක්වීමේ අවස්ථාවට එක්වෙමින් හිටපු ශ්‍රේෂ්ඨාධිකරණ විනිශ්චයකාරවරයකුද වන දෙමළ ජනතා සංවිධානයේ ලේකම් පාර්ලිමේන්තු මන්ත්‍රී සී වී විග්නේස්වරන් සදහන් කළේ එම ප්‍රශ්නය නගන අයට මෙම කෘතිය කියවා දෙමළ ජනතාවගේ ප්‍රශ්න මොනවාදැයි තේරුම් ගන්නා ලෙසයි.

“බොහෝ තැන්වල සිංහල නායකයන් අපෙන් අසන ප්‍රශ්නය තමයි, අනෙකුත් ශ්‍රී ලාංකිකයන් අත්විඳ නැති මොන දුක්ඛිත තත්වයද දෙමළ ජනයා අත්විද තියෙන්නේ කියලා? අපි මේ වන විට සමහර කරුණු කිහිපයක් පැහැදිළි කළත් ඉදිරියේදී අපි මේ පොත ඔවුන්ට හඳුන්වා දී, මේක කියවන්න. ඔයාලට තේරුම් ගන්න පුළුවන් වේවි කියලයි කියන්න යන්නේ.”

“ශ්‍රී ලංකාවේ දෙමළ ජනයාට එරෙහි ව්‍යුහාත්මක වර්ග සංහාරය සහ වාර්ගික ශෝධනය” කෘතිය අප්‍රේල් 20 වැනිදා සී වී විග්නේස්වරන් මන්ත්‍රීවරයාගේ ප්‍රධානත්වයෙන් එළි දක්වා ඇත්තේ නල්ලුර්හි පිහිටි දෙමළ ජනතා සංවිධානයේ කාර්යාලයේදීය.

ඉංශ්‍රිසි බසින් රචනා කළ මෙම කෘතියේ සිංහල සහ දෙමළ පරිවර්තනද නුදුරේදීම නිකුත් කිරීමට නියමිත බව සී වී විග්නේස්වරන් මන්ත්‍රීවරයා සදහන් කළ බවයි පළාත් බද වාර්තාකරුවන් පවසන්නේ.

පොත එළි දැක්වීමේ අවස්ථාවට එක්ව සිටි පිරිස අමතමින් කෘතියේ කර්තෘ වරලත් ගණකාධිකාරි සෙල්වේන්ද්‍රා සබාරත්නම් සදහන් කළේ මෙම කෘතිය දෙමළ ජනයාගේ අයිතිවාසිකම් රැකගැනීම වෙනුවෙන් දරන උත්සාහයක් බවයි.

“ප්‍රජාතන්ත්‍රවාදය ගැන කතා කරන බටහිර රටවල් සියල්ල ශ්‍රී ලංකාවේ ප්‍රජාතන්ත්‍රවාය තියනවා කියලා බොහෝ උපකාර කරනවා. ප්‍රජාතන්ත්‍රවාදය නැහැ. මේක වර්ගතන්ත්‍රවාදය. වර්ගතන්ත්‍රවාදය කියන්නේ එක ජන වර්ගයකට බලය දෙනවා. දීලා අපිව වහල් බාවයට පත් කරනවා. අපි සහ අපේ අයිතිවාසිකම් වලට ගරු කිරීමේ වගකීම තිබෙනවා. නමුත් එයාලා එහෙම ගරු කරලා ක්‍රියාත්මක වෙන්නේ නෑ. අපිව විනාශ කරන්නම ඉන්නවා. අපි දිගටම කිසිවක් නොකළොත් විනාශ වෙනවා. ඒක වැලැක්වීමටයි මේ උත්සාහය.”

පොත එළි දැක්වීමේ උත්සවයේ දී කෘතිය සම්බන්ධයෙන් මුලික අදහස් දැක්වීම සිදු කළ යාපනය විශ්ව විද්‍යාලයේ දේශපාලන අංශයේ මහාචාර්ය කේ.ආර් ගනේෂලිංගම් අවධාරණය කළේ ඊළාම් දෙමළ ජනතාව වර්ග සංහාරයට ලක් වු ඉතිහාසය පරිච්ජේද 10 කින් මේ කෘතිය තුළ අන්තර්ගත කර ඇති බවයි.

“මෙම පරිච්ඡේද 10 හරහා ශ්‍රී ලංකාවේ දේශපාලන ඉතිහාසය සාකච්ඡා කරනවා. එම ඉතිහාස පිටු හරහා ඊළාම් දෙමළ ජනතාවට එරෙහිව කළ ඝාතන සහ එම ජනතාවට සිදු වූ ඛේදනීය සිදුවීම් සියල්ල සටහන් වී තියනවා.”

“ශ්‍රී ලංකාවේ දෙමළ ජනයාට එරෙහි ව්‍යුහාත්මක වර්ග සංහාරය සහ වාර්ගික ශෝධනය” කෘතියේ පළමු පිටපත එහි ලේඛක සෙල්වේන්ද්‍රා සබාරත්නම් විසින් පාර්ලිමේන්තු මන්ත්‍රී සී වී විග්නේස්වරන්ට පිළිගැන්වු බව පළාත් බද වාර්තාකරුවෝ වැඩි දුරටත් පවසති.