අද ඇතැම් තරුණ භික්ෂූන් වහන්සේලාගේ හැසිරීම් හමුවේ බෞද්ධයන් ලෙස ඉතා කනගාටුදායක අවස්ථාවන්ට මුහුණ දීමට සිදුවන බව ජනාධිපතිවරයා පවසයි.
එම සිදුවීම් රටෙන් මෙන්ම ලෝකයෙන් ද සැඟවිය නොහැකි අතර අපේ රටේ ශ්‍රේෂ්ඨ ඉතිහාසයේ අභිමානය පිළිබඳ සතුටු වෙනවා සේම එය ඉදිරියට ගෙන යාම සඳහා හෙට දවසේ ද විනයධර, ධර්මධර උතුම් භික්ෂු පරපුරක අවශ්‍යතාවය මතුව තිබෙන බවයි ජනාධිපති මෛත්‍රීපාල සිරිසේන පවසන්නේ .
රටේ ඒකීයභාවයට හානි නොවන අයුරින් රට හමුවේ ඇති අභියෝග ජය ගැනීමට කටයුතු කරන බව ජනාධිපතිතුමා පවසා ඇත්තේ අතුරුගිරිය හබරකඩ ආර්ය නිකේතන භික්ෂු පුහුණු මධ්‍යස්ථානයේ අභිනවයෙන් ඉදිකරන ලද, පූජ්‍ය ගංගොඩවිල සෝම හිමි, නව සංඝාවාසය සඟ සතු කොට පූජා කිරීමේ පුණ්‍යෝත්සවයට පසුගිය 11ඉරිදා දින පස්වරුවේ එක්වෙමිනි.
රටේ ඒකීයභාවය ආරක්ෂා වන ආණ්ඩුක‍්‍රම ව්‍යවස්ථාවක් සමඟ සාමාජ සාධාරණත්වය තහවුරු කිරීමට කැපවන බව ද ජනාධිපතිතුමා එහිදී පවසා තිබේ.
අද රටවල් රැසක ලක්ෂ ගණනක් ශ්‍රී ලාංකිකයින් සරණාගතයින් ලෙස සිටින අතර උතුරේ අනාථ කඳවුරුවල දහස් ගණනක් ජනතාව ජීවත්වන බව ද සඳහන් කර ඇති ජනාධිපතිතුමා ඔවුන් නැවත තුවක්කුව අතට නොගන්නා අයුරින් සියලු දෙනා වෙනුවෙන් සමාජ සාධාරණත්වය ඉටු කළ යුතු බව ද ප‍්‍රකාශ කර ඇත.
උතුරු සහ නැගෙනහිර ප‍්‍රදේශවල දීර්ඝ කාලීනව සිදුවූ සංවර්ධනයේ විෂමතා හේතුවෙන් එම ජනතාවගේ ජීවිත ඉතා දුෂ්කර තත්ත්වයකට ඇද වැටී තිබෙන බව ද සඳහන් කරන ජනාධිපතිතුමා දිවයිනේ පළාත් 09 දිස්ත්‍රික්ක 25 සඳහාම සාධාරණ සංවර්ධනයේ ප‍්‍රතිලාභ ලබාදීම රජයේ වගකීම බව ද කියා තිබේ.
අමරපුර සිරි සද්ධම්ම යුක්තික මහා නිකායේ මහානායක අතිපූජ්‍ය නාකුළුගමුවේ පේමතිලකාභිධාන මහා නායක හිමිපාණන් වහන්සේ ප‍්‍රමුඛ මහා සංඝරත්නය ද අමාත්‍ය පාඨලී චම්පික රණවක ඇතුළු මැති ඇමතිවරුන් පිරිසක් සහ ප‍්‍රදේශවාසී ජනතාව විශාල පිරිසක් ද මෙම අවස්ථාවට එක්වී ඇත.
Facebook Comments
