රජයේ ප්‍රවෘත්ති අධ්‍යක්ෂකවරයා සහ නාවික හමුදාපතිවරයා අතර පවතින මිත්‍රත්වය හේතුවෙන් මේ දින වල ප්‍රවෘත්ති දෙපාර්තුමේන්තුවේ නවීකරණ කටයුතු නාවික හමුදාව විසින් සිදු කරනු ලබයි.
ප්‍රවෘත්ති අධ්‍යක්ෂක ආචාර්ය රංග කලන්සුරිය විසින් නාවික හමුදාපති අද්මිරාල් රවින්ද්‍ර විජේගුණරත්නගෙන් කරන ලද ඉල්ලීමකට අනුව මෙසේ නාවික හමුදා සෙබලුන් ප්‍රවෘත්ති දෙපාර්තුමේන්තුවේ අලුත් වැඩියාව වෙනුවෙන් යොදවා ඇත.
මාධ්‍යවේදී රොෂාන් දිලිප් කුමාරට හම්බන්තොට වරායේදී පහර දීම සිදුවුයේ ඔහු වාර්තාකරන සදාචාරය කඩ කිරීම නිසා යැයි ප්‍රවෘත්ති අධ්‍යක්ෂකගේ අත්සනින් යුතුව නිකුත් කරන ලද නිවේදනයේ මාධ්‍යවේදියාට දොස් නඟා ඇත්තේ නාවික හමුදාපති මිත්‍රයා බේරා ගැනීමේ අරමුණින් දැයි සැක මතු වෙමින් පවතී.
ගැටුම් වාර්තා කිරිමේදි පිළිපැදිය යුතු අවම සදාචාත්මක පියවර රොෂාන් දිලිප් විසින් බිඳ දමා ඇති බවට එම නිවේදනයේ සඳහන් වුවද ඔහු කඩ කර ඇත්තේ කවර සදාචාත්මක පියවරද යන්න එහි සඳහන්ව නැත.
සිවිල් ඇඳුමින්
නාවික හමුදාපතිවරයාම හම්බන්තොට මෙහෙයුමට සහභාගී වූයේ ‘අන්තර්ජාතික නාවික ගමනාගමන සහ වරාය පහසුකම් ආරක්ෂණ නීති සංග්‍රහය’ යටතේ යැයි නාවික හමුදාව උපුටා දක්වමින් ආචාර්ය රංග කලන්සුරිය සිය නිවේදනයේ සඳහන් කර තිබේ.
නිළ ඇඳුම නොමැතිව සිවිල් ඇඳුමින් නාවික හමුදාපතිවරයා එම මෙහෙයුමට සම්බන්ධ වීම සහ මාධ්‍යවේදියාට පහර දීම නාවික හමුදාව සඳහන් කරන ‘අන්තර්ජාතික නීතියට’ අනුකුල දැයි එම නිවේදනයේ සඳහන් නොවේ.
තමන් එම සිද්ධිය වන අවස්ථාවේදි තම හැඳුනුම්පත පැළඳ සිටි බව සහ නාවික හමුදාපති වරයා පහර දීමට සැරසෙන විට තම හැඳුනුම්පත පෙන්වා සිටියද “මීඩියා හින්ද තමා ප*යො ගහන්න‍ෙ” යැයි පවසා නාවික හමුදාපතිවරයා පහර දුන් බවයි මාධ්‍යවේදි රොෂන් දිලීප් සිලෝන් ජර්නල්ස් වෙත කියා සිටියේ.
මෙම ස්ථානයේ නාවික හමුදාව හා විරෝධතාකරුවන් අතර ගැටුමක් ඇති නොවුන බවත් නාවික හමුදාපතිවරයා තමාව ඉලක්ක කරමින්ම මෙම පහර දීම කල බවටයි ඔහු අවධාරණය කරන්නේ.
මාධ්‍ය සංවිධාන විසින් සිද්ධිය සම්බන්ධව පරීක්ෂණයක් පවත්වන ලෙසට හා නාවික හමුදාපතිවරයා ධුරයෙන් ඉවත් කරන ලෙසටද රජයට බල කර සිටී.
Facebook Comments
