අපහසුතාවෙන් පෙළෙන අඩු ආදායම්ලාභී මන්ත්‍රීවරුන් විශාල පිරිසක් පාර්ලිමේන්තුවේ සිටින බව ජල සම්පාදන රාජ්‍ය අමාත්‍යවරයා ප්‍රකාශ කර තිබේ.
අඩු ආදායම්ලාභී මන්ත්‍රීවරුන්ට ඇතැමුන්ගෙන් බලපෑම් එල්ලවීම වළක්වාලන්නට තමන් රාජ්‍ය ඇමැති ධුරයේ වැටුප ලබා ගන්නා බවයි සනත් නිශාන්ත ඇමැතිවරයා පවසන්නේ.
“මම ව්‍යාපාරිකයෙක් හැටියට මට ජිවත් වෙන්න විදියක් තියෙනවා, ප්‍රතිපත්තියක් විදියට ඕනේ නම් මට වැටුපක් දීමනාවක් කිසිම දෙයක් නොගෙන වැඩ කරන්න පුලුවන් නමුත් නමුත් මේකේ ඉතා ම විශාල මන්ත්‍රීවරු සංඛ්‍යාවක් ඉන්නවා ඔවුන් ඉතාම අඩු ආදායම් මට්ටමේ ඉන්න අපහසුතාවයෙන් පෙලෙන උදවිය, අපි වැටුප නොගෙන වැඩ කෙරුවොත් අර මන්ත්‍රීවරුන්ට අගෞරවයක් වෙන නිසා, ඒ අයත් ජනතාව බලපෑම් කරන නිසා සනත් නිශාන්තලා වගේ වැටුප් නොකර වැඩ කරන්න කියලා ඒ නිසා මම වැටුප් ගන්නවා.”
සිය රාජ්‍ය අමාත්‍ය ධූරයේ වැඩ භාර ගැනීම වෙනුවෙන් ජල සම්පාදන අමාත්‍යාංශයේ පැවති මාධ්‍ය හමුවකදී ඔහු මේ බව සඳහන් කළේ ය.
තමන් වැටුප් ලබාගන්නා නමුත් එම සියලු වැටුප් සිය පෞද්ගලික පරිහරණයට යොදා නොගෙන මහජන සේවය සඳහා යොදන බව ද ප්‍රාදේශීය සභා මන්ත්‍රීවරයෙකු වශයෙන් කටයුතු කළ කාලයේ සිට තමා ලබාගත් වැටුප් ජනතා සේවය සඳහා යෙදූ බව ද ල සම්පාදන රාජ්‍ය අමාත්‍ය සනත් නිශාන්ත වැඩිදුරටත් කියා සිටියේය.
Facebook Comments
