විශ්වවිද්‍යාල පද්ධතිය තුළ පවතින අධ්‍යයන සහ සුභ සාධන ගැටළු රැසකට විසදුම් ඉල්ලා නැගෙනහිර විශ්වවිද්‍යාලයේ සිසුන් පිරිසක් විරෝධතාවක් දියත් කර තිබේ.
මාර්තු 7 වැනි සඳුදා සිසුන් විසින් දියත් කරන ලද විරෝධතාව නැගෙනහිර විශ්වවිද්‍යාලයේ මහා ශිෂ්‍ය සංගමයේ සංවිධානත්වයෙන් පැවැති බවයි පළාත් බද වාර්තාකරුවන් පවසන්නේ.
ශ්‍රී ලංකා නැගෙනහිර විශ්වවිද්‍යාලය පිහිටි වන්දාරමුල්ලෙයි සිට කිලෝ මීටර දෙකක පමණ දුරක් සටන් පාඨ කියමින් විරෝධතා පෙළ පාලියකින් සෙන්ලකඩි හන්දිය දක්වා පැමිණි සිසුන් එහිදී විරෝධතාවය දියත් කර තිබේ.
විරෝධතාවය අතුරතුරදී මාධ්‍ය වෙත අදහස් දක්වමින් නැගෙනහිර විශ්වවිද්‍යාලයේ මහා ශිෂ්‍ය සංගමයේ සභාපති සදහන් කළේ විශ්වවිද්‍යාල පද්ධතිය තුළ පවතින අධ්‍යයන හා සුභ සාධන ගැටළු රැසකට විසදුම් ඉල්ලා විරෝධතාවය දියත් කරන බවයි.
2023 අන්තර් විශ්වවිද්‍යාලයීය ක්‍රීඩා තරගාවලිය නැගෙනහිර විශ්වවිද්‍යාලයේ සත්කාරකත්වය සහිතව පැවැත්වීමට නියමිතව තිබුනත් ක්‍රීඩාවට අවශ්‍ය කරන මුලික පහසුකම් මේ වන විටත් සම්පාදනය වී නොමැති බව පෙන්වා දුන් ශිෂ්‍ය සංගම් නායකයා ඒ සම්බන්ධයෙන් ක්‍රීඩා අමාත්‍ය නාමල් රාජපක්ෂටද චෝදනා කළේය.
” ක්‍රීඩාවේ ආශ්චර්ය ගැන කතා කරන නාමල් බේබිට නැගෙනහිර විශ්වවිද්‍යාලයේ ක්‍රීඩා පහසුකම් පේන්නෙ නෑ. ”
රාජ්‍ය විශ්වවිද්‍යාල පද්ධතිය වසා දමා වසර දෙකක් ගතව ඇතත් මේ වන තෙක් එය නැවත විවෘත කරන දිනයක් සම්බන්ධයෙන් ප්‍රකාශයට පත් නොවීම සම්බන්ධයෙන්ද ශිෂ්‍ය සංගම් නායකයා බලධාරීන්ට චෝදනා කළේය.
අන්තර් විශ්වවිද්‍යාලයීය ක්‍රීඩා තරගාවලිය
වසර හතරකට වරක් විශ්වවිද්‍යාලයීය සිසුන් ඉලක්ක කර ගිනිමින් ඔවුන් තුළ වන දක්ෂතා ඇගයීමටත්, තේරීමටත් සරසවි තුළ ක්‍රීඩාව ඉහළ තලයකට ගෙන ඒමටත් අරමුණු කර ගිනිමින් අන්තර් විශ්වවිද්‍යාලයීය ක්‍රීඩා තරගාවලිය පවත්වනු ලබයි.
2023 අන්තර් විශ්වවිද්‍යාලයීය ක්‍රීඩා තරගාවලිය නැගෙනහිර විශ්වවිද්‍යාලයේ සත්කාරකත්වය සහිතව පැවැත්වීමට මේ වන විට කටයුතු සුදානම් කර ඇති නමුත් ඒ සදහා වු කිසිදු සුදානමක් උපකුලපතිට හෝ පාලනාධිකාරියට පවතින් බවක් පෙනෙන්නට නොමැති බවට චෝදනා කරමින් රාජ්‍ය විශ්වවිද්‍යාල කිහිපයකම මහා ශිෂ්‍ය සංගම් විසින් නැගෙනහිර විශ්ව විද්‍යාලයේ උපකුලපතිට ලිඛිතව දන්වා තිබුනි.
” තරගාවලිය සරසවිය තුළ පැවැත්වීම අනිවාර්යෙන් කළ යුත්තක් වන අතර ඒ සදහා දැන් සිටම ක්‍රීඩා පිටියේ ඉදිකිරීම් ආරම්භ කළ යුතුය.පහසුකම් පුළුල් කළ යුතුය.ක්‍රීඩා පුහුණුකරුවන් බදවා ගත යුතුය.නමුත් මේ කිසිවක් නොකර ආණ්ඩුවේ සැලසුම වන්නේ සරසවියෙන් පිටත ක්‍රීඩා පිටි සහ සේවා කුලී පදනම මත ලබා ගනිමින් කොමිස් කුට්ටි ගිලිමින් ක්‍රීඩා උළෙල සරසවියෙන් පිට පැවැත්වීමටය. ”
කඩිනමින් මැදිහත් වී නැගෙනහිර සරසවිය තුළ ක්‍රීඩාවට අදාළ මානව හා භෞතික සම්පත් පුළුල් කර 2023 අන්තර් විශ්වවිද්‍යාලීය ක්‍රීඩා තරගාවලිය සරසවි පරිශ්‍රයේ පැවැත්වීමට අදාල කඩිනම් මැදිහත්වීම සිදු නොකළහොත් නැගෙනහිර විශ්වවිද්‍යාලයේ මහා ශිෂ්‍ය සංගමය හා අන්තර් විශ්වවිද්‍යාලීය ශිෂ්‍ය බල මණ්ඩලය සමග එක්ව ක්‍රියාමාර්ග ගන්නා බව ශ්‍රී ලංකා නැගෙනහිර විශ්ව විද්‍යාලයේ උපකුලපති වෙත විශ්වවිද්‍යාල කිහිපයකම මහා ශිෂ්‍ය සංගම් විසින් යොමු කළ ලිපි වල සදහන්ව තිබේ.
කොතලාවල පනත වහාම අහෝසි කරන ලෙසත්, අධ්‍යාපනය සදහා 6% මුදලක් වෙන් කරන ලෙසත් ඉල්ලා විරෝධතා පැවැත්වු නැගෙනහිර විශ්වවිද්‍යාලයේ මහා ශිෂ්‍ය සංගමයේ සිසුන් තව දුරටත් බල කර තිබුනේ වසර දෙකක් තිස්සේ වසා දමා තිබෙන සරසවි වහාම විවෘත කරන ලෙසයි.
එකම පවුලේ සාමාජිකයන් වන ජනපති, අගමැති, මුදල් ඇමැති සහ ක්‍රීඩා ඇමැතිගේ රුවට සමාන වෙස් මුහුණු පැළැඳි සිසුන් හතරදෙනෙක් ගමන් ගන්නා ආකාරය පළාත් බද මාධ්‍යවේදීන්ගේ කැමරාකාචයට හසුව තිබුනි.
Facebook Comments
