දේශපාලනික රහස් හෙළි කරනවා ජනපතිගෙන් අනතුරු ඇඟවීමක්

0
756
Ivory Agency Sri Lanka
wedding people

නව දේශපාලන පක්ෂයක් බිහිකළ හොත් මෙතෙක් හෙළි නොකළ දේශපාලනික රහස් හෙළි කිරීමට තමන් සූදානම් බව ජනාධිපති මෛත‍්‍රීපාල සිරිසේන පවසනවා.

සම්මුති ආණ්ඩුවට වසරක් පිරීම නිමිත්තෙන් අලුත් රටක් – එක ගමනක් යන තේමාව යටතේ අද (19) මාතර පැවති රැළියකදී ජනාධිපතිවරයා මේ බව පැවසීය.

පසුගිය ජනාධිපතිවරණ සමයේ ඔවුන් සිදුකළ වංචා , දූෂණ , හොරකම් ඉතාම අශිලාචාර තත්ත්වය යටතේ එදා හෙළි කළාසේම නව පක්ෂයක් පිහිටවුවහොත් මෙතෙක් කල් නොකියපු දේවල් , මෙතෙක් හෙළි‍ නොකළ රහස් විදිහට තියාගෙන හිටපු දේවල් සියල්ල හෙළි කරන බවට ජනපති අනතුරු අඟවනවා.

සම්මුතිවාදී ආණ්ඩුව ඉදිරි අවුරුදු 5ක කාලය තුළ ශක්තිමත්ව , ජාතියට හිතෛෂිව මුළු මහත් ජාතියේ යහපත සඳහා ඉදිරි අවුරුදු 5 තුළ ගමන් කරන බවයි ජනාධිපතිවරයා අවධාරණය කරන්නේ.

දූෂණයට , වංචාවට , හොරකමට , නාස්තියට ඔටුනු පැළඳි මිනිස්සුන් හට නැවත බලයට ආණ්ඩුවක් පිහිටුවීමට ඉඩ නොතබවන බවද ජනාධිපති මෛත‍්‍රීපාල සිරිසේන කියා සිටියේය.

යහ පාලන ආණ්ඩුව තුළ සිට දූෂිත ක්‍රියා සිදුකළහොත් ඔවුන්ට අන් අයට වඩා දැඩි දඬුවම් ලබාදෙන බව ද ජනාධිපතිවරයා පැවසීය.

නිදහස සහ ප්‍රජාතන්ත්‍රවාදය සුරක්ෂිත කිරීමට පියවර ගත්තා සේම, රට ආර්ථික අර්බුදයෙන් ද ස්ථීර වශයෙන්ම ගොඩ ගන්නා බව ජනාධිපති මෛත‍්‍රීපාල සිරිසේන ප්‍රකාශ කරනවා.

 
මහින්දට බැරි නිසා ජනතාව මට දුන්නා

ජනතාව විසින් මේ ආණ්ඩුව තමාට ලබා දෙනු ලැබුවේ පසුගිය රජය දිගින් දිගටම ලෝකයට ණය වී රට අගාධයට තල්ලුවී ගිය පසු තවදුරටත් ගෙනයා නොහැකි නිසා බව අගමැතිවරයා මෙම රැළියට සහභාගි වෙමින් පැවසීය.

තමන් බාර ගනු ලැබුවේ මහා කුණු ගොඩක් බවත් පවුලේ අයයි, ගෝලයොයි විනාශ කළ රටක් බවත් ජාතික ආණ්ඩුව නිර්මාණ කළේ විනාශ කළ රට ගොඩනැඟිමට බවයි අගමැති රනිල් වික්‍රමසිංහ අවධාරණ කරන්නේ.

එම අභියෝගය බාරගෙන මේ වන විට රට ක්‍රමයෙන් දියුණු කරමින් සිටින බවත්,පළමු අවුරුද්ද අද දිනයේ සමරනු ලැබුවද දෙවෙනි අවුරුද්ද සමරන විට රට මීට වඩා විශාල දියුණුවක් ලබා සිටිනු ඇති බවට අගමැතිවරයා විශ්වාසය පළ කළ සිටියේය.

ක්‍රිකට් ආයතනයේ හොරු පන්නා දැමූ පසු ක්‍රිකට් කණ්ඩායම විසින් ජයග්‍රහණය තහවුරු කරන බවද,රටේ හොරු පැන්නීමෙන් රටේ සංවර්ධනයද අත්පත් කරගනිමින් සිටින බවයි අග්‍රාමාත්‍යවරයා පෙන්වා දෙන්නේ.

රට ගොඩ නගන විට තමාට දේශද්‍රෝහියා යැයි කියන බවත් ජන්දය ලබා ගැනීමට තමන් ප්‍රභාකරන්ට සල්ලි පොට්ටනි ලබා නොදුන් බවද රනිල් වික්‍රමසිංහ සිහිපත් කළේය.

“එකතුවී ගම හදමු”,එකතුවී රට හදමු”යයි ද,එකතුවී අනාගතය ගොඩනඟමු යයි සියලුදෙනාට ආරාධනා කරන අග්‍රාමාත්‍යවරයා “වෙන් වෙන්ව තරඟ කරමු” යයි යෝජනා කළේය.

Facebook Comments