ලන්ඩනයේදී “බෙලි කැපුම්” පෑ නිලධාරියාට ජනපති තවත් තරු පළඳයි

0

ශ්‍රී ලංකාවේ හැත්තෑ වැනි නිදහස් දිනය දා ලන්ඩනයේ විරෝධතාවක් පැවැත්වූ දෙමළ උද්ඝෝෂකයන්ට මරණ තර්ජනයක් කිරීම නිසා එරට මහේස්ත්‍රාත් අධිකරනයෙන් දඩුවම් කරනු ලැබු යුද හමුදා නිලධාරියකුට ජනාධිපතිවරයා විසින් උසස් වීමක් ලබා දී තිබේ.

ආරක්‍ෂක අමාත්‍යාංශයේ සහ ආරක්‍ෂක මාණ්ඩලික ප්‍රධානී, යුද්ධ හමුදාධිපති හා කොවිඩ්-19 පැතිරීම වැළැක්වීමේ ජාතික ක්‍රියාන්විත මධ්‍යස්ථානයේ ප්‍රධානී ලුතිනන් ජෙනරාල් ශවේන්ද්‍ර ගේ නිර්දේශය මත සන්නද්ධ හමුදා සේනාධිනායක ජනාධිපති ගෝඨාභය රාජපක්‍ෂ විසින් බ්‍රිගේඩියර් ආඬිගේ ප්‍රියංක ඉඳුනිල් ප්‍රනාන්දු මේජර් ජෙනරාල් ධුරයට උසස් කළ බව ශ්‍රී ලංකා යුද්ධ හමුදාව පවසයි.

“11 වන ජාතික රණවිරු අනුස්මරණ දිනයට සමගාමීව යුද්ධ හමුදාධිපතිගේ නිර්දේශය මත” ජනාධිපතිවරයා විසින් යුද්ධ හමුදාවේ නිලධාරීන් 177 දෙනෙකුගේ නිල උසස් කළ බව ශ්‍රී ලංකා යුද්ධ හමුදාව වැඩි දුරටත් සදහන් කරයි.

වර්තමාන පාලනය යටතේ මාස හයක කාලයක් තුළ බ්‍රිගේඩියර් ප්‍රියංක ප්‍රනාන්දු ට ඉහල පදවියක් ලබා දුන් තෙවැනි අවස්ථාව මෙයයි.

මෙවර ඔහු උසස් වීම් ලැබ ඇත්තේ හමුදා නිලයේය.

පසුගිය දෙසැම්බරයේ දී ඔහු ශ්‍රී ලංකා යුද්ධ හමුදාවේ ඉඩම්, දේපළ සහ භට නිවාස ඒකකයේ අධ්‍යක්ෂ ලෙස පත් කර තිබු අතර 2020 මාර්තු මස 04 වැනි දින පුත්තලම, සිංහවිල්ලුවත්ත හි ස්ථාපිත 58 වන සේනාංකයේ 15 වන සේනාංකාධිපති ලෙස වැඩ භාර ගෙන තිබුනි.

යුද අපරාධ සම්බන්ධයෙන් ජාත්‍යන්තර පරීක්ෂණයක් ඉල්ලා ලන්ඩනයේ විරෝධතාවක් පැවැත්වූ දෙමළ උද්ඝෝෂකයන්ට මරණ තර්ජනයක් කරමින් තමන්ගේ උගුර හරහා කිහිප වරක් ඇඟිලි යවමින් බෙල්ල කැපීමේ සංඥාවක් කළ එවකට ආරක්ෂක කටයුතු පිළිබඳ අමාත්‍ය උපදේශක ප්‍රියංක ප්‍රනාන්දු වරදකරු කළ වෙස්ට්මිනිස්ටර් මහේස්ත්‍රාත් අධිකරණය ඔහුට පවුම් හාරදහසකට අධික දඩයක් නියම කර තිබුනි.

හමුදා ලේකම් කාර්යාලය මැයි 18 සඳුදා දින සන්ධ්‍යාවේ නිකුත් කළ නිවේදනයක සඳහන් ව ඇති පරිදි බ්‍රිගේඩියර් නිලයේ සිටි 5 දෙනකු මේජර් ජෙනරාල් නිලය දක්වාත්, ශ්‍රී ලංකා යුද්ධ හමුදා ස්වේච්ඡා බලසේනාවේ කර්නල් නිලයේ සිටි 4 දෙනකු බ්‍රිගේඩියර් නිලය දක්වාත්, මේජර් නිලයේ සිටි 9 දෙනකු ලුතිනන් කර්නල් නිලය දක්වාත්, කපිතන් නිලයේ සිටි 69 දෙනෙකු මේජර් නිලය දක්වාත් දෙවන ලුතිනන් නිලයේ සිටි 60 දෙනකු ලුතිනන් නිලය දක්වාත් නිල උසස් කර තිබේ.

මේජර් ජෙනරාල් සහ බ්‍රිගේඩියර් නිලයට උසස්වීම් ලැබු ජ්‍යෙෂ්ඨ නිලධාරීන් පහත වේ.

මේජර් ජෙනරාල් සී.යු. මාරසිංහ ආර්.එස්.පී යු.එස්.පී

මේජර් ජෙනරාල් ටී.ජේ. කොඩිතුවක්කු ආර්.ඩබ්ලිව්.පී. ආර්.එස්.පී. එන්ඩියු

මේජර් ජෙනරාල් එච්.පී. රණසිංහ ආර්.ඩබ්ලිව්.පී. ආර්.එස්පී. එන්ඩියු

මේජර් ජෙනරාල් ඒ.පී.අයි. ප්‍රනාන්දු ආර්.ඩබ්ලිව්.පී. යු.එස්.පී

මේජර් ජෙනරාල් සී.ඩි. වීරසුරිය ආර්.ඩබ්ලිව්.පී ආර්.එස්පී. එන්ඩියු

බ්‍රිගේඩියර් එස්.එන්. සමරවික්‍රම

බ්‍රිගේඩියර් එච්.එම්.එන්.බි හේරත්

බ්‍රිගේඩියර් එන්.ජි.එස්. තිලකරත්න

බ්‍රිගේඩියර් කේ.එන්. පෙරේරා

මේ සමගම ශ්‍රී ලංකා යුද හමුදාවේ පහල නිලධාරීන් 14,617 කගේ නිල උසස් කරන බවද රජය විසින් දැනුම් දී තිබේ.

Facebook Comments

wedding people