වසර 12ක සේවා කාලය අවසන් නොකර ස්ව කැමැත්තෙන් වන්දි ලබා විශ්රාම ලැබූ ආබාධිත රණවිරුවන්ට නියමිත විශ්රාම වැටුප් ලබා දෙන ලෙස ඉල්ලා එම සෙබලුන් අද ජනාධිපති ලේකම් කාර්යාලය වටලමින් තම ගැටලුවට විසඳුම් ලබා දෙන ලෙස බල කර සිටියා.
කොළඔ ගෝල්ෆේස් පිටියෙන් මෙම විරෝධතා පා ගමන ආරම්භ වු අතර එය ජනාධිපති ලේකම් කාර්යාලයට ඇතුල්වීමට ගත් උත්සාහය නැවැත්වීමට පොලිසිය ජල හා කඳුළු ගැස් ප්‍රහාර එල්ල කරනු ලැබුවා.
වාරණ ඉල්ලීම ප්‍රතික්‍ෂේපයි
ආබාධිත සෙබලුන්ගේ විරෝධතා පා ගමන අත්හිටුවන්න ලෙස වාරණ නියෝගයක් ඉල්ලා පොලීසිය අද පෙරවරුවේ කළ ඉල්ලීමක් කොළඹ කොටුව ප්‍රධාන මහේස්ත්‍රාත් ලංකා ජයරත්න විසින් ප්රතික්ෂේප කරනු ලැබිය.
එම ඉල්ලීම ප්රතික්ෂේප කරමින් විනිසුරුවරිය පෙන්වා දී ඇත්තේ වාරණ නියෝගයක් නිකුත් කිරීමේ අවශ්‍යතාවක් නොමැති බවත් විරෝධතා පා ගමන හේතුවෙන් මහජනතාවට හිරිහැරයක් සිදුවන්නේ නම් ඒ සම්බන්ධයෙන් පොලීසිය වගබලා ගතයුතු බවත්ය.
සාකච්ඡා සාර්ථකයි
ජනාධිපති ලේකම් කාර්යාල පරිශ්‍රයට ඇතුළු වූ ආබාධිත හමුදා සාමාජිකයන් අතරින් කිහිප දෙනකුට ජනාධිපති ලේකම්වරයෙකු සමඟ සාකච්ඡා කිරීමට අවස්ථාව ලැබු අතර ඔවුන් පවසා සිටියේ පෙබරවාරියේ සිට තම ඉල්ලීම් ලබා දීමට ජනාධිපති ලේකම් කාර්යාල නිලධාරීන් එකඟ වූ බවයි.
විරෝධතාවයේ නිරත වූ ආබාධිත රණවිරුවන්ගේ නියෝජිතයින් සමඟ පැවති සාකච්ඡාවේදී ආරක්ෂක ලේකම්වරයා විසින් මෙය ලිඛිතව ලබා දී තිබෙනවා.
ජනාධිපති මාධ්‍ය අංශය සඳහන් කළේ මෙම සේවා විශ්රාම වැටුප ලබාදීම සම්බන්ධයෙන් විශේෂ කැබිනට් පත‍්‍රිකාවක්ද ජනාධිපතිවරයා විසින් ඉදිරිපත් කර තිබෙන බවයි.
Facebook Comments
