භාරත ලක්ෂ්මන් ප්‍රේමචන්ද්‍ර ඝාතනයට වැරදි කරුවන් කරමින් කොළඹ මහාධිකරණය විසින් හිටපු පාර්ලිමේන්තු මන්ත්‍රී ආර් දුමින්ද සිල්වා ඇතුළු විත්තිකරුවන් තිදෙනකුට මහාධිකරණයෙන් නියම කළ මරණ දඬුවම ශ්‍රේෂ්ඨාධිකරණය තහවුරු කර තිබේ.
මරණ දඬුවම නියම වී සිටි අනුර තුෂාර ද මෙල් පැනවූ මරණ දඬුවම පමණක් ඉවත් කර ඔහු මුදා හැරීමට 11 බුහස්පතින්දා ශ්‍රේෂ්ඨාධිකරණය තීරණය කළේය.
ඒ අනුව විත්තිකාර දුමින්ද සිල්වා, චමින්ද රවී ජයනාත් සහ සරත් බණ්ඩාර යන අයවලුන්ට ලබා දුන් දඬුවම මෙසේ තහවුරු වු අතර මරණ දඬුවම නියම වූ සිව්දෙනාගෙන් ප්රියන්ත ජානක බණ්ඩාර තවමත් අතුරුදන් වී ඇති බවයි වාර්තා වන්නේ.
භාරත ලක්ෂ්මන් ප්‍රේමචන්ද්‍ර ඝාතනයට හිටපු මන්ත්‍රී දුමින්ද සිල්වා ඇතුළු පස්දෙනකු අදාළ චෝදනාවට වැරදි කරුවන් බව කොළඹ මහාධිකරණය 2016 සැප්තැම්බර් 08 වනදා තීන්දු කරන ලදී.
කෙසේ වෙතත් එම තීන්දුව අභියෝගයට පත් කරමින් එම වසරේ සැප්තැම්බර් 22 වනදා ශ්‍රේෂ්ඨාධිකරණයට ඇපෑලක් ඉදිරිපත් කෙරුණි.
විත්තිකාර පාර්ශ්වය සහ පැමිණිලි පාර්ශ්වය දින හයක් පුරා පැවැත්වූ දීර්ඝ දේශනවලින් පසුව අගවිනිසුරු ප‍්‍රියසාද් ඩෙප් ,බුවනෙක අළුවිහාරේ ,නලින් පෙරේරා , ප්රියන්ත ජයවර්ධන සහ විජිත් මළල්ගොඩ ඇතුළු පංච පුද්ගල විනිසුරු මඩුල්ල තීන්දුව ප්‍රකාශයට පත් කළේය.
2011 වර්ෂයේ ඔක්තොම්බර් මස 8 වන දින මුල්ලේරියාව ප්‍රදේශයෙදී හිටපු පාර්ලිමේන්තු මන්ත්‍රීවරයෙකු හා ජනපතිගේ වෘත්තීය සමිති කටයුතු උපදේශකවරයෙකු ද වූ භාරත ලක්ෂ්මන් ප්‍රේමචන්ද්‍ර වෙඩි තබා ඝාතනය කිරීම සම්බන්ධයෙන් ඔවුන් මෙසේ වරදකරුවන් විය.
Facebook Comments
