සංවර්ධන ලොතරැයි මණ්ඩලය සහ ජාතික ලොතරැයි මණ්ඩලය විදේශ අමාත්‍යශය යටතට පත් කිරීම අභියෝගයට ලක් කරමින් ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනු කර තිබේ.
පාර්ලිමේන්තු මන්ත්‍රී බන්දුල ගුණවර්ධන විසින් අදාළ පෙත්සම ඉදිරිපත් කළ බවයි සිලෝන් ජර්නල්ස් වාර්තාකරු පවසන්නේ.
මෙම පෙත්සමේ වග උත්තරකරුවන් ලෙස අග්‍රාමාත්‍ය රනිල් වික්‍රමසිංහ, විදේශ අමාත්‍ය රවී කරුණානායක, මුදල් අමාත්‍ය මංගල සමරවීර යන ඇමතිවරුන් නම් කර ඇති බව කියැවෙයි.
මෑතකදී සිදුකළ කැබිනට් මණ්ඩල සංශෝධනයේදී ජාතික ලොතරැයි මණ්ඩලය හා සංවර්ධන ලොතරැයි මණ්ඩලය විදේශ කටයුතු අමාත්‍යංශයට විෂය ක්ෂේත්‍රය යටතට පත් කිරීමට ජනාධිපතිවරයා විසින් කටයුතු කර ඇති නමුත් එය පැවතිය යුත්තේ මුදල් අමාත්‍යංශය යටතේ බව පෙත්සම්කරු පෙන්වා දෙයි.
මෙම මණ්ඩල දෙකම පිහිටුවා ඇත්තේ පාර්ලිමේන්තුවේ විශේෂ පනතකින් බව පෙන්වා දෙන පෙත්සම්කාර මන්ත්‍රීවරයා, එය මුදල් අමාතංශය යටතේ ස්ථාපිතව පැවතිය යුතු බව අවධාරණය කර තිබේ.
ඒ අනුව එම මණ්ඩලයන් විදේශ අමාත්‍යංශයට පැවරීමට ගෙන ඇති තීරණය ව්‍යවස්ථා විරෝධී සහ නීති විරෝධී බව ප්‍රකාශයට පත්කරන ලෙස පෙත්සම්කාර මන්ත්‍රී බන්දුල ගුණවර්ධන ශ්‍රේෂ්ඨාධිකරණයෙන් ඉල්ලා තිබේ.
Facebook Comments
