අයවැයෙන් “අතුරුදහන් අයගේ පවුල් නොතකා හැරලා”

0

රජය විසින් ලබන වසර සදහා ඉදිරිපත් කළ අයවැය යෝජනාව මගින් අතුරුදහන් වු පවුල් නොසලකා හැරීම සම්බන්ධයෙන් අතුරුදහන්කරවීම් වලට එරෙහිව හඩ නගන දකුණේ සංවිධානයක කනස්සල්ල පළ වී තිබේ.

මුදල් අමාත්‍ය සහ අග්‍රාමාත්‍ය මහින්ද රාජපක්ෂ වෙත ලිපියක් යොමු කරමින් අතුරුදහන්වුවන්ගේ පවුල් එකතුව පෙන්වා දෙන්නේ අතුරුදහන්වුවන් වෙනුවෙන් මිලියන 500 ක මුදලක් පසුගිය රජය විසින් වෙන්කර තිබියදීත්, මෙවර අයවැය යෝජනාවෙන් අතුරුදහන්වුවන් වෙනුවෙන් කිසිදු සඳහනක් නොවීම කණගාටුවට කරුණක් බවයි.

මහින්ද රාජපක්ෂ අග්‍රාමාත්‍යවරයා විසින් මෙලෙස නොසලකා ඇත්තේ 1989 වසරේදී පාර්ලිමේන්තු මන්ත්‍රීවරයකු ලෙස ඔහු විසින්ම නායකත්වය ගෙන අතුරුදහන්වීම්වලට විරුද්ධව ගොඩනගන ලද “මව් පෙරමුණ” සංවිධානය කරන ලද ක්‍රියාකාරකම්වලට සහභාගී වු මරණ සහතික හිමි අතුරුදහන් පවුල් වල බහුතරය බවයි අතුරුදහන්වුවන්ගේ පවුල් එකතුව පවසන්නේ.

එම සංවිධානයේ සභාපති ජ්‍යෙෂ්ඨ මානව හිමිකම් ක්‍රියාධර කේ.ජේ. බ්‍රිටෝ ප්‍රනාන්දුගේ අතිසනින් යුතුව පාර්ලිමේන්තු නියෝජිතයන් 15 දෙනෙකුට හා පාර්ලිමේන්තුව නියෝජනය කරන දේශපාලන පක්ෂ 12 ක් වෙත පිටපත් යොමු කර තිබෙන එම ලිපිය අවධාරණය කරන්නේ පසුගිය රජය විසින් “දක්නට නොමැති බවට වු සහතිකය” හිමි අතුරුදහන් අයගේ පවුල් සාමාජිකයන්ට රුපියල් 6000 ක මාසික අතුරුදීමනාව ලබාදීම සදහා 2019 අප්‍රේල් මස ඉදිරිපත් කළ අයවැයේදී රුපියල් මිලියන 500 ක් වෙන් කළ බවයි.

දක්නට නොමැති බවට වු සහතිකය හිමි අයට එම මුදල ගෙවීම 2019 වසරේ සැප්තැම්බර් 18 දින අමාත්‍ය මණ්ඩලය විසින් අනුමත කළ බවත් මානව හිමිකම් ක්‍රියාධරයා සිහිපත් කරයි.

2019 වසරේ දෙසැම්බර් 31 දක්වා පවුල් 153 කට මෙම දීමනාව ( රුපියල් මිලියන 11 ක් ) ගෙවා ඇති බව පෙන්වා දෙන බ්‍රිටෝ ප්‍රනාන්දු අගමැතිවරයාට දන්වා ඇත්තේ “දක්නට නොමැති බවට වු සහතිකය හිමි” අයගෙන් ස්වල්ප දෙනකුට මෙම ගෙවීම සිදු කර ඇති අතර මරණ සහතික හිමි කිසිවෙකුට එම දීමනාව ගෙවා නොමැති බවයි.

අතුරුදහන්වුවන්ගේ පවුල්වලට 2010 අංක 10 දරණ මරණ ලියාපදිංචි කිරීමේ තාවකාලික විධිවිධාන පනතෙහි 2 වන වගන්තිය යටතේ නිකුත් කර ඇති මරණ සහතිකවල, මරණයට හේතුව අතුරුදහන් කරවීම යන අර්ථය ගෙන දෙන්නේනම් එම පවුල්වලටද රුපියල් 6000 ක මාසික දීමනාව ලබා දීමට 2019 ඔක්තෝබර් 18 දිනැති අමාත්‍ය මණ්ඩල අනුමැතිය හිමිව තිබු බවයි බ්‍රිටෝ ප්‍රනාන්දු පවසන්නේ.

අතුරුදහන් වු පවුල්වල සාමාජිකයන් 1200 ක් පමණ පා ගමනින් පැමිණ මේ වසරේ ආදරවන්තයන්ගේ (පෙබරවාරි 14) දිනයේදී මෙම මාසික දීමනාව ලබා දෙන ලෙස ඉල්ලීම ඇතුලත් පෙත්සම අග්‍රාමාත්‍ය කාර්යාලයට සහ ජනාධිපති කාර්යාලයට භාර දුන් බව සිහිගන්වන මානව හිමිකම් ක්‍රියාධර බ්‍රිටෝ ප්‍රනාන්දු සිය ලිපිය මගින් තව දුරටත් අවධාරණය කර ඇත්තේ අග්‍රාමාත්‍ය කාර්යාලයට ලබාදුන් පෙත්සම අධිකරණ අමාත්‍යාංශයට යොමු කර තිබීම නිසා අධිකරණ අමාත්‍යාංශය සහ සිය සංවිධානය සමග ලිපි හා දුරකථන ඇමතුම් මගින් යම් ගනුදෙනුවක් සිදු කළ නමුත් ප්‍රතිළුලයක් නොලැබුන බවයි.

පෙබරවාරි 14 දින පෙත්සම භාර දීමට පැමිණි අවස්ථාවේ අගමැති විශේෂ නියෝජිතයා ලෙස සහභාගී වු අමාත්‍ය ගාමිණි ලොකුගේ අතුරුදහන්වුවන්ට සාධාරණය ඉටු කිරීමට රජය සියලු දේ සිදු කරන බව පැවසු අයුරුද බ්‍රිටෝ ප්‍රනාන්දු අගමැතිවරයාට යොමු කළ ලිපියේ සටහන් කර තිබේ.

මහින්ද රාජපක්ෂ අතුරුදහන්වුවන් වෙනුවෙන් 1989 භිෂණ සමයේ මැදිහත්වීම සහ දායකත්වයන් දැක්වු අයෙක් ලෙස සදහන් කරන මානව හිමිකම් ක්‍රියාධරයා අවධාරණය කරන්නේ මේ මොහොතේ මුදල් ඇමති ලෙස අතුරුදහන්වුවන්ට අවශ්‍ය ප්‍රතිපාදන වෙන් කිරීමට ඔහු කිසිදු පියවරක් නොගැනීම මහින්ද රාජලක්ෂ 89 යුගයේ දී පෙනී සිටි කරුණුවලට පිටුපෑමක් බවයි.

” අවසාන වශයෙන් අප ඉල්ලා සිටින්නේ යම් කාලවකවානුවක ඔබ දකුණේ පෙනී සිටි අතුරුදහන් පවුල්වල ජනතාව වෙනුවෙන් යම් මෙහෙවරක් කිරීමට ඔබට අතිශයින් අවස්ථාව තිබියදී මග නොහරින ලෙසයි. ”

සිංහල, දෙමළ භේදයකින් තොරව අතුරුදහන්වුවන්ගේ සියලුම පවුල්වලට පොරොන්දු වු මෙම දීමනාව ලබාදීමට අවශ්‍ය ප්‍රතිපාදන වෙන් කිරීමට ක්‍රියා කරන ලෙස අතුරුදහන්වුවන්ගේ පවුල් එකතුව අගමැතිවරයාගෙන් තව දුරටත් ඉල්ලා තිබේ.

Facebook Comments