ප්‍රදේශයේ පොලිස් ස්ථානාධිපති ලෙස තමන් පෞද්ගලිකව දන්නා හදුනන අයෙක් පත් කර ගැනීම සදහා බණ්ඩාරවෙල ප්‍රදේශිය සභාවේ සභාපති හිමියන් මුදල් අමාත්‍යවරයාගේ සහාය ඉල්ලා තිබේ.
“බණ්ඩාරවෙල පොලිස් ස්ථානයේ පුරප්පාඩුව පවතින මුලස්ථාන පොලිස් පරීක්ෂක තනතුරට පත් කිරීම සදහා කරනු ලබන ඉල්ලීම” මැයෙන් මුදල් අමාත්‍ය බැසිල් රාජපක්ෂ වෙත ලිපියක් යොමු කරමින් එම ඉල්ලිම සිදු කර ඇත්තේ බණ්ඩාරවෙල ප්‍රදේශිය සභාවේ සභාපති කරගහවෙල නන්දවිමල හිමියන් විසිනි.
මේ වන විටත් ඉහත තනතුර සදහා හපුතලේ පොලිස් ස්ථානාධිපති ලෙස සේවය කරන සාගර රොහාන් දයාරත්න පත් කිරීම සුදුසු බව සභාපති හිමියන් මුදල් අමාත්‍යවරයාට යෝජනා කර තිබේ.
එම ලිපියේ වැඩි දුරටත් අවධාරණය කර ඇත්තේ එම නිලධාරියා තමන් පෞද්ගලිකව දන්නා හදුනන අයෙක් බවයි.
“එමෙන්ම මෙම නිලධාරියා ඉතා දක්ෂ, පලපුරුදු, අවංක නිලධාරියෙකු බවත්, මා විසින් පෞද්ගලිකව දන්නා හදුනන අයෙකු බවද වැඩි දුරටත් සදහන් කරමි.”
ඔක්තෝබර් 11 වැනි දින යොමු කර තිබෙන එම ලිපියේ දැක්වෙන පරිදි බණ්ඩාරවෙල පොලිස් මුලස්ථානයේ ස්ථානාධිපති උසස් වීමක් ලැබ ස්ථාන මාරුවීම් ලබා ඇති බැවින් එම තනතුර පුරප්පාඩුව පවති.
දැනට සීග්‍ර නාගරීකරණයත් සමග බණ්ඩාරවෙල ප්‍රාදේශිය ලේකම් කොට්ඨාසය තුළ දිනෙන් දින සමාජ ව්‍යවසනකාරී තත්වයන් ඉහල යමින් පවතින වකවානුවක එම ගැටුම්කාරී තත්වයන් සමනය කර ගනිමින් සාමකාමී නිදහස් පාරිසරික වටපිටාවක් ජනතාව වෙත නිරන්තරයෙන් උරුමකර දීම දේශපාලන නියෝජිතවරුන් වශයෙන් ඒකායන අරමුණ බවයි ශ්‍රී ලංකා පොදු ජන පෙරමුනේ බණ්ඩාරවෙල ආසන කැදවුම්කරු ද වන කරගහවෙල නන්දවිමල හිමියන් පවසන්නේ.
බණ්ඩාරවෙල ප්‍රදේශිය සභාවේ සභාපති කරගහවෙල නන්දවිමල හිමියන් බැසිල් රාජපක්ෂ අමාත්‍යවරයාගෙන් වැඩි දුරටත් ඉල්ලා ඇත්තේ එම නිලධාරියාගේ පත් කිරීමට අදාල ඉදිරි කටයුතු සිදු කරන ලෙසයි.
“බණ්ඩාරවෙල ප්‍රාදේශිය ලේකම් කොට්ඨාසයේ සාමය හා ආරක්ෂාව වැඩිදුරටත් තහවුරු කරලීම පිණිස මාගේ ඉහත ඉල්ලීම සම්බන්ධයෙන් ඔබතුමාගේ කාරුණික අවධානය යොමු කර අදාල නිලධාරියාගේ පත් කිරීමට අදාල ඉදිරි කටයුතු සිදු කරන සෙන් කාරුණිකව ඉල්ලා සිටිමි.”
Facebook Comments
