බුද්ධි අංශ නිලධාරීන් ගැන සැක පහල කරමින් CIDයට පැමිණිල්ලක්

0

මිනිස් ජීවිත දෙසිය පනහකට අධික ප්‍රමාණයක් විනාශ කිරීමට හේතු වු පාස්කු ප්‍රහාරය සම්බන්ධයෙන් සමාජ මාධ්‍ය ඇතුළු ජනමාධ්‍ය විසින් අලුතින් හෙළි  කර  තිබෙන  කරුණු ඔස්සේ  විධිමත් විමර්ශනයක් ඉල්ලා නීතිඥ කණ්ඩායමකින් සැදුම්ලත් සංවිධානයක්  රහස් පොලිසියට පැමිණිල්ලක් කර තිබේ.

මැයි මස 5 බදාදා අපරාධ පරීක්ෂණ දෙපාර්තමේතුවේ අධ්‍යක්ෂ වෙත යොමු කළ පැමිණිල්ල මගින්  ජනතා නීතිඥයෝ සංවිධානය පෙන්වා දී ඇත්තේ පාස්කු ප්‍රහාරය සම්බන්ධයෙන් අලුතෙන් අනාවරණය වී ඇති කරුණු අනුව යුද හමුදා බුද්ධි අංශ නිලධාරීන් සම්බන්ධයෙන්ද සැක එල්ල වන ආකාරයයි.

ජාතික පුවත්පතක සහ වෙබ් අඩවියක්  ඒ සම්බන්ධයෙන් වාර්තා කර තිබෙන  තොරතුරුද  ද නීතිඥ කණ්ඩායම අපරාධ පරීක්ෂණ දෙපාර්තමේන්තුව වෙත යොමු කළ පැමිණිල්ලේ සටහන් කර තිබේ.

2021.04.11 වන දින දිවයින E -paper වෙබ් අඩවිය මගින් කීර්ති වර්ණකුලසුරිය යන අය විසින්     “සංහිදියාව අහෝසි පාස්කු මහ මොළකරු හෙලිවේ … හමුදා කපිතාන්ගේ ඉස්ලාමීය සංවිධාන දෙකක් ලියාපදිංචි කිරීමේ උත්සාහය …” යන ශීර්ෂය යටතේ එකී පාස්කු ප්‍රහාරය සම්බන්ධයෙන් වගකිව යුතු මහ මොළකරු හා ඊට සම්බන්ධව කටයුතු කළ කපිතාන්වරයකු ලෙසින් ත්‍රිකුණාමලයේ කින්නියා හී යු.සී.පාරේ අංක 42 දරණ ස්ථානයේ පිහිටි අල් හික්මා ෆවුන්ඩේෂන් සහ කොල්ලුපිටියේ ගාලු පාරේ අංක 107 හි ඇති සරාස් ෆවුන්ඩේෂන් නැමැති ඉස්ලාම් සංවිධාන දෙකක් සම්බන්ධයෙන් හා ඒවා ලියාපදිංචි කිරීම සිදු කිරීම සම්බන්ධයෙන් කරුණු ගණනාවක් පළ කර ඇති බවයි ජනතා නීතිඥයෝ සංවිධානය පවසන්නේ.

මෙම රාජ්‍ය නොවන සංවිධාන සහ හමුදා බුද්ධි අංශ කපිතාන්වරයා යැයි සදහන් කරනු ලබන තැනැත්තා සහ ඊට අදාල වෙනත් කරුණු ගණනාවක් එම ලිපියෙහි සඳහන් කර ඇති බව එහි වැඩි දුරටත් සඳහන්ය.

පාස්කු ප්‍රහාරය සම්බන්ධයෙන් සැක කටයුතු බුද්ධි අංශ නිලධාරියකු ගැන නමක් සඳහන් නොකර විපක්ෂ මන්ත්‍රී හරීන් ප්‍රනාන්දු විසින්ද කරුණු දක්වා තිබුණි.

ඔහු විසින් පාර්ලිමේන්තුවේදී ප්‍රකාශ කර තිබුණේ එම බුද්ධි අංශ නිලධාරියා පොලිස් අත්අඩංගුවට ගෙන විමර්ශන කටයුතු සඳහා අපරාධ පරීක්ෂණ දෙපාර්තමේන්තුවට යොමු කිරීමට ගත් උත්සාහයේදී හමුදාවේ පිරිසක් පැමිණ මෙය “හමුදාවේ ප්‍රොජෙක්ට් එකක්” යැයි පවසා ඔහු ආපසු රැගෙන ගොස් ඇති බවයි.

තවද 2021.05.01 වන දින ප්‍රදීප් ඒකනායක යන අයගේ මුහුණු පොතේ හමුදාපතිවරයා සහ කාදිනල්තුමා ආමන්ත්‍රණය කරමින් ලියන ලද සටහනක  “අල් හික්මා”  සහ “සහරාස් ” පදනමේ සංවිධාන ලියාපදිංචිය සදහා රාජ්‍ය නොවන සංවිධාන ලියාපදිංචි කිරීමේ කාර්යාලයට පැමිණ ඇත්තේ ජාතික බුද්ධි ප්‍රධානී කාර්යාලයේ සේවය කරන්නේ යැයි කියන යුද හමුදා බුද්ධි අංශයේ ජනිත අඹගල නැමැති හමුදා කපිතාන්වරයා බවට සඳහන් කරමින් ඔහුගේ ඡායාරූප සහිතව ප්‍රකාශයක් පළ කොට ඇති බවද නීතිඥ කණ්ඩායම අපරාධ පරීක්ෂණ දෙපාර්තමේන්තුවේ අවධානයට යොමු කර තිබේ.

එම තැනැත්තාගේ බිරිද ලෙසට සදහන් කරන කොතලාවල ආරක්ෂක විද්‍යා පීඨයේ කථිකාචාර්යවරියක වන සාරා සිල්වා නොහොත් සාරා අඹගල යන අය හා ඇයගේ පවුලේ ඥාතීන් සහ ඊට අදාල සම්බන්ධතාද එහි තවදුරටත් සදහන් බව නීතිඥ කණ්ඩායම අපරාධ පරීක්ෂණ දෙපාර්තමේන්තුවට දැනුම් දී තිබේ.

“තවද මෙහි පාස්කු ප්‍රහාරය සම්බන්ධයෙන් සියලු සැලසුම් යුද හමුදා බුද්ධි අංශ විසින් සැලසුම් කරන ලද බවට හෙලිකරමින් ප්‍රබල සාක්ෂියක් යනුවෙන් එකී මුහුණු පොතේ සදහන් කර ඇත.”

තවද “ලංකා දවස” වෙබ් අඩවියේ 2021.05.03 වන දින මෙහි පෙර කී දැන්වීම පළ කරමින් වැඩිදුරටත් එහි කතෘ  සටහනේ දක්වා ඇත්තේ ඔවුන් සතුව ඇති සෙසු සියලුම සාක්ෂි සමග ඒ වෙනුවෙන් ඔවුන් ඉදිරිපත් වීමට සුදානමින් සිටින බවයි.

එසේම එකී වෙබ් අඩවියේම 2021 මැයි මස 03 වන දින “රාජ්‍ය බුද්ධි ( SIS) අධ්‍යක්ෂක ජෙනරාල් සලේගේ වුවමනාවට නැගෙනහිරින් මුස්ලිම් තරුණයන් 50 ක් බදවා ගෙන තවත් ප්‍රහාරයක සැලසුමක් දැයි සැකයක්?” ලෙස “හෙලිදරව්ව 2” යනුවෙන් විස්තරයක් පළ කර ඇති බවත් ජනතා නීතිඥයෝ සංවිධානය පෙන්වා දෙයි.

එහි සඳහන් වන්නේ රාජ්‍ය බුද්ධි අංශ ප්‍රධානී මේජර් ජෙනරාල් සුරේෂ් තුවාන් සලේ ගැනයි.

මෙකී සියලු කරුණු සැලකිල්ලට ගෙන වගකිව යුතු තැනැත්තන් නීතිය හමුවට පැමිණවීමටත් වින්දිතයන්ට සාධාරණය ඉටු කර ගැනීමටත් හැකි වන ආකාරයට පුර්ණ විමර්ශනයක් සිදු කරන ලෙස නීතිඥ කණ්ඩායම අපරාධ පරීක්ෂණ දෙපාර්තමේතුවෙන් ඉල්ලා තිබේ.

ජනතා නීතිඥයෝ සංවිධානය  වෙනුවෙන් නීතිඥ සේනක පෙරේරා, නීතිඥ අචලා සෙනෙවිරත්න, නීතිඥ මංජු ශ්‍රී චන්ද්‍රසේන, නීතිඥ උපාලි රත්නායක, නීතිඥ තම්බයියා ජෙයරත්න රාජා, නීතිඥ නාමල් රාජපක්ෂ, නීතිඥ අරුණි ධනපාලආරච්චි මෙම පැමිණිල්ල යොමු කර ඇත.

දේවස්ථාන සහ සංචාරක හෝටල් කිහිපයක් ඉලක්ක කර ගනිමින්  2019 අප්‍රේල් මස 21 වන දින එල්ල කළ  මරාගෙන මැරෙන බෝම්බ ප්‍රහාර මාලාව නිසා 250 කට අධික සාමාන්‍ය වැසියන් සංඛ්‍යාවක් මිය ගිය අතර තුවාල ලැබූ සංඛ්‍යාව 500කට අධිකය.

Facebook Comments