මෝටර් රථයකින් මහමඟ ගමන් කරමින් සිටි පුද්ගලයකු නවතා උසස් පොලිස් නිලධාරියෙක් ඔහුට පහර දෙනු දැක්වෙන වීඩියෝවක් සමාජ මාධ්‍ය තුල වේගයෙන් සංසරණය වෙමින් පවතී.
පහර දීම සම්බන්ධයෙන් චෝදනාව එල්ල වී ඇත්තේ ජ්‍යෙෂ්ඨ නියෝජ්‍ය පොලිස්පති රන්මල් කොඩිතුවක්කු වෙතයි.
ජනමාධ්‍ය වාර්තා කර ඇත්තේ රත්නපුර කිරිඇල්ල මාර්ගයේ දී මෙම පහරදීම සිදුව ඇති බවයි.
මෝටර් රථය අධික වේගයෙන් පැමිණි බව පවසමින් මෝටර් රථය අතරමග නවතා එහි සිටි පුද්ගලයාට පහර දෙමින් ඔහු පොලිස් ජිප් රථයේ නංවාගෙන රැගෙන යාමට උසස් පොලිස් නිලධාරියා සහ තවත් පොලිස් නිලධාරීන් දෙදෙනෙක් උත්සාහ දරන ආකාරය වීඩියෝ ගත වී තිබේ.
පොලිස් අත්අඩංගුවට පත් එම පුද්ගලයා චෝදනා කරන්නේ උසස් පොලිස් නිලධාරියා බීමතින් සිටි බවටයි.
පොලිස් මාධ්‍ය ප්‍රකාශක, ජ්‍යෙෂ්ඨ පොලිස් අධිකාරී නිහාල් තල්දූව පවසන්නේ අපකීර්තිමත් ලෙස හැසිරුණු ජ්‍යෙෂ්ඨ පොලිස් නිලධාරියා සම්බන්ධයෙන් පොලිසිය පුළුල් විමර්ශනයක් ආරම්භ කර ඇති බවයි.
අදාළ සිද්ධිය පොලිස් දෙපාර්තමේන්තුවේ කීර්තිනාමයට බරපතළ හානියක් ඇතිකරන අතර මෙම ජ්‍යෙෂ්ඨ නිලධාරියාගේ අපකීර්තිමත් හැසිරීම කිසිසේත් අනුමත නොකරන බව නිවේදනයක් නිකුත් කරමින් පොලිස් මාධ්‍ය ප්‍රකාශක සඳහන් කර තිබේ.
පුද්ගලයන් අත්අඩංගුවට ගැනිමේදී මෙන්ම පොලිස් අත්අඩංගුවේදී වධ හිංසාවට ලක් කිරීම සම්බන්ධයෙන් ශ්‍රී ලංකා පොලීසියට දිගින් දිගටම චෝදනා එල්ල වෙමින් පවතී.
නැගෙනහිර පළාතේ දෙමළ තරුණයන් දෙදෙනකුට නිල ඇදුමින් සැරසී සිටින පොලිස් නිලධාරියෙක් අමානුෂික ලෙස පහර දෙනු දැක්වෙන වීඩියෝවක් ද ඔක්තෝබර් 22 වැනි සිකුරාදා සමාජ මාධ්‍ය තුල වේගයෙන් සංසරණය වී තිබුනි.
එම පහරදීම සිදු කර තිබුනේ එරාවුර් පොලීසියේ සේවයේ නියුතු 61169 අංකය පැළඳි රථවාහන අංශයේ පොලිස් කොස්තාපල් ඇම්. ජයසුරියයි.
Facebook Comments
