සමාජ මාධ්‍ය ඔස්සේ සංසරණය වන ඇතැම් තොරතුරු ජාතික ආරක්ෂාවට හානිකර ‘සාම්ප්‍රදායික නොවන තර්ජන’ ලෙස ආරක්ෂක අමාත්‍යාංශය විසින් හදුනාගෙන තිබේ.
“ලංකාවට විතරක් ආවේනික ප්‍රශ්නයක් නෙමෙයි. මේක ඇවිල්ලා අපි කියනවා අර සාම්ප්‍රදායික නොවන තර්ජන ගණයට අයත් වන මාතෘකාවක්, වැරදි ඉන්ෆොමේෂන්. මිස් ඉන්ෆොමේෂන්, ඩිස් ඉන්ෆොමේෂන්.”
ආරක්ෂක අමාත්‍යාංශයේ මාධ්‍ය අධ්‍යක්‍ෂ සහ මාධ්‍ය ප්‍රකාශක කර්නල් නලින් හේරත් ඒ බව සදහන් කළේ දිවයින පුරා පිහිටි බෞද්ධ වෙහෙර විහාර ඇතුළු ආගමික සිද්ධස්ථාන වල ආරක්ෂාව විධිමත්ව පවත්වාගෙන යාම සඳහා අනුයුක්ත කොට ඇති ත්‍රිවිධ හමුදා සාමාජිකයන් ඉවත්කර ගැනීමට රජය තීරණය කොට ඇති බවට ඇතැම් සමාජ මාධ්‍ය ජාලා වල පැතිර යන තොරතුරු සම්බන්ධයෙන් නොවැම්බර් 3 වැනි දින ආරක්ෂක අමාත්‍යංශ පරිශ්‍රයේදී විශේෂ මාධ්‍ය සාකච්ජාවක් පවත්වමිනි.
බෞද්ධ පන්සල් හෝ වෙනත් පූජනීය ස්ථානවල ආරක්ෂක රාජකාරි සඳහා අනුයුක්ත කර සිටින සන්නද්ධ හමුදා සාමාජිකයන් ඉවත් කිරීමට රජය විසින් කිසිදු තීරණයක් ගෙන නොමැති බව පැවසු ඔහු අවධාරණය කලේ ත්‍රිවිධ හමුදා සාමාජිකයන් ඉවත්කර ගැනීමට රජය තීරණය කොට ඇති බවට පැතිර ගිය ප්‍රවෘත්තිය අසත්‍ය ප්‍රවෘත්තියක් බවයි.
ආගමික සිද්ධස්ථානවල ආරක්ෂාව අඩු කරන බවට වැරදි තොරතුරක් සමාජ මාධ්‍ය ඔස්සේ පලවීම ‘හිතකර නැති’ බව මාධ්‍යවේදීන් හමුවේ කර්නල් හේරත් වැඩි දුරටත් සදහන් කර තිබුනි.
ආරක්ෂක අමාතාංශයේ වැඩ බාරගැනීමෙන් අනතුරුව සැප්තැම්බර් 28 වැනි සෙනසුරාදා දළදාව වැඳ ගැනීම සදහා මහනුවර ගිය ආරක්ෂක අමාත්‍යාංශයේ නව ලේකම් එයාර් වයිස් මාර්ෂල් සම්පත් තුයියකොන්තා ද මාධ්‍යවේදීන් හමුවේ පවසා තිබුනේ ජාතික ආරක්ෂාවට තර්ජනයක් වන ‘සාම්ප්‍රදායික නොවන’ තර්ජන ගණනාවක් හඳුනාගෙන ඇති බවයි.
“අපේ රටේ ජාතික ආරක්ෂාවට තර්ජනයක් වන සියළුම වර්ගයේ තර්ජන අපි හදුනාගෙන තියනවා. ඉතින් අපි බලාපොරොත්තු වෙනවා ජනාධිපතිතුමාගේ නායකත්වය යටතේ රටේ මහජනතාව අපහසුතාවයට පත් වෙන සියළුම මාදිලියේ සාම්ප්‍රදායික නොවන තර්ජන තියනවා ගොඩක්. ඒවා සාම්ප්‍රදායික නොවන තර්ජන. ඉතා ඉක්මනින්ම සමනයකට පත් කරන්න. අපේ රටේ ත්‍රිවිධ හමුදාවේ තියන හැකියාවන් වර්ධනය කරමින් ඒ ගොල්ලන්ගේ කැපවීම මත ඒ කාර්ය ඉටු කරන්න තමයි අපි, අපේ රජයේ බලාපොරොත්තුව.”
පලාලි – අච්චුවේලි ප්‍රධාන මාර්ගය
පලාලි – අච්චුවේලි ප්‍රධාන මාර්ගය දශක තුනකට පසු විවෘත කිරීමට ජනාධිපති අනුර කුමාර දිසානායකගේ උපදෙස් පරිදි කටයුතු කර තිබෙන බව ජනාධිපති මාධ්‍ය ඒකකය නිවේදනය කර තිබුනත් එය මුළුමනින්ම විවෘත කර නැති බව ජනාධිපති යටතේ පවතින ආරක්ෂක අමාත්‍යාංශය ප්‍රකාශ කර ඇත.
පවතින ආරක්ෂක තත්ත්වය පිළිබඳ සොයා බලා අදාළ කටයුතු සිදු කරන ලෙස ජනාධිපති අනුර කුමාර දිසානායක ආරක්ෂක අංශවලට දැනුම් දුන් අතර ආරක්ෂක අමාත්‍යාංශයේ හා ආරක්ෂක ලේකම්වරයාගේ මැදිහත්වීමෙන් මෙම මාර්ගය විවෘත කිරිමට පියවර ගත් බව ජනාධිපති මාධ්‍ය නිවේදනයේ වැඩි දුරටත් සදහන්ව තිබුනි.
ඒ සම්බන්ධයෙන්ද නොවැම්බර් 3 වැනි දින ආරක්ෂක අමාත්‍යංශ පරිශ්‍රයේ පැවැති මාධ්‍ය සාකච්ජාවේදී මාධ්‍යවේදියෙකු කළ ප්‍රශ්න කිරීම් හමුවේ යුද්ධ හමුදා ජනමාධ්‍ය හා මනෝවිද්‍යාත්මක මෙහෙයුම් අධ්‍යක්‍ෂ ජනරාල්, මේජර් ජෙනරාල් රසික කුමාර සදහන් කළේ දීර්ඝ කාලයක් හමුදාව විසින් වසාගෙන සිටි උතුරේ පලාලි – අච්චුවේලි මාර්ගයේ කොටසක් විවෘත කරන ලද්දේ අධි ආරක්ෂක කලාපයේ කිසිදු වෙනසක් සිදු කිරීමෙන් තොරව බවයි.
‘අධිආරක්ෂිත කලාපය හරහා යන පාරක්….. මේ පාර විවෘත කරාට අධි ආරක්ෂිත කලාපය අඩු කරේ නැහැ. පාර දෙපැත්තෙන් කාටවත් පාරෙන් පිටට යන්න බැහැ. ඒ මාර්ගය විතරයි පාවිච්චි කරන්න පුළුවන්. ’
Facebook Comments
