පිළිකා ඖෂධ ශ්‍රී ලංකාවේ නිපදවීමට කම්හලක්

පයාගල මලේගොඩ ප්‍රදේශයේ නැනෝ තාක්ෂණය ඔස්සේ පිළිකා නාශක ඖෂධ නිෂ්පාදනය කිරීමේ කර්මාන්ත ශාලාවක් ඉදිකිරිම සදහා මුල්ගල් තැබීම සෞඛ්‍ය, පෝෂණ හා දේශීය වෛද්‍ය අමාත්‍යවරයා සිදු කල බව එම අමාත්‍යංශය පවසයි.

ඉන්දියාවේ “ස්පෑල්” සමාගම සහ “සෑන්ස් ඇක්ටිව්” පෞද්ගලික සමාගම ඒකාබද්ධව මෙම කර්මාන්ත ශාලාව ඉදිකරනු ලබව බව පවසන සෞඛ්‍ය, පෝෂණ හා දේශීය වෛද්‍ය අමාත්‍යංශය කර්මාන්ත ශාලාව රුපියල් බිලියන 1.4 ක අයෝජනයක් බවද කියා සිටි.

අක්කර 15 ක භූම්භාගයක ඉදිවන මෙම කර්මාන්ත ශාලාවෙන් කලුතර දිස්ත්‍රික්කයේ රැකියා විරහිත තරුණ තරුණියන් 500 කට රැකියා අවස්ථා උදාවනු ඇති බවට එම අමාත්‍යංශය නිවේදනය කරයි.

පිළිකා ඖෂධයක අවම මිල රුපියල් 150,000 ක් පමණ වන නිසා ශ්‍රී ලංකාවට අවශ්‍ය ඖෂධ මෙරටදීම නිෂ්පාදනය කිරීමට තීරණය කළ බව සහ රාජ්‍ය ඖෂධ නිෂ්පාදන නිතිගත සංස්ථාව සමග ඖෂධ නිෂ්පාදනය කිරීම සඳහා සමාගම් 40 ක් ගිවිසුම් අත්සන් කර තිබෙන බව ද අමාත්‍ය රාජිත සේනාරත්න කියා සිටියේය.

ගිවිසුම්වලට අනුව මේ වනවිට මහනුවර, හොරණ යන ප්‍රදේශවල ඖෂධ නිෂ්පාදන කර්මාන්ත ශාලා ඉදිකර නිෂ්පාදන කටයුතු ආරම්භ කර තිබෙන අතර කලුතර වැලිපැන්න ප්‍රදේශයේ ඖෂධ නිෂ්පාදන කර්මාන්ත කලාපයක් ඉදිකරන බවත් එහි ඖෂධ නිෂ්පාදන කර්මාන්ත ශාලා 19 ක් ඉදිවන බව ද ඇමැතිවරයා සඳහන් කළේය.

රාජ්‍ය ඖෂධ නිෂ්පාදන නීතිගත සංස්ථාවේ ද නව කර්මාන්ත ශාලාව ඉදිකිරීමෙන් පසු නිෂ්පාදන ධාරිතාවය බිලියන 4 දක්වා ඉහළ යන බව ඇමැති රාජිත සේනාරත්න වැඩි දුරටත් පෙන්වා දුනි.