මුල්‍ය සම්පත් නැතිව වරාය සමූහ සුසානයේ විමර්ශන ඇණ හිටී

රනිල් වික්‍රමසිංහ ජනාධිපතිවරයාගේ පාලන සමයේ කොළඹ නගරයේ අධි ආරක්ෂිත කලාපයක් තුළින් හමු වු සමූහ මිනී වළේ කැනීම් කටයුතු සඳහා වත්මන් රජය විසින් නිසි පරිදි මූල්‍ය ප්‍රතිපාදන ලබා නොදීම හේතුවෙන් තෙවැනි අදියරේ කැනීම් කටයුතු ඇරඹු සැනින් අතරමග නතර කර දමා තිබේ.

දෙවැනි අදියරේ කැනීම් කටයුතුද මාස හතරකට ආසන්න කාලයක් නවතා දැමීම නිසා ඒ වන විටත් මතු කරගෙන තිබු මිනිස් අස්ථි කොටස් මඩ වතුරින් යටවී ඇති අයුරු තෙවැනි අදියරේ කැනීම් කටයුතු ආරම්භයේ නිරීක්ෂණයට එහි ගිය මාධ්‍යවේදීන්ට දැනගන්නට ලැබී තිබුනි.

පසුගිය ජුලි මාසයේ අගනුවර අධි ආරක්ෂිත කලාපයක් තුල හමුවූ පළමු සමූහ මිනීවලේ දෙවැනි අදියරේ දී අත්හිටුවා තිබු කැනීම් කටයුතු සිව් මසකට පසු තෙවැනි වතාවට යළි අරඹා තිබුනේ 2025 ජනවාරි 27 දිනයි.

ඒ වන විටත් අවම වශයෙන් මිනිස් ඇටසැකිලි තුනක් ගොඩගෙන තිබු කොළඹ වරාය සමුහ මිනී වලට යාබද ප්‍රදේශයේ මතුපිට පස් තට්ටුව ඉවත් කරමින් අලුතින් කනින ලද වලකින් මිනිස් ඇටසැකිලි තුනක් ජනවාරි 30 ක් වැනිදා පාදාගත් අතර ජනවාරි 31 වැනි සිකුරාදා වන විට ඒවා අතුරින් එක් මිනිස් ඇටසැකිල්ලකට වැඩි අස්ථි කොටස් ගොඩ ගෙන තිබුනි.

එදින සිට සමුහ සුසානයේ කැනීම් කටයුතු නතර කර තිබීම සම්බන්ධයෙන්, සමූහ මිනීවළේ කැණීම් කටයුතු භාර පුරාවිද්‍යාව පිළිබඳ ජ්‍යෙෂ්ඨ මහාචාර්ය රාජ් සෝමදේව මාධ්‍යවේදීන් වෙත පවසා ඇත්තේ කැනීම් කටයුතු සඳහා අවශ්‍ය මූල්‍ය ප්‍රතිපාදන ඉදිරි දින කිහිපය තුළදී නොලැබුණුහොත් වළ වසා දැමීමට පවා සිදුවිය හැකි බවයි.

සමූහ සුසානයට නිසි ආරක්ෂාවක් සලසා නොතිබීමත් විමර්ශන පවත්වාගෙන යාමට බාධාවක්ව පවතී.

අව්වෙන්, වැස්සෙන් ආරක්ෂාවීම සඳහා 2025 ජනවාරි 30 වැනි බ්‍රහස්පතින්දා සිට කොළඹ වරාය, සමුහ සුසානයට කූඩාරමකින් සෙවන සපයා ඇති නමුත් එය විධිමත් ආකාරයෙන් සිදු කර නොමැති බව එහි ගිය මාධ්‍යවේදීන්ට දැක ගන්නට ලැබී තිබේ.

2024 ජුලි සිට සැප්තැම්බර් දක්වා

2024 සැප්තැම්බර් 05 වැනි බ්‍රහස්පතින්දා කැනීම් කටයුතු ආරම්භ කළ කොළඹ වරාය සමුහ මිනී වලේ පළමු අදියරේ කැනීම් කටයුතු දින අටක් සිදු කිරීමෙන් පසුව සැප්තැම්බර් 13 වැනිදා සිකුරාදා දහවල් තාවකාලිකව නතර කරන විට අවම වශයෙන් පුද්ගලයන් දෙදෙනකුට අයත් ඇටසැකිලි මතුකරගෙන තිබු අතර තවත් හිස් කබල් හතරක් පමණ වලෙහි තිබෙනු දැකගන්නට ලැබුණි.

දෙවැනි අදියරේ කැනීම් කටයුතු සැප්තැම්බර් 26 වැනි බ්‍රහස්පතින්දා යළි ආරම්භ කොට දෙදිනකින් අත් හිටුවන විට හවස් යාමයේ එහි ගිය මාධ්‍යවේදීන්ට දැන ගන්නට ලැබී ඇත්තේ තවත් මිනිස් අස්ථි කොටස් වල තුළ තිබෙන බවයි.

කොළඹ වරාය දක්වා දිවෙන අලුතින් ඉදිවෙන අධිවේගි මාර්ගයේ ඉදිකිරිම් කටයුතු සඳහා පොළොව හාරමින් සිටියදී 2024 ජුලි මස 13 වැනිදා පළමු වරට මිනිස් අස්ථි කොටස් හමු වී තිබුනේ එම ඉඩමේ පිහිටි පැරණි ලේකම් කාර්යාල පරිශ්‍රයෙනි.

ඒ සම්බන්ධයෙන් අධිකරණයට කරුණු වාර්තා කිරීමෙන් පසුව කොළඹ අලුත්කඩේ අතිරේක මහේස්ත්‍රාත් බණ්ඩාර ඉලංගසිංහගේ නියමයෙන් 2024 සැප්තැම්බර් 05 වැනි බ්‍රහස්පතින්දා එම ස්ථානයේ කැණීම් කටයුතු ආරම්භ කරන ලදී.