ශ්‍රී ලංකාව දැඩි ආර්ථික අර්බුදයකට මුහුණ දී සිටින සමයක රට හැර දමා යෑමට උත්සාහ කළ බවට සැක කෙරෙන ශ්‍රී ලාංකිකයන් පිරිසක් උපන් බිමේම රඳවා ගන්නට ශ්‍රී ලංකා නාවික හමුදාව පියවර ගෙන තිබේ.
ශ්‍රී ලංකා නාවික හමුදාව පවසන්නේ මාරවිල ප්‍රදේශයේ සහ බටහිර මුහුදු ප්‍රදේශයේ ජුනි මස 07 වනදා සිදුකළ විශේෂ සෝදිසි මෙහෙයුමකදී නීති විරෝධී ලෙස මුහුදු මාර්ග ඔස්සේ මෙරටින් විදෙස් රටකට සංක්‍රමණය වීමට උත්සාහ කළ බවට සැකකෙරෙන පුද්ගලයන් අනු එක් දෙනෙකු අත් අඩංගුවට ගත් බවයි.
මාරවිල ප්‍රදේශයේ ළැගුම්හලක රැඳී සිටියදී නාවික හමුදා භාරයට ගත් පුද්ගලයන් අතර පිරිමි පුද්ගලයන් 13 ක්, එක් පිරිමි දරුවෙක් සහ ජාවාරමට සම්බන්ධ ජාවාරම්කරුවකු ඇතුළුව වයස අවුරුදු 09ත් 58ත් අතර වයසේ පසුවන 15 දෙනෙකු මෙන්ම එම ජාවාරමට යොදා ගත් බවට සැකකෙරෙන වෑන් රථයක් සහ මෝටර් රථයක්ද අත්අඩංගුවට ගත් බව නාවික හමුදාව නිවේදනය කරයි.
එදිනම හලාවතට ඔබ්බෙන් වූ මුහුදු ප්‍රදේශයේ සිදුකල මුර සංචාරයකදී බහුදින ධීවර යාත්‍රාවක් මගින් නීති විරෝධී ලෙස මුහුදු මාර්ග ඔස්සේ මෙරටින් විදෙස් රටකට සංක්‍රමණය වීමට උත්සාහ කල බවට සැකකෙරෙන පිරිමි පුද්ගලයන් 58ක්, කාත්තාවන් 05ක්, ළමුන් 07ක් සමඟ ජාවාරමට සම්බන්ධ පුද්ගලයන් 06ක් ඇතුළුව වයස අවුරුදු 01ත් 62ත් අතර වයසේ පසුවන 76දෙනෙකු නාවික හමුදා භාරයට ගැනීමට කටයුතු කර ඇත.
මාරවිල ප්‍රදේශයේ ළැගුම්හලේදී අත් අඩංගුවට ගත් පිරිස යාපනය, ත්‍රිකුණාමලය, මුලතිව් සහ මාරවිල යන ප්‍රදේශයන්හී පදිංචිකරුවන් බවට හඳුනාගෙන ඇති අතර එම පිරිස ඉදිරි විමර්ශන කටයුතු සඳහා මාරවිල පොලීසිය වෙත භාර දීමට කටයුතු කර තිබේ.
හලාවතට ඔබ්බෙන් වූ මුහුදු ප්‍රදේශයේදී අත්අඩංගුවට ගත් පිරිස, මීගමුව, හලාවත, පුත්තලම, කල්පිටිය, මාරවිල, මුලතිව්, කිලිනොච්චිය සහ ත්‍රිකුණාමලය යන ප්‍රදේශයන්හී පදිංචිකරුවන් බව පවසන නාවික හමුදාව එම පිරිස ඉදිරි නීතිමය කටයුතු සඳහා කොළඹ වරාය පොලිසිය වෙත භාර දුන් බව වැඩිදුරටත් පවසයි.
Facebook Comments
