රජයේ වතු සමාගම් යටතේ සේවය කරන වතු කම්කරුවන්ට සේවක අර්ථසාධක අරමුදල සහ සේවක භාරකාර අරමුදල ගෙවීම සඳහා විශේෂ කැබිනට් පත්‍රිකාවක් ළඟදීම ඉදිරිපත් කරන බවට වැවිලි කර්මාන්ත අමාත්‍යවරයා ලංකා කම්කරු කොංග්‍රසයට සහතික වී තිබේ.
අමාත්‍ය රමේෂ් පතිරණ එම සහතිකය ලබා දී ඇත්තේ ලංකා කම්කරු කොංග්‍රසයේ නියෝජිතයන් සහ රාජ්‍ය වැවිලි සමාගම් ප්‍රධානීන් අතර පසුගියදා අමාත්‍යවරයාගේ ප්‍රධානත්වයෙන් පැවැති විශේෂ හමුවකදීය.
ජීවන් තොන්ඩමන් අමාත්‍ය ධුරය දරන ජල සම්පාදන හා වතු යටිතල පහසුකම් සංවර්ධන අමාත්‍යාංශයේ මාධ්‍ය ලේකම් නිකුත් කළ නිවේදනයක දැක්වෙන්නේ 2002 වසරේ සිට රජයේ වතු සමාගම්වල සේවයේ නියුතු වතු කම්කරුවන් බොහෝ දෙනෙකුට සේවක අර්ථසාධක අරමුදල (EPF) සහ සේවක භාරකාර අරමුදල (ETF ) ගෙවා නොමැති බවයි.
ගෙවිය යුතු හිඟ මුදල වෙනුවෙන් එහිදී ඉල්ලීමක් ඉදිරිපත් වී ඇති අතර ඒ පිළිබඳව ජනාධිපතිවරයාගේ අවධානයට යොමු කර විශේෂ කැබිනට් පත්‍රිකාවක් ඉදිරිපත් කර විසඳුමක් ලබා දීමට පියවර ගන්නා බවට අමාත්‍ය රමේෂ් පතිරණ එහිදී සහතික වී තිබේ.
ලංකා කම්කරු කොංග්‍රසයේ වෙනුවෙන් එහි ප්‍රධාන ලේකම් සහ අමාත්‍ය ජීවන් තොණ්ඩමන්, සභාපති සහ පාර්ලිමේන්තු මන්ත්‍රී මරුදපාණ්ඩි රාමේෂ්වරන්, උප සභාපති භාරත් අරුල්සාමි, වෘත්තීය සමිති අංශයේ ජාතික සංවිධායක ලෝකදාස් සහ නිලධාරීන් සහ ඔවුන්ගේ ප්‍රධානීන් ජනතා වතු කම්කරු සංගමය (ජනවසම) සහ අමාත්‍යාංශ ලේකම්වරු ද මෙම රැස්වීමට සහභාගී වී ඇත.
එමෙන්ම වතු කම්කරුවන් සඳහා වන නිවාස ව්‍යාපෘතියට ඉඩම් ලබා ගැනීමටත්, තේ නැවත වගා කිරීමටත් මෙම සාකච්ඡාවේදී එකඟතාවයකට පැමිණි බව ජල සම්පාදන හා වතු යටිතල පහසුකම් සංවර්ධන අමාත්‍යාංශය නිකුත් කළ මාධ්‍ය නිවේදනයේ සදහන්ය.
Facebook Comments
