නිදහස් දිනයේ ජනපතිට විරෝධය පලකළ පිරිසට එරෙහි නඩුව තවත් කල් යයි

දෙමළ ජනයා අයිතිවාසිකම් දිනා ගැනීම් වෙනුවන් සිදුකරන අරගල නීති විරෝධී අත්අඩංගුවට ගැනීම් හරහා යටපත් කළ නොහැකි බව දෙමළ ජාතික ජනතා පෙරමුණ පවසයි.

“මෙවැනි නීතිවිරෝධී අත්අඩංගුවට ගැනීම්වලට බියෙන්, අපගේ අයිතිවාසිකම් අරගලය යටපත් කළ හැකි යැයි රජය හෝ පාලන යාන්ත්‍රණය නොසිතිය යුතුය.”

දෙමළ ජාතික ජනතා පෙරමුණේ ප්‍රකාශක නීතිඥ කනගරත්නම් සුගාෂ් ජුනි 14 වැනිදා ඒ බව සදහන් කළේ රාජ්‍ය නිදහස් දින සමරුවක් වෙනුවෙන් ජනපති යාපනයේ කළ සංචාරයට එරෙහිව විරෝධතා දක්වමින් සිටියදී පොලිස් අත්අඩංගුවට ගෙන ඇප පිට නිදහස්ව සිටින තමන් ඇතුළු 18 දෙනාගේ නඩුව අද විභාගයට ගැනිමෙන් අනතුරුව මාධ්‍ය වෙත අදහස් දක්වමිනි.

“රනිල් වික්‍රමසිංහ ජනාධිපතිතුමාගේ පැමිණීමට එරෙහිව ප්‍රජාතන්ත්‍රවාදීව සටන් කළ ක්‍රියාකාරීන් වන අපට එරෙහිව නීති විරෝධී නඩුවක් පවරා තිබෙනවා,” යැයි පැවසු නීතිඥ කනගරත්නම් සුගාෂ් වැඩි දුරටත් කියා සිටියේ මේ සියලු අත්අඩංගුවට ගැනීම්වලින් ඉස්මතු වන්නේ දෙමළ ජනයාට එරෙහි සිංහල බෞද්ධ ස්වෝත්තමවාදී පීඩනය බවයි.

ජනපති යාපනයේ කළ සංචාරයට එරෙහිව විරෝධතා දක්වමින් සිටියදී පෙබරවාරි 11 වැනි සෙනසුරාදා පොලිස් අත්අඩංගුවට ගත් දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් ඇතුළු පිරිස 2023 පෙබරවාරි 12 වැනිදා අධිකරණය විසින් මුදා හැර තිබුනේ එක් අයෙකුට රුපියල් ලක්ෂ තුන බැගින් වූ ශරීර ඇප මතයි.

ජනාධිපති රනිල් වික්‍රමසිංහට විරෝධය පළ කරමින් යාපනය බස් නැවතුම්පොළ අසළදී විරෝධතාවයක් දියත් කරමින් සිටියදී දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් සමග නීතිඥ කනගරත්නම් සුගාෂ්, එස්. තවපාලසිංහම්,අයි. සත්‍යසීලන්, ටී. සින්තුජන්, ඒ.ටී. තිලීෂන්, ටී. රාජශ්‍රීකාන්ත්, පී.ගුනරත්නම්, ජේ.ජේ. සතීස්, ජේ. රජීව්කාන්ත්, එස්.සුදාකරන්, එස්. පද්මනාදන් (ඩිලාන්), එල්. කෝකිලන්, කේ.ඥානේෂ්වරන්, අජන්තන්, ගෝකුලන්, මදන් සහ සෝදිලිංගම් පොලීසිය විසින් අත්අඩංගුවට ගෙන තිබුනි.

“වර්ග සංහාරක රනිල්-පිටව යනු, ශ්‍රී ලංකා නිදහස් දිනය-දෙමළ ජනතාවගේ කළු දිනයයි” යනුවෙන් ගජේන්ද්‍රන් මන්ත්‍රීවරයා පොලිසියෙන් ඇදගෙන යද්දී විරෝධතාකරුවන් සමග හඬ නගා තිබුනි.

අත්අඩංගුවට ගත් 18 දෙනා නීති විරෝධි උද්ඝෝෂණයක් දියත් කළ බවට පොලීසිය විසින් සිදු කළ චෝදනාව තහවුරු කිරීමට අදල විස්තර වාර්තාවක් අද දිනයේ ඉදිරිපත් කරන ලෙස යාපනය මහේස්ත්‍රාත් විසින් පසුගිය නඩු වාරයේදී නියෝග කර තිබුනත් එම වාර්තාව ඉදිරිපත් කිරීම සදහා පොලීසිය තව දුරටත් කල් ඉල්ලීම නිසා නඩුව 2023 ඔක්තෝබර් 10 දිනට කල් තැබීමට යාපනය මහේස්ත්‍රාත් ඒ.ඒ ආනන්ද රාජා නියෝග කළ බව නීතිඥ සුගාෂ් වැඩි දුරටත් පළාත් බද මාධ්‍යවේදීන් සමග පවසා තිබේ.