ඉන්දීය හමුදා සාමය පැතු පියනමක් මරා දමා තිස් පස් අවුරුද්දක්

තිස් පස් වසරකට පෙර ඉන්දීය සාම සාධක හමුදාව විසින් වෙඩි තබා මරා දැමූ නැගෙනහිර කතෝලික පියතුමකු අනුස්මරණය කර තිබේ.

“කරිටාස් ලංකා“ සංවිධානය සුදානම් කර තිබු මෙම අනුස්මරණ වැඩ සටහන මරා දැමුණු චන්ද්‍රා ප්‍රනාන්දු පියතුමාගේ පිළිරුව මල් දමින් සරසා ඉටිපහන් දල්වා ඔහු විසු පුලියන්තිව් ශාන්ත මරියා දේවස්ථානයේදී ඉකුත් දා පැවැත්විණි.

1987 අගෝස්තුවේදී පැවති වත්මන් ජනාධිපති රනිල් වික්‍රමසිංහ ද ප්‍රබල ඇමැතිධුරයක් හෙබවූ එක්සත් ජාතික පක්‍ෂ ආණ්ඩුවේ ඇරයුමෙන් සාමය ඇති කිරීමට යැයි පවසමින් පැමිණි ඉන්දීය සාම සාධක හමුදාවේ ක්‍රියා නිසා දෙමළ ජනයා තවත් වටයකින් පිඩාවට පත් කෙරිණි.

උතුරු නැගෙනහිර වාඩිලා සිටී රජයේ හමුදා සේනාංක දකුණට කැඳවා තිබුනේ සිංහල තරුණයන්ගේ නැගිටීම මර්දනය කිරීමටයි.

ඉන්දීය සාම සාධක හමුදා පාලනය යටතේද උතුරු හා නැගෙනහිර පළාත් වල පහර දීම්, පැහැර ගැනීම්, අතුරුදහන් කිරීම්, ස්ත්‍රීන්ට එරෙහි ලිංගික බලහත්කාරය හා අපරාධ, මිනිස් ඝාතන හා දේපොළ හානි ඉහළ යාමත් සමග චන්ද්‍ර ප්‍රනාන්දු පියතුමා විසින් පුරවැසි කමිටුව, මානව හිමිකම් සංවිධාන හා ආගමික නායකයන් එකතුව මඩකලපුවේදී දැවැන්ත පෙළපාලියක් සංවිධානය කළේ ඊට එරෙහිවයි.

මෙම සාමකාමී පෙළපාලියට ඉන්දීය සාම සාධක හමුදාව ප්‍රතිචාර දැක්වුයේ කඳුළු ගෑස් සහ වෙඩි උණ්ඩ වලිනි.

එතැන් පටන් චන්ද්‍රා ප්‍රනාන්දු පියතුමා ඉන්දීය හමුදාවේත් ඔවුන්ගේ අන්තේවාසික

තමිල් ඊළාම් ජනතා විමුක්ති සංවිධානය [ PLOTE ] සහ ඊළාම් ජනතා විප්ලවකාරී විමුක්ති පෙරමුණ [ EPRLF ] වැනි සංවිධාන වලත් වෛරයට හා ක්‍රෝධයට ලක්වන්නට විය.

“මම ක්‍රිස්තියානි පුජකයෙක්. දෙවියන් අදහන්නෙක්. මගේ දහම මිනිස්සුන්ගේ ජිවිතයට ආදරය කිරීමයි. කොයි පැත්තෙන් කළත් මම ඝාතනය හෙළා දකිනවා. ඔබ ආවේ සාමය ගෙන්න නම් ඒක මේ විදිහට කරන්න බැහැ. තත්වය තවත් අවුල් වෙනවා විතරයි. කොයි විදිහකින් හෝ ආයුධ සන්නද්ධව සාමය ගේන්න බැහැ. ඔබ කියනවා මට LTTE ඉන්න තැන් කියන්න කියල. ඔබ විසින්ම උදව් කරලා කාලයක් පුරා හදපු ඔවුන්ව සාමය සඳහා ඔබට ගෙන්වා ගන්න බැරි නම්, සාමාන්‍ය ජනයා එක්ක ඉන්න මට ද පුළුවන් ඒක කරන්න,“ යැයි ඉන්දීය සාම සාධක හමුදා ප්‍රධානීන්ගේ ප්‍රශ්න කිරීම් හමුවේ ප්‍රනාන්දු පියතුමා පවසා තිබිණි.

කෙතරම් ජිවිත තර්ජන පැමිණිය ද මඩකලපුවේ ජනතාව සමග රැඳී සිටි පියතුමා 1988 ජුනි 6 වැනිදා සවස පහට පමණ නාදුනන තුවක්කුකරුවෙකුගේ වෙඩි පහරින් මිය ගියේ දේවස්ථානයේ ලැගුම් ගෙයි සිටියදීයි.

මඩකලපුවේ නගරයේ පාලනය ඉන්දීය සාම සාධක හමුදාව යටතේ තිබිය දී ඔවුන්ගේ අනු දැනුමෙන් තොරව මෙම ඝාතනය සිදු නොවන බවට ප්‍රදේශයේ ජනයා අතර විශ්වාසයක් පැවතිණි.

ඉන්දීය හමුදාවේ සහායක සන්නද්ධ කල්ලි වූ EPRLF සහ PLOT කෙරෙහි ද ජනයාගේ සැකය එල්ල වූ අතර පසුව මෙය තම කනිෂ්ඨ නිලධාරියෙකුගේ මැදිහත් වීමෙන් වූ ක්‍රියාවක් යැයි IPKF ඉහල හමුදා නායකයකු පවසා ඇති බවට මාධ්‍ය වාර්තා කර තිබුණි.