වර්තමාන ආණ්ඩුව බලයට පත් වූ පසු රටේ සිදුවන පරිසර හානිය දියුණු තියුණු වී ඇති බවට හෙළිවන තොරතුරු “අසත්‍ය ප්‍රවෘත්ති ප්‍රබන්ධ” ලෙසින් ජනාධිපතිවරයා විසින් බැහැර කෙරෙද්දී, පරිසර විනාශයන්හි වගකීම විෂයභාර අමාත්‍යවරයා විසින් රාජ්‍ය නිලධාරීන් පිට පටවා තිබේ.
මේ වන විට පුත්තලම දිස්ත්‍රික්කයේ ඇතැම් පුද්ගලයන් විසින් වරින් වර සිදු කරනු ලබන පරිසර හානි කිරීම් සම්බන්ධව වාර්තා වන අතර ප්‍රාදේශීය ලේකම් වරුන්, ග්‍රාම නිලධාරින්, ගොවිජන සංවර්ධන නිලධාරින්, පරිසර නිලධාරින්, සංවර්ධන නිලධාරින් ඇතුළු නිලධාරින් විශාල පිරිසක් ප්‍රාදේශීය සේවාවන් හි නිරතව සිටිය දී මෙවැනි පරිසර හානි කිරීම් සිදුවන්නේ එම නිලධාරින්ගේ අකාර්යක්ෂමතාවය හා නොසැළකිල්ල නිසා බවට අමාත්‍ය මහින්ද අමරවීර චෝදනා කරයි.
ඒ අනුව දිවයිනේ සියලුම පරිසර නිලධාරින් කැඳවා ඔවුන් තම රාජකාරිය හා වගකීම නිසි පරිදි ඉටු කරන්නේ ද යන්න පිළිබඳව සොයා බලන්නැයි ඇමැතිවරයා, මධ්‍යම පරිසර අධිකාරියට නියෝග කළ බව රජයේ ප්‍රවෘත්ති දෙපාර්තමේන්තුව නිවේදනය කර තිබේ.
මුන්දලම, විරුත්තෝඩේ, පුලිදිවාල් හි අක්කර දෙකක පමණ භූමියක පිහිටි කඩොලාන පද්ධතිය විනාශ කර තිබෙන අයුරු පසුගියදා මාධ්‍ය විසින් අනාවරණය කර තිබුනි.
ඒ සම්බන්ධයෙන් මධ්‍යම පරිසර අධිකාරිය හා මුන්දලම ප්‍රාදේශීය ලේකම්වරයා ඇතුළු අදාල අංශ වලින් විමසීමක් කළ අමාත්‍යවරයා මුන්දලම පුලිදිවාල් හි කඩොලාන පද්ධතිය විනාශ කළ සැකකරු වහාම අත් අඩංගුවට ගන්නැයි පුත්තලම මුලස්ථාන පොලිස් පරීක්ෂකට දැනුම් දී තිබේ.
“මෙම කඩොලාන පද්ධතිය අයත් ඉඩම කිසියම් තැනැත්තෙකුගේ පුද්ගලික ඉඩමක් වන අතර ඔහු විසින් ඉස්සෝ වගාවට යැයි කියමින් එම පරිසර පද්ධතිය කපා ඉවත් කර ඇති බව අදාළ අංශ විසින් තහවුරු කරනු ලැබීය.” රජයේ ප්‍රවෘත්ති දෙපාර්තමේන්තුව වැඩි දුරටත් නිවේදනය කර තිබේ.
කඩොලාන පද්ධතිය පිහිටා තිබු භුමිය පුද්ගලික ඉඩමක වුවත් කඩොලාන කපා ඉවත් කිරීම නීතිවිරෝධී වන බැවින් එම පුද්ගලයා හෝ පුද්ගල කණ්ඩායමට එරෙහිව නීතිය ක්‍රියාත්මක කරන ලෙස අමාත්‍යවරයා ඉල්ලා තිබේ.
පුත්තලම කඩොලාන විනාශයක් සම්බන්ධයෙන් අමාත්‍ය අමරවීර නිලධාරීන්ට වරද පැටවූවත්, එම විනාශයට වගකිව යුතු බවට චෝදනා ලබන දේශපාලකයන්ට විරුද්ධව නිලධාරීන් නැගී සිටිනු මේ වසර මුලදී දැකගත හැකිවිය.
ඉකුත් පෙබරවාරියේ ප්‍රසිද්ධියට පත්වූ සිද්ධියක් වූයේ මහත් පාරිසරික අගයකින් යුත් රැම්සා තෙත්බිමක් විනාශ කිරීමට ආණ්ඩු පක්ෂයේ දේශපාලකයකු කළ සැලසුම් වලට විරුද්ධව ගම්පහ දිසා වන නිළධාරිනි දේවානි ජයතිලක ප්‍රසිද්ධියේ නැගී සිටීමයි.
වත්මන් රජය බලයට පැමිණීමෙන් පසු සිදුකෙරෙන පරිසර හානිය පිලිබඳව මාධ්‍ය විසින් කරන හෙළිදරව් ජනාධිපති වරයා විසින් පසුගියදා ප්‍රතික්ෂේප කර තිබුනේ “අසත්‍ය ප්‍රවෘත්ති ප්‍රබන්ධ කොට සමාජගත කිරීමේ මෙහෙයුමක්” ලෙස හුවා දක්වමිනි.
කෙසේවෙතත්, වන විනාශය සැබවින්ම සිදුවන්නක් බව පිළිගනිමින් ආරක්ෂක ලේකම් මේජර් ජෙනරාල් කමල් ගුණරත්න පසුගියදා කියා සිටියේ ජනාධිපති සොයුරු චමල් රාජපක්ෂ ආරක්ෂක රාජ්‍ය අමාත්‍යවරයාද සමග එක්ව ඊට විරුද්ධව පියවර ගන්නා බවයි.
බොහෝ තැන්වල පරිසර විනාශයන් සිදුව ඇත්තේ දේශපාලනඥයන්ගේ රැකවරණය සහ අනුදැනුම යටතේ බව විපක්ෂය දිගින් දිගටම කරන චෝදනාවකි.
පරිසර හානිය පිළිබද පුවත් ජනමාධ්‍ය විසින් දිගින් දිගටම වාර්තා කරද්දී, පරිසර හානි පිළිබදව දැනුම් දීම සදහා පරිසර අමාත්‍ය මහින්ද අමරවීර පසුගියදා දුරකථන අංක හතරක් ද හදුන්වා දී තිබුනි.
පරිසර අමාත්‍යාංශයේ 1991, මධ්‍යම පරිසර අධිකාරියේ 1981, භූ විද්‍යා සමීක්ෂණ හා පතල් කාර්යාංශයේ 1921 දුරකථන අංක වලටත්, අමාත්‍යවරයාගේ පුද්ගලික දුරකථනය වන 0707-555666 අංකයට වට්ස්අප් පණවිඩයක්, කෙටි පණිවිඩයක් හෝ විඩියෝ හෝ එවන ලෙසත් පරිසර අමාත්‍යවරයා මහජනතාවගෙන් වැඩි දුරටත් ඉල්ලා තිබේ.
Facebook Comments
