නකල්ස් කඳුකරයෙන් අලුත් සර්පයන් දෙදෙනෙක් හමුවී තිබේ.
ශ්‍රී ලාංකීය උරග හා උභයජීවී විශේෂඥයෙකු වන මෙන්ඩිස් වික්‍රමසිංහ විසින් හඳුනාගෙන ඇති මොවුන් දෙදෙනා ඇස්පිදුරෙයි ඩිසිල්වායි (aspidurai desilvai) සහ රයිනොපිලිස් ගුනසේකරායි (rhinophilis gunasekarai) ලෙස නාමකරණය කර තිබේ.
නිර්විෂ සර්ප විශේෂයක් වන ඇස්පිදුරෙයි ඩිසිල්වායි ලංකාවේ නකල්ස් කඳුකරයේදී පමණක් හමුවන විශේෂයකි.
දිවා කාලයේදී පොළව යට ජීවත් වන මොවුන් ගොම්මනේදී හා රාත්‍රියේදී බහුලව ක්‍රියාකාරී වේ.
ඇස්පිදුරෙයි ඩිසිල්වායි විශේෂයට ඇති සීමිත ව්‍යාප්තිය සහ තර්ජන හේතුවෙන් මොවුන් දැඩි ලෙස තර්ජනයට ලක් වූ ජීවීන් විශේෂයක් ලෙස සළකනු ලැබේ.
අනෙක් වර්ගය වන රයිනොපිලිස් ගුනසේකරායි, නැතිනම් ගුණසේකරගේ මැඩිල්ලා නම්කොට ඇත්තේ රටේ පරිසරය රැකගැනීම වෙනුවෙන් ඉමහත් සේවයක් කළ ශ්‍රී ලංකා රේගුවේ, ජෛව විවිධත්ව ආරක්ෂණ ඒකකයේ නිර්මාතෘ සමන්ත ගුණසේකර නමිනි.
මෙම විශේෂය නකල්ස් කඳුකරය ආශ්‍රිතව රිවර්ස්ටන් කඳු මුදුනට පමණක් සීමා වේ.
රයිනොපිලිස්, නැතිනම් තුඩුල්ලන් වර්ගයට අයත් වන මොවුන් පූර්ණ වශයෙන් පස් යට ජීවත් වන විශේෂයක් ලෙස සැළකේ.
නිර්විෂ සර්ප විශේෂයක් වන මොවුන් බහුලව රාත්‍රී කාලයේදී කොළරොඩු අතර පනුවන් වැනි ආහාර සොයා යාම සිදු කරනු ලබයි.
පාරිසරික වෙනස්කම් වලට ඉතා සංවේදී සත්ව කොට්ඨාශයක් වන මෙම සර්ප විශේෂ, මිනිස් ක්‍රියාකාරකම් හේතුවෙන් විශාල වශයෙන් වඳවී යෑමේ තර්ජනයට ලක්ව ඇති බව මෙන්ඩිස් වික්‍රමසිංහ පෙන්වා දෙයි.
හූනන්, සර්පයන් සහ උභයජීවීන් ඇතුළු නව සත්ව විශේෂ තිහකට අධික සංඛ්‍යාවක් සොයා ගැනීමේ ගෞරවය ඔහුට හිමි වන ඔහු, සියවසක පමණ කාලයක් තිස්සේ වඳවී ගොස් ඇතැයි විශ්වාස කළ ජීවීන් වර්ග කිහිපයක්ම නැවත සොයා ගැනීම සම්බන්ධයෙන් ජාත්‍යන්තර සත්ව විද්‍යා ප්‍රජාව ප්‍රසිද්ධියක් උසුලයි.
ඔහු, යුනෙස්කෝ සංවිධානයේ, ශ්‍රී ලංකාවේ මධ්‍යම කඳුකර ස්වාභාවික ලෝක උරුම ව්‍යාපෘතියේ සහ ජාතික සත්වෝද්‍යානයේ උපදේශකයෙකු ලෙස ද කටයුතු කරයි.
සම්මානලාභී වනජීවී ඡායාරූප ශිල්පියෙකු ද වන මෙන්ඩිස් වික්‍රමසිංහ විසින් 2016 වසරේදී ප්‍රකාශයට පත් කළ, ‘Repertoire – ශ්‍රී ලංකාවේ සොබාදහමට රූපමය දොරටුවක්’ නම් ඔහුගේ පළමු ඡායාරූප ප්‍රකාශනය රාජ්‍ය සාහිත්‍ය සම්මාන දෙකක් දිනා ගත්තේය.
Facebook Comments
