පෙරටුගාමී සමාජවාදී පක්සයේ දෙවැනි ජාතික මහ සමුළුවට පසු දිනම කුමාර් ගුණරත්නම්ට ශ්‍රී ලංකාවේ පුරවැසිභාවය ලබාදෙන බව ආගමන විගමන දෙපාර්තමේන්තුව විසින් ප‍්‍රකාශයට පත්කර තිබේ.
ඒ අනුව පෙබරවාරි මස 01 දා සිට ක්‍රියාත්මක වන පරිදි ශ්‍රී ලංකාවේ පුරවැසිභාවය ඔහුට හිමි වන බවට සදහන් ලිපිය මේ වන විට කුමාර් ගුණරත්නම්ට ලැබී ඇති බව එම පක්‍ෂය සඳහන් කරයි.
කුමාර් ගුණරත්නම්ට මෙරට පුරවැසිභාවය ලබාදීමට ආණ්ඩුව කැමති බවට වන සහතිකය ඉදිරියේදී ඕස්ට්‍රේලියානු රජයට ඉදිරිපත් කිරීමට නියමිත බව පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ සිලෝන් ජර්නල්ස් හා පැවසීය.
ආගමන විගමන නීති උල්ලංඝණය කිරීමේ චෝදනා යටතේ කුමාර් ගුණරත්නම් වසරක සිර දඬුවමකටද ලක් කර තිබුණි.
කුමාර් ගුණරත්නම්ට ඔස්ට්‍රේලියාවේ පුරවැසිභාවයද හිමි අතර මාස තුනක් ඇතුළත එය ඉවත්කර ගන්නා ලෙසද ආගමන විගමන දෙපාර්තමේන්තුව දැනුම් දී ඇත.
පක්ෂයෙන් තනතුරක්
මේ අතර ඊයේ (01) පැවති පෙරටුගාමී සමාජවාදී පක්ෂයේ දෙවැනි ජාතික මහ සමුළුවේදී පක්ෂයේ සංවිධායක ලේකම් ලෙස කුමාර් ගුණරත්නම් පත් කර තිබේ.
මීට පෙර කුමාර් ගුණරත්නම් හට එම පක්ෂයේ නිල තනතුරක් නොතිබු අතර ඔහු පක්ෂයේ දේශපාලන මණ්ඩල සභිකයෙක් ලෙස කටයුතු කළේය.
Facebook Comments
