රට නොබෙදෙන අයුරින් සංහිඳියාව ශක්තිමත් කර බලය බෙදීම සඳහා රජය කැපවී සිටින අතර ඒ පිළිබඳ මූලික කටයුතු ඉදිරි මාස කිහිපය තුළ අවසන් කිරීමට බලාපොරොත්තුවන බව ජනාධිපති මෛත්‍රීපාල සිරිසේන පවසනවා.
සියලු ජනතාව එක් කර ගනිමින් එකම රටක් ලෙස රට ඉදිරියට ගෙනයාම තම රජයේ අරමුණ බව ජනාධිපතිවරයා ප්රකාශ කර සිටියේ ඊයේ (01) මඩකලපුව කලවංචිකුඩි මූලික රෝහලේ නව බාහිර ප‍්‍රතිකාර ඒකකය සහ වාට්ටු සංකීර්ණය ජනතා අයිතියට පත් කිරීමේ උත්සවයේදීය.
රට තුළ තහවුරු වී ඇති ප‍්‍රජාතන්ත‍්‍රවාදය සහ නිදහස උපයෝගී කර ගනිමින් රජයට කොපමණ විවේචන එල්ල කළ ද එම විවේචන ශක්තියක් කර ගනිමින් රට ගොඩනැගීමේ වගකීම නිසි ලෙස ඉටු කිරීමට යහපාලන රජය කැපවී සිටින බවයි ජනාපති මෛත්‍රීපාල සිරිසේන අවධාරණය කරන්නේ.
ඉදිරි වසර තුන තුළ නැගෙනහිර පළාතේ සියලු සංවර්ධන අඩු පාඩු සම්පූර්ණ විය යුතු බව මෙහිදී සඳහන් කළ ජනාධිපතිතුමා එම සංවර්ධන කටයුතු වෙනුවෙන් පසුගිය කාලයට වඩා ප‍්‍රමුඛත්වයක් ලබා දී කටයුතු කරන බව ද ප්රකාශ කළේය.
ශ්‍රී ලංකා රජයේ සහ ජයිකා ආයතනයේ මූල්‍ය දායකත්වයෙන් රුපියල් මිලියන 514 ක වියදමින් ඉදිකර ඇති කලවංචිකුඩි මූලික රෝහලේ බාහිර ප‍්‍රතිකාර ඒකකය සහ වාට්ටු සංකීර්ණය සහිත නව දෙමහල් ගොඩනැඟිල්ල ජනතා අයිතියට පවරා දුන් ජනාධිපතිතුමා එහි නිරීක්ෂණ චාරිකාවක ද නිරත විය.
Facebook Comments
