රජයේ ආරක්ෂක අංශ විසින් සිදු කළ සමුහ ඝාතනයක් සිහිපත් කරමින් මරා දැමුවන් වෙනුවෙන් පහන් දැල්වීම ගැන පොලීසිය ප්‍රශ්න කර තිබේ.
අවුරුදු 31 කට ඉහතදී මරා දැමුවන්ගේ සමරුව මඩකළපුව සත්තුරුකොණ්ඩාන් මංසන්ධියේදී ඉකුත් සැප්තැම්බර් 9 වැනිදා පැවත්විණි.
ඊට එක්ව සිටී මඩකළපුව මහ නගර සභාවේ තුරෙසිංහම් මදන් මන්ත්‍රීවරයා සහ දයාලකුමාර් ගෞරි මන්ත්‍රීවරිය ඉකුත් තුන්වැනිදා මඩකළපුව මුලස්ථාන පොලීසිය මගින් ප්‍රශ්න කොට තිබේ.
නාගරික මන්ත්‍රී තුරෙයිසිංහම් මදන් පවසන්නේ පොලිස්පතිගේ නියෝගයක් අනුව මෙම විමර්ශනය සිදු කර ඇති බවයි.
සතුරුකොණ්ඩාන් මංසන්දියේ ඉදිකර ඇති ස්මාරකය අසල පහන් දල්වා මරා දැමුණු 184 දෙනා සමරනු ලැබීම වාර්ෂිකව පවත්වන්නකි.
“1990 වසරේ සැප්තැම්බර් 9 වැනිදා සතුරුකොණ්ඩාන්, පන්චෙයිඅඩි, කොක්කුවිල්, සහ පිල්ලෙයාර් අඩි ගම් හතරේ හිටපු මිනිස්සුන්ට රැස්වීමක් තියෙනවා කියලා සතුරුකොණ්ඩාන් පොලිසියට එක්කාසු කරන් ගිහින් මරා දැම්මා. මම නම් හිතන්නේ නැහැ මේ මරා දාපු මිනිස්සු සමරපු එක වැරැද්දක් කියලා, අපි ඒක කළේ කියලා තියෙන සෞඛ්‍ය රෙගුලාසි අනුව,“ යැයි මඩකළපුව මහ නගර සභා මන්ත්‍රීනී දයාලකුමාර් ගෞරි පවසන්නීය.
“මට නාමයෝජනා ලැබුනේ ශ්‍රී ලංකා නිදහස් පක්ෂයෙන්. ඒත් මාව තෝරා පත් කරගත්තේ මේ පළාතේ ජනතාව. ඒ ජනතාවට වැදගත් අවස්ථාවලට මම සම්බන්ධ වෙන එක වරදක් නෙවෙයි. මේ ශෝකජනක කතා අහමින් තමයි මම හැදුනේ වැඩුනේ.”
නාගරික මන්ත්‍රී තුරෙයිසිංහම් සඳහන් කළේ සත්තුරුකොණ්ඩාන් සමුහ මනුෂ්‍ය ඝාතනය ගැන සියලු තොරතුරු හා සාක්ෂි සහිතව ඉදිරිපත් කර ඇති මුත් මේ දක්වා කිසිදු පරික්ෂණයක් පවත්වා නොමැති බවයි.
රණසිංහ ප්‍රේමදාස පාලන සාමය තුල සිදුවූ මෙම සමූහ ඝාතනය ගැන චන්ද්‍රිකා කුමාරතුංග ආණ්ඩු කාලයේ පත් කරන ලද විශ්‍රාමික විනිසුරු ක්‍රිෂ්ණපිල්ලේ පාලකිඩ්නර්ගේ ප්‍රධානත්වයෙන් යුත් කොමිසමකින් හඳුනාගෙන ඇති පරිදි සමූහ ඝාතනය සම්බන්ධයෙන් වගකිව යුත්තේ සත්තුරුකොන්ඩාන් බෝයිස් ටවුන් කඳවුරේ නිලධාරීන්ය.
“මේ ගැන කිසිම දෙයක් කරන්නේ නැතුව, පහන් පත්තු කරපු එක ගැන ප්‍රශ්න කරනවා,“ යි පොලිසියට චෝදනා කරන තුරෙසිංහම් මන්ත්‍රීවරයා කියා සිටියේ මෙවැනි දේ වලින් රටේ පවතින නීතිය ගැන ගැටළුවක් මතු වන බවය.
Facebook Comments
