සංවිධානාත්මක අපරාධ කොට්ඨාශය විසින් අත්අඩංගුවට ගත් බොදු බල සේනා සංවිධානයේ නායක ගලගොඩඅත්තේ ඥානසාර හිමි ඇප මත මුදා හැරීමට අධිකරණය තීරණය කර තිබේ.
පොලිස් නිලධාරීන්ගේ රාජකාරියට බාධා කර ඔවුන්ට පරුෂ වචනයෙන් බැන වැදුණු බවට ඥානසාර හිමිට චෝදනා එල්ල වී තිබු අතර ඒ සම්බන්ධයෙන් එහිමියන් අත්අඩංගුවට ගැනීමට පොලිසිය අසමත් විය.
සංවිධානාත්මක අපරාධ කොට්ඨාශයට 21 බදාදා පැමිණි ඥානසාර හිමිගෙන් ප්‍රකාශයක් ලබා ගැනීමෙන් අනතුරුව අත්අඩංගුවට ගත් අතර පසුව පොලිසිය විරුද්ධ නොවීම මත බොදු බල සේනා නායක හිමිට ඇප ලැබී ඇත.
ඥානසාර හිමිට ඇප ලබා දීමට විරුද්ධ නොවීම සම්බන්ධව මහේස්ත්‍රාත් බුද්ධික ශ්‍රී රාගල සංවිධානාත්මක අපරාධ කොට්ඨාශයේ නියෝජ්‍ය පොලිස්පති කමල් ද සිල්වා ගෙන් ප්‍රශ්න කල අතර සිද්ධිය සම්බන්ධයෙන් පරීක්ෂණ නිම කර ඇති බැවින් ඇප ලබාදීමට පොලීසියේ විරුද්ධත්වයක් නොමැති බව නියෝජ්‍ය පොලිස්පතිවරයා පවසා තිබේ.
සාමාන්‍ය සැකකරුවන් සම්බන්ධයෙන් පොලීසිය මේ ආකාරයෙන් කටයුතු නොකරන්නේ මන්දැයි විනිසුරුවරයා ප්‍රශ්න කර ඇති අතර සාමාන්‍ය සැකකරුවන්ටද, ඉදිරියේදී ඒ ආකාරයෙන් ක්‍රියා කිරීමට උත්සාහ ගන්නා බවයි සංවිධානාත්මක අපරාධ කොට්ඨාශයේ නියෝජ්‍ය පොලිස්පති කමල් ද සිල්වා වැඩිදුරටත් පවසා ඇත්තේ.
පොලීසිය අද පත්ව ඇති තත්ත්වය සම්බන්ධයෙන් තමන් කනගාටු වන බව පවසා සිටි අතිරේක මහේස්ත්‍රාත් බුද්ධික ශ්‍රී රාගල ඉදිරිපත්වූ කරුණු සලකා බලා ඥානසාර හිමියන්ට රුපියල් ලක්ෂයක පුද්ගලික ඇප සහ රුපියල් ලක්ෂය බැඟින් වූ ශරීර ඇප දෙකක් මත නිදහස් කරලීමට නියම කළේය.
මේ අතර පූජ්‍ය වටරැක විජිත හිමියන්ගේ මාධ්‍ය හමුවකට කඩා වැදී බාධා කිරීම හා කුරානයට අපහාස කිරීම සම්බන්ධව විභාග වන නඩුවකට පෙනී නොසිටීම හේතුවෙන් ඉකුත් 15 දා අධිකරණය විසින් ඥානසාර හිමිට වරෙන්තු නිකුත් කර තිබු අතර එම නඩුවටද අද දින නීතීඥයින් මාර්ගයෙන් අධිකරණයේ පෙනී සිටීමෙන් අනතුරුව උන්වහන්සේට ඇප නියම විය.
එහිදී නීතීඥයින් පෙන්වා දී ඇත්තේ තම සේවා දායකයට ජීවිත තර්ජන පැවතීම හේතුවෙන් ඉකුත් 15දා අධිකරණය හමුවේ පෙනී සිටීමට නොහැකි වූ බවයි.
ඉදිරිපත් වු කරුණු සැලකිල්ලට ගත් කොටුව මහේස්ත්‍රාත් ලංකා ජයරත්න විසින් උන්වහන්සේ පූර්ව ඇප මත නිදහස් කරලීමටත්, නඩුව අගෝස්තු 9 වන දින කැඳවීමටත් නියෝග කළේය.
Facebook Comments
