මාධ්යවේදී ලසන්ත වික්රමතුංග ඝාතන නඩුවේ සාක්කි වසං කළ හමුදා-පොලිස් චූදිතයන් නිදහස් කිරීමට උපදෙස් දුන් නීතිපතිට එරෙහිව නීතිපති කාර්යාලය ඉදිරිපිට විරෝධතා දියත් වෙද්දී, උතුරේ දෙමළ මාධ්යවේදීන්ට එල්ල වී ඇති තර්ජන පිළිබඳව යුද්ධයෙන් විනාශයට පත් වන්නි දිස්ත්රික්කයේ දෙමළ මන්ත්රීවරයකු ප්රශ්න කර තිබේ.
දෙමළ මාධ්යවේදීන්ට එල්ල වන තර්ජන පිළිබඳව පාර්ලිමේන්තුවේදී ප්රශ්න කළ වන්නි දිස්ත්රික් ඉලංකෙයි තමිල් අරසු කච්චි මන්ත්රී (ITAK) තුරෙයිරාසා රවිහරන්, උතුරේ මාධ්යවේදීන්ට මෑත කාලයේදී මුහුණ දීමට සිදු වූ තර්ජන සහ පහරදීමට තැත් කිරීම් පිළිබඳ උදාහරණ ගෙනහැර දක්වමින් කියා සිටියේ යුද්ධය අවසන් වූ පසුවත් ඔවුන්ට එරෙහි ප්රහාර සහ බිය ගැන්වීම් දිගටම සිදුවෙමින් පවතින බවයි.
පොලිසිය, බුද්ධි අංශ නිලධාරීන්, හමුදාව සහ නීතිවිරෝධී ක්රියාවලට සම්බන්ධ විවිධ පුද්ගලයන්ගෙන් තමන්ට තර්ජන එල්ල වන තත්වයක් පවතින බවට මාධ්යවේදීන් පවසන බව ඔහු සඳහන් කළේය.
මෙහිදී ITAK මන්ත්රීවරයා විසින් දෙමළ මාධ්යවේදීන්ට එරෙහි අඛණ්ඩ ප්රහාර පිළිබඳ උදාහරණ කිහිපයක් ගෙනහැර දක්වන ලදී.
“2024 දෙසැම්බර් 26 බ්රහස්පතින්දා, කිලිනොච්චිය A-9 අධිවේගී මාර්ගයේ දී නිදහස් මාධ්යවේදියකු සහ කිලිනොච්චි මාධ්ය සමාජයේ ලේකම් වන මුරුගයියා තමිල්සෙල්වන් පැහැරගෙන යාමට වාහනයකින් පැමිණි පිරිසක් උත්සාහ කළා. එම උත්සාහය අසාර්ථක වෙච්ච නිසා ඔහුට බරපතළ විදියට තර්ජනය කරල ගිහිං”.
තුරෙයිරාසා රවිහරන් මන්ත්රීවරයා පාර්ලිමේන්තුවේ දී ඉල්ලා සිටියේ මාධ්යවේදියාට සාධාරණය ඉටු කරනවාට අමතරව, චූදිතයන්ට ද දැඩි දඬුවම් ලබාදිය යුතු බවයි.
දූෂණ ප්රශ්න මතු කරන මාධ්යවේදීන් ඉලක්ක කර ගනිමින් ගනු ලබන ක්රියාමාර්ග ද ඔහු පාර්ලිමේන්තුවේ හෙළි කළ අතර, දෙමළ මාධ්යවේදියකුගේ නිවසට නාඳුනන පුද්ගලයන් පැමිණ තර්ජනය කළ ආකාරය උදාහරණයක් ලෙස පෙන්වා දුන්නේය.
“දූෂණ සම්බන්ධයෙන් පුවතක් පළ කළ කිලිනොච්චියේ මාධ්යවේදී සුබ්රමනියම් බාස්කරන්ට ඒ දූෂණයට සම්බන්ධ පිරිසක් තර්ජනය කළා. ඔහුගේ නිවසටත් පහර දුන්නා.”
ජනවාරි මාසය මාධ්යවේදීන්ට භීෂණකාරී වී ඇති ආකාරය පෙන්වා දුන් ඔහු, ඔවුන්ට එරෙහි අපරාධ බොහොමයක් සිදුවූයේ එම මාසයේ බවත්, සෑම වසරකම ජනවාරි 31 වැනිදා මාධ්යවේදීන් විසින් ‘කළු දිනයක්’ ලෙස සලකන බවත්, එය මේ වසරේ ද සමරනු ලැබූ බවත් ඔහු සඳහන් කළේය.
“මාධ්යවේදීන්ට, ජනවාරිය තවමත් කළු යි.”
දූෂිතයන් හෙළිදරව් කිරීමට කටයුතු කළ මාධ්යවේදීන් සම්බන්ධයෙන් තවත් උදාහරණයක් සඳහන් කළ රවිහරන් විසින්, දෙමළ මාධ්යවේදීන් දෙදෙනෙකු අපරාධකරුවන්ගේ ඉලක්ක බවට පත් වූ ආකාරය පෙන්වා දෙන ලදී.
“මුලතිව් දිස්ත්රික්කයේ අනවසරයෙන් ගස් කැපීම් හෙළිදරව් වුනාම, ඒ ගැන ප්රවෘත්ති එකතු කරන්න ගිය මාධ්යවේදීන් වන කනපතිපිල්ලෛ කුමනන් සහ ෂන්මුගම් තවසීලන් යන අයට හොර ලී ජාවාරම්කරුවන් පහර දුන්නා.”
නාඳුනන පුද්ගලයන් පිරිසක් මුලතිව් මාධ්ය සමාජ කාර්යාලයට අනවසරයෙන් ඇතුළු වී එහි ක්රියාකාරකම් පිළිබඳව ප්රශ්න කර ඇති බව ඔහු පාර්ලිමේන්තුවේදී සඳහන් කළේය. මාධ්යවේදීන්ට මෙවැනි තර්ජන සහ බිය ගැන්වීම් එක් ස්ථානයකට හෝ පුද්ගලයෙකුට සීමා වූවක් නොවන බවද ඔහු වැඩිදුරටත් පැවසීය.
“මුලතිව් කුරුන්තූර්මලෙයි ප්රදේශයේ ප්රවෘත්ති සාකච්ඡාවකට ගිය මාධ්යවේදී විජයරත්නම් සරවනන්ට පොලිසිය පහර දීල බිය ගන්වල තිබ්බා. මේ වගේ සිද්දි ඕන තරම් තියෙනවා. වවුනියාවෙත් මන්නාරමෙත් එහෙම දේවල් වෙලා තියෙනවා.”
කෙසේ වෙතත්, රටේ බලයට පත් වූ නව රජය කෙරෙහි ඔවුන් විශ්වාසය තැබූ බවද ඔහු සඳහන් කළේය.
මේ අතර සන්ඩේ ලීඩර් පුවත්පතේ නිර්මාතෘ ලසන්ත වික්රමතුංග ඝාතනයේ සැකකරුවන් තිදෙනකු නිදහස් කිරීමට තීරණය කළ නීතිපතිවරයාට ඉල්ලා අස්වන ලෙස බල කරමින් තරුණ මාධ්යවේදීන්ගේ සංගමයේ සංවිධානත්වයෙන් පසුගියදා කොළඹදී කැඳවා තිබූ විරෝධතාවයකට මාධ්යවේදීන්, නීතිඥයන් සහ ක්රියාකාරීන් සිය ගණනක් එක්ව සිටියහ.
දෙමළ මාධ්යවේදීන්ට එල්ල වූ ප්රහාර සහ තර්ජන සම්බන්ධයෙන් කඩිනම් සහ අපක්ෂපාතී පරීක්ෂණයක් පවත්වන ලෙස නිව්යෝර්ක් නගරය මුලස්ථාන කොට ගත් මාධ්යවේදීන් සුරැකීම සඳහා වන කමිටුව (CPJ) මේ වසරේ ජනවාරි 9 වැනිදා රජයෙන් ඉල්ලා තිබුණි. ප්රකාශයක් නිකුත් කරමින්, CPJ වැඩසටහන් අධ්යක්ෂ කාලෝස් මාර්ටිනස් ඩි ල සේර්නා (Carlos Martinez de la Serna), එවැනි හිරිහැර අවසන් කළ යුතු බව පැවසීය.
“දෙමළ මාධ්යවේදීන්ට හිරිහැර කිරීම් සහ පහරදීම් සම්බන්ධයෙන් දීර්ඝ කාලයක් තිස්සේ පවතින දණ්ඩමුක්තිය දැන් තේරී පත්ව සිටින ශ්රී ලංකා රජය විසින් අවසන් කළ යුතුයි”.
දේශසීමා නොමැති මාධ්යවේදියෝ (Reporters Without Borders) මාධ්ය නිරීක්ෂකයන් විසින් නිකුත් කරන ලද මාධ්ය නිදහස පිළිබඳ ගෝලීය දර්ශකයේ ශ්රී ලංකාව දුර්වල මට්ටමක ශ්රේණිගත කර තිබේ. 2024 සඳහා වන එම ලැයිස්තුවේ, රටවල් 180 ක් අතුරින් ශ්රී ලංකාව 150 වැනි ස්ථානයට පත්ව ඇති අතර, එය පෙර වසරේ (2023) සිටි 135 ස්ථානයට වඩා පහත වැටීමකි.
ශ්රී ලංකාව මාධ්ය නිදහස සම්බන්ධ ලකුණු 100 න් ලබාගෙන ඇත්තේ 35.21 කි.
Facebook Comments
