පුද්ගලයන් පිරිසක් අතුරුදහන් කිරීම සම්බන්ධයෙන් සැක කෙරෙන නාවික හමුදා නිලධාරියකුට උසාවියෙන් වසං වී සිටීමට ශ්‍රී ලංකාවේ සේවයේ නියුතු ඉහලම ආරක්ෂක සෙන්පතියා සහාය දුන් බවට අපරාධ පරික්ෂණ දෙපාර්තමේන්තුව අධිකරණයට දැනුම් දී තිබේ.
රාජපක්ෂ පාලන සමයේ කොළඹ සහ ඒ අවටින් පැහැරගනු ලැබූ 11 දෙනකු නාවික හමුදා කඳවුරු වල රඳවා ගෙන වධහිංසා කොට අතුරුදහන් කිරීම සම්බන්ධයෙන් අවශ්‍යව සිටි ලුතිනන් කොමදෝරු චන්දන ප්‍රසාද් හෙට්ටිආරච්චි අත්අඩංගුවට ගැනීමට නොහැකි අන්දමින් නාවික හමුදා මූලස්ථානයේ රැඳී සිටීමට ආරක්ෂක මාණ්ඩලික ප්‍රධානී අද්මිරාල් රවින්ද්‍ර විජේගුණරත්න අනුබල දුන් බවට සාක්ෂි ඇතැයි රහස් පොලිසිය අධිකරණයට කරනු දක්වා ඇත.
දෑවුරුද්දකට වැඩි කාලයක් යුක්තිය මගහැර සිටි වරෙන්තුකරුවකු වන සැකකරු අගෝස්තු 14 දා කොළඹදී අත් අඩංගුවට ගැනීමට පෙර රහසිගතව විදේශගත කිරීම සඳහාද හිටපු නාවික හමුදාපති වශයෙන් සිටි අද්මිරාල් වරයා ආධාර කළ බවට රහස් පොලිසිය පසුගිය වසරේ කොළඹ කොටුව මහේස්ත්‍රාත්වරියට වාර්තා කර තිබුණි.
ප්‍රසාත් හෙට්ටිආරච්චි නාවික හමුදා මූලස්ථානයේ සිටියදි ඔහුගේ බිරිඳ හා තවත් ඥාති කාන්තාවක් අවස්ථා කිහිපයක් ඔහු රැඳී සිටි ස්ථානයට ගොස් හමුවි ඇති බව සහ අත්අඩංගුවට ගැනීමේ සූදානමක් ඇති බැවින් එලියට නොබසින ලෙස අද්මිරාල් රවීන්ද්‍ර විජේගුණරත්න නියෝග කළ බවට අපරාධ පරික්ෂණ දෙපාර්තමේන්තුවට ලුතිනන් කොමදෝරු ලබා දුන් ප්‍රකාශයෙන් හෙළිව තිබේ.
ලුතිනන් කොමදෝරු චන්දන ප්‍රසාද් හෙට්ටිආරච්චි හට විදේශ ගතවීමට නාවික හමුදා බොදු අරමුදලින් රුපියල් ලක්ෂ 5ක් ලබා දීම සම්බන්ධයෙන් පරික්ෂණ පවත්වන බව ද අපරාධ පරීක්ෂණ දෙපාර්තුමේන්තුව 03 බදාදා අධිකරණයට කියා සිටියේය.
Facebook Comments
