කැබිනට් සංශෝධනය සිදු වී දවසක් යාමටත් මත්තෙන් නව කැබිනට් සංශෝධනය පිළිබඳව සිව්ල් සංවිධානයක් සිය විරෝධය පල කරනවා.
ජනාධිපතිවරයා විසින් පත් කරන ලද නව කැබිනෙට්ටුව රට විකුණන මෙන්ම හිටපු ජනපති මහින්ද රාජපක්ෂ ඇතුළු ඒකාබද්ධ විපක්ෂය ශක්තිමත් කරන කැබිනට් සංශෝධනයක් බවටයි කැෆේ සංවිධානය චෝදනා කරන්නේ.
මෛත්‍රීපාල සිරිසේන ජනාධිපති කරවීමට එක් වු බලවේග අවුල් සහගත වන ආකාරයට කැබිනට් සංශෝධනය සිදු කර ඇති බවටයි කැෆේ සංවිධානයේ විධායක අධ්‍යක්ෂක කීර්ති තෙන්නකෝන් නිවේදනයක් නිකුත් කරමින් පවසන්නේ.
හම්බන්තොට හා කොළඹ නව ජැටිය විකුණන්නට විශාලම බාධකය වු අර්ජුන රණතුංග අමාත්‍යවරයා ඉවත් කිරීමෙන් ආණ්ඩුව රට විකිණිමේ ඉඩකඩ පුළුල් කරගෙන ඇති බවට ඔහු සිය නිවේදනය මඟින් චෝදනා කරනවා.
සම්පුර්ණ නිවේදනය
ඇමති සංශෝධනය – ලැයිස්තුව හැදුවේ 2020 ජනාධිපති ද?
නිදහසින් පසු ලංකාවේ රාජ්‍ය නායකයින් කැබිනට් මණ්ඩල සංශෝධනය කළේ තම බලය පුළුල් කර ගන්නටය. මෛත්‍රීපාල සිරිසේන මහතා ඉදා මෙදා තුර ලංකාවේ පහළ වූ ‘වෙනස්’ නායකයෙකි. ඔහුට තමන්ගේ කැබිනට් මණ්ඩලය සංශෝධනය කොට ගෙන ඇත්තේ ද ‘වෙනස්’ ආකාරයකටය. කොටින්ම කියනවානම් නම් තමන්ගේ දේශපාලනික පරම සතුරා ශක්තිමත්වන ලෙස සහ තමන් බලයට පත් කළ සියළු බලවේගයන්ට දෙකොන පටලැවෙන ආකාරටය.
ඇවන්ගාඩ් ඇමති තිලක් මාරපන එකම අලුත් සාමාජිකයා ය. (ඇවන්ගාඩ් නීතිඥයා ය. ගෝඨාභය ගේ මිතුරාය. මහින්ද රාජපක්ෂ මහතා ගේ නීතිඥයාගේ සහෝදරයා ය)
රනිල් මෛත්‍රී කැබිනෙට්ටුවේ තමන්ගේ අමාත්‍යාංශය දක්ෂම ලෙස හැසිරවූ පුද්ගලයා අවිවාදයෙන්ම මංගල සමරවීර ය. විදේශ සම්බන්ධතා කේෂ්ත්‍රයේ ලංකාව ලැබූ ජයග්‍රහණ බොහෝමයක් පමණක් නොව ඔහු තමන්ගේ විෂය කේෂ්ත්‍රය ඉක්මවා ගොස් තවත් බොහෝ දේ කළේය. බැදුම්කර හා අනෙක් අර්බුදය දක්ෂ විදේශ අමාත්‍යවරයෙකු අහිමි කොට ඇත. මංගල දක්ෂ මාධ්‍ය අමාත්‍යවරයෙකුට අවශ්‍ය සියළු ගුණාංග ඇති බව සත්‍යයකි. නමුත්, මේ තියෙන වේදිකාව තුල මංගලට වැඩක් කරන්නට හැකි වන්නේ නම් ඔහු විශ්ම කර්මයෙකුම විය යුතුය.
හම්බන්තොට විකුණන්නට, කොළඹ අලුත් ජැටිය විකුණන්නට ලොකුම භාධකය වූයේ අර්ජුන ය. දැන් මලික් කැබිනට් සංශෝධනය පිහිටෙන් ඒ කරදරයෙන් මිදී ඇත. විකුණන්නට පහසුය.
ඉදිරි අවුරුදු දෙකට පාර්ලිමේන්තු ප්‍රතිසංස්කරන සිදු නොවන නිසා ගයන්ත කරුණාතිලකට ඉඩමක් කොටාගෙන සිටිය හැකිය.
කැබිනට් සංශෝධනයෙන් සතුටට පත් වන එක් අයෙකු විය හැක්කේ පාලිත රංගේ බණ්ඩාර ය. චන්දිම ඇමතිතුමා සමග අඩුම ගානේ ඔහුට එක රැස්වීමේ එක ලග වාඩිවී සිටින්නට හෝ හැකියාව ලැබෙනු ඇත.
ජනපති මෛත්‍රී වේවා, අගමැති රනිල් වේවා මේ පත් කොට ඇත්තේ ‘මහින්ද – ගෝ්ඨාභය’ යුවලගේ කැබිනට්ටුව නොවේ ද? ඔවුන්ගේ ලොකුම අඩුව තිලක් මාරපනට නැවත ඇමතිකම ලැබී ඇත. අවුලෙන් අවුලට ගිය අධිකරණ, ස්වදේශ, එලෙසම පවතිනු ඇත. වංචා දුෂණ විමර්ශන සම්පුර්ණයෙන්ම නැවතී ඇත. එපමණක් නොව රත්නපුරේ ජෝන් සෙනවිරත්න මහතා ට අතහැර දමන දවසට සිරස් තලය තවත් දිගු වන්නට නව පට්ටමක් ලැබී ඇත.
නිදහසින් පසු ලංකාවේ ජනතාව කැබිනට් සංශෝධනයක් ඉල්ලා සිටියා නම් ඒ පහුගිය වසර එක හමාර තුල පමණී. ඒ වෙන කුමකටවත් නොව ජනවාරි 8 පොරොන්දු ඉටු කිරීමට සහ රටේ ආර්ථිකය හැඩගස්සවා ගන්නටය. අඩුම ගානේ රට තුට්ටු දෙකට විකුණාගෙන කෑම නවත්වන්නටය. සිදුව ඇත්තේ කුමක්ද?
‘සංවර්ධන පැවරුම්’ නව අමාත්‍යංශය තුලින් සිදු කළ හැකි එකම දේ රට විකුණාගෙන කෑමේ ව්‍යාපෘතිය පමණී.
අනෙක් අතට, එජාපයේ බර අදින ඇතුන් කිසිවෙකුට හෝ අලුතෙන් කිසිවක් හමු නොවන බව පැහැදිලි ය. හරීන්, අජිත් පී.පෙරේරා, රංග බණ්ඩාර, සුජීව, හර්ෂ, බුද්ධික අවශ්‍ය වන්නේ ඡන්ද කාලයට පමණී. රවී සමරවීර, රංජිත් අලුවිහාරේ ලා අවශ්‍ය වන්නේ එජාප ශෝ කේස් එක ලස්සන කරන්නට පමන ද?
එජාප – ශ්‍රීලනිප නායකයින් ඉතිහාසය පුරාම තම බලය රැකගන්නට සිදු කළ කැබිනට් සංශෝධන නිසාම තම දේශපාලන ප්‍රතිවාදීන් නිර්මාණය කොට ගෙන ඇත.
කැබිනට් සංශෝධන කළේ ‘මම නොවෙයි රනිල් යැයි’ හෙට මෛත්‍රී කිව්වොත් ඒ ගැනත් පුදුම විය යුතු නැත. මට නම් හිතෙන්නේ මේ 2020 ආණ්ඩුවේ කැබිනට් එක හදන උත්තමයාගේ ලිස්ට් එකකට අද ඇමති තනතුරු 9 ක් වෙනස් වූ බව පමණී.
කීර්ති තෙන්නකෝන්
Facebook Comments
