උපාධි අපේක්ෂකයන්ගේ අයිතිවාසිකම් වෙනුවෙන් පෙනී සිටීම සඳහා යාපනය විශ්වවිද්‍යාලයේ ශිෂ්‍ය සංගමයක් පිහිටුවා ගැනීමේ අයිතිය වෙනුවෙන් සරසවි ගේට්ටු වසා දමමින් ගෙනගිය දිනක සටනින් යාපනයේ සරසවි සිසුන් ජයගෙන තිබේ.
ශිෂ්‍ය සංගම් නිලවරණය පැවැත්වීමට හාරමාසයක් තිස්සේ බලධාරීන් දිගින් දිගටම අවහිර කිරීමට එරෙහිව යාපනයේ සරසවි සිසුහු අද දවසේ විරෝධතාවක නිරත වී සිටියහ.
ඔවුන් හමුවට පස්වරුවේ පැමිණි උප කුලපති මහාචාර්ය සිවකොලුන්දු සත්කුනරාජා හෙට පෙරවරු 9ත් සවස 4ත් අතර නිලවරණය පැවැත්වීමට පොරොන්දු වීමෙන් අනතුරුව සිසුන් විරෝධය නවතා ගේට්ටු විවෘත කළ බව උතුරේ මාධ්‍යවේදීහු පවසති.
යාපනය සරසවියට ඇතුළු වන ප්‍රධාන ගේට්ටුවට යකඩ දම්වැල් යොදා වසා දමමින් පෙබරවාරි 17 වැනි බ්‍රහස්පතින්දා උද්ඝෝෂණයේ යෙදුන සිසුන් පාලනාධිකාරියට බලකර ඇත්තේ වහාම මහා ශිෂ්‍ය සංගමයට නිලධාරීන් පත්කරගැනීමට ඉඩ දෙන ලෙසයි.
සාකච්ජා මාර්ගයෙන් විසදුම් ලබාදීමට යාපනය විශ්වවිද්‍යාලයේ උපකුලපතිවරයා එකගත්වය පළ කළද ඊට සිසුන් කැමැත්ත පළ කර නොමැති බව කොළඹින් පළ කෙරෙන ප්‍රධාන ධාරාවේ සිංහල ජනමාධ්‍ය වාර්තා කර ඇතත් විරෝධතාවයේ නිරත වූ සිසුන් පවසන්නේ මහාශිෂ්‍ය සංගමයේ නිලවරනය පවත්වන ලෙස මාස හතරක් තිස්සේ ඉල්ලීම් සිදු කළද විශ්වවිද්‍යාල පාලනාධිකාරිය මේතාක් එයට ඉඩ ලබා දී නොමැති බවයි.
විශ්ව විද්‍යාලයට පිවිසෙන ප්‍රධාන ගෙට්ටුවට අගුල් දමා විරෝධතාවය දියත් කිරීම නිසා අධ්‍යාපනික කටයුතු සඳහා පැමිණි සිසුන් විශාල පිරිසකට හා ආචාර්යවරුන්ට විශ්වවිද්‍යාල භූමියෙන් එපිට රැදී සිටීමට සිදුවූ බව පළාත් බද වාර්තාකරුවෝ පවසති.
සිසුන්ගේ විරෝධය හේතුවෙන් යාපනය විශ්වවිද්‍යාලය ඉදිරිපිට මාර්ගයේ රථ වාහන ගමනාගමනයට බාධා එල්ල වු බව යාපනයේ වාර්තාකරුවෝ වැඩි දුරටත් පවසති.
Facebook Comments
