නිදහස් සමරුව මැද මරාදැමූ නැගෙනහිර තරුණ පිරිසක් සැමරේ

පොලිසිය හා ග්‍රාමාරක්ෂකයන් එක්ව මරා දමන ලද තම්පලකාමම් පාසල් සිසුන් හා ගොවීන් වෙනුවෙන් ඔවුන්ගේ ඥාතීන්ගේ හා හිතවතුන්ගේ සහභාගිත්වයෙන් අනුස්මරණයක් පවත්වා තිබේ. 27 වැනි වරට පැවති මෙම සමරුවේදී මියගියවුවන් වෙනුවෙන් ඉදිකර ඇති ස්මාරකය ඉදිරිපිට ඔවුන්ගේ සමීපතමයෝ තෙල් පහන් දල්වා, මල් දම් පලඳවා උපහාර දැක්වුහ.

ත්‍රිකුණාමල දිස්ත්‍රිකයේ පිහිටි තම්පලකාමම් ප්‍රාදේශීය ලේකම් කොට්ඨාසයේ පුදිකුඩිඉරිප්පු හා පොට්කර්නි ගම්මානවලට 1998 පෙබරවාරි 01 වැනිදා අලුයම කඩා වැදුණු පොලිස් හා ග්‍රාමාරක්ෂක භටයන් විසින් දෙමළ පාසල් සිසුන් තිදෙනකු ඇතුළු ගොවීන් පස් දෙනකු වෙඩි තබා මරා දැම්මේ තවත් ගම්වැසියන් 17 දෙනකුට පහරදී තුවාල සිදූ කරමින්ය.

මානව හිමිකම් සඳහා වූ සරසවි ඇදුරන්ගේ සංගමයේ වාර්තාවන්ට අනුව පුදිකුඩිඉරිප්පු හා පොට්කර්නි ගම්මාන ආසන්නයේ වූ මුරපොළ තුනක මත්පැන් බීගත් පොලිස් භටයන් විසින් ජනවාරි 31 රාත්‍රිය පුරාම කෑකෝ ගසමින්, අහසට වෙඩි තබමින් ගත කර ඇත. පසුදා උදෑසන පියවි සිහියට එළැඹි ඔවුන් සිය වැරදි වසන් කර ගැනීමට රාත්‍රියේ දී කොටි සංවිධානයේ ප්‍රහාරයක් එල්ලවූ බවට පවසා, ඒ ආසන්නයේ වූ සිංහපුර හා ජයපුර ගම්මානවල ග්‍රාමාරක්ෂකයන්ගෙන් සහාය ඉල්ලා ඇත්තේ ප්‍රදේශය සෝදිසි කිරීමට අවශ්‍ය බව පවසමිනි.

ජනාධිපති ප්‍රේමදාස හා විමුක්ති කොටින් අතර පැවති සාම සාකච්ජා බිඳ වැටීමෙන් අනතුරුව 1990 ජුනි මාසයේදී මේ සිංහල ගම්මාන දෙක පිහිටුවන ලද්දේ එවකට ප්‍රදේශය බාර හමුදා ප්‍රධානියා වූ බ්‍රිගේඩියර් ලකී විජේරත්නගේ මැදිහත් වීමෙනි.

පුදිකුඩිඉරිප්පු හා පොට්කර්නි ගම්වැසියන්ගේ නිවෙස් එකින් එකට ගිය පොලිස් හා ග්‍රාමාරක්ෂක භටයන් ඔවුන්ට පහර දෙන්නට වූ අතර එම පහර දීමෙන් 17 දෙනෙක් තුවාල ලැබුහ. අවුරුදු 13, 17 සහ 18 වියේ පසුවූ එකම පවුලේ සහෝදරයන් දෙදෙනකු ඇතුළු සිසුන් තිදෙනකු සහ තවත් ගොවි තරුණයන් පස් දෙනකු භාරතිපුරම් පොලිසියට රැගෙන ගොස් වෙඩි තබා මරා දමන ලදී. මරා දැමුවන් විමුක්ති කොටි සාමාජිකයන් බවට පුවතක් නිර්මාණය කරන්නට ද අදාළ ඝාතකයෝ අමතක නොකළහ.

සුරෙන්දිරන් අමිර්තලිංගම් [13], ගජෙන්දිරන් අමිර්තලිංගම් [17], මුරුගේසු ජනගන් [18], ගුණරත්නම් සිවරාජන් [23], සුබ්‍රමානියම් තිවාහරන්[23], නාදන් පවලනාදන්[29], ආරුමුගම් සේකර්[32] සහ පොන්නම්බලම් කනගසබෙයි[32] මරා දමන ලද අට දෙනායි.

පොලිසියේ ප්‍රකාශ ඉවත හළ මානව හිමිකම් හා බහුජන සංවිධාන මැදිහත්ව පොලිස් හා ග්‍රාමාරක්ෂකයන්ට එරෙහිව කන්තලේ මහේස්ත්‍රාත් අධිකරණයේ නඩුවක් ගොනු කෙරිණි.

පසුදින එම ගම්මාන වල නිරීක්ෂණයට ගිය එවකට කන්තලේ ජ්‍යෙෂ්ට පොලිස් අධිකාරි නිහාල් කරුණාරත්න ගම්වැසියන්ට පවසා සිටියේ මෙම සිදුවීම ගැන ස්වාධීන පොලිස් කණ්ඩායම් තුනක් යටතේ පුර්ණ පරීක්ෂණයක් කරන බවයි. මේ සම්බන්ධව නීතිය ක්‍රියාත්මක වන බවට එවකට ත්‍රි’මලය බාර හමුදා ප්‍රධානි බ්‍රිගේඩියර් නිහාල් ජයකොඩි විසින් ද්‍රවිඩ එක්සත් විමුක්ති පෙරමුණේ සභාපති ඇම්. සිවසිත්තම්පලම්ට ප්‍රකාශ කර තිබුනැ’යි මානව හිමිකම් සඳහා සරසවි ඇදුරෝ සංවිධානය වාර්තා කරයි.

බ්‍රිතාන්‍ය අධිරාජ්‍යවාදීන්ගෙන් නිදහස ලබා වසර 50 ක් ගතවීම සමරා කොළඹ අගනගරයේ සමරු සංදර්ශන පැවැත්වෙද්දී, රජයේ පොලිස් හා ග්‍රාමාරක්‍ෂකයින් විසින් මරා දැමුණු නිරායුධ පාසැල් සිසුන් තිදෙනා සහ ගොවි තරුණයන් පස් දෙනා 1998 පෙබරවාරි 04 වැනිදා නෑ හිතවතුන්ගේ සෝ සුසුම් මැද තම්පලකාමම් හිදී මිහිදන් කෙරිණි.

ඝාතනයට මැදිහත්වූ බවට සැකපිට පොලිස් නිලධාරීන් 31 සහ ග්‍රාමාරක්ෂකයන් 10 දෙනකු අත් අඩංගුවට ගැනිණි. ඉන් 21 දෙනකුට චෝදනා ගොනු කෙරුනේ මිනිස් ඝාතනයට හා එසේ කිරීමට නීති විරෝධී අයුරින් රැස්වීම යටතේය. ප්‍රමාණවත් සාක්ෂි නොමැති බැවින් සෙසු 20 දෙනා නඩුවෙන් නිදහස් කිරීමට නීතිපතිවරයා නිර්දේශ කර තිබිණි.

අවසානයේ පොලිස් නිලධාරින් 13 දෙනකුට එරෙහිව ත්‍රිකුණාමලය මහාධිකරණයේ නඩු පැවරීමෙන් අනතුරුව ආරක්ෂාව මද බවට සැකකරුවන් කළ ඉල්ලීම සලකා බලා නඩුව අනුරාධපුර මහාධිකරණය වෙත මාරු කෙරිණි.

අනුරාධපුර මහාධිකරණයෙන් දිගින් දිගටම පැවති නඩු විභාගයන්ගෙන් අනතුරුව චෝදනා 37 ක් ඉදිරිපත් කරමින් පොලිස් නිලධාරින් හත් දෙනකුට එරෙහිව විමර්ශන ඉදිරියට පැවැත්විණි.

භාරතිපුරම් පොලිස් ස්ථානයේ ස්ථානාධිපති පොලිස් පරීක්‍ෂක රණරාජා බණ්ඩාර, උප පොලිස් පරීක්‍ෂක ජී.එල්. සෝමරත්න, පොලිස් සැරයන්වරුන් වන චන්ද්‍රරත්න බණ්ඩාර, කේ.එම්. නිහාල් ප්‍රේමතිලක, ආර්. ආර්. සෝමරත්න බණ්ඩාර මැදිවෙල, චන්ද්‍රරත්න බණ්ඩාර සහ කේ. එම්. මයුරසේන විත්තිකරුවන්ට එරෙහිව තීන්දුව ප්‍රකාශයට පත්වුයේ ඝාතනයට වසර 26 කට පසුවය.

අනුරාධපුර මහාධිකරණ විනිසුරු මනෝජ් තල්ගොඩපිටිය සිය තීන්දුව 2024 අප්‍රියෙල් 26 වැනිදා ලබා දුන්නේ භාරතීපුරම් පොලිසියේ ස්ථානාධිපතිවරයා ඇතුළු විත්තිකාර පොලිස් නිලධාරීන් පස්දෙනකු ඝාතන චෝදනාවන්ට වැරදි කරුවන් කරමින්, බරපතළ වැඩ සහිතව ජීවිතාන්තය දක්වා සිරදඬුවම් නියම කරමින්. විනිසුරුවරයා සිය තීන්දුව ප්‍රකාශයට පත කළ විගස භාරතිපුරම් පොලිස් ස්ථානාධිපති රණරාජා බණ්ඩාර විත්ති කූඩුව මත ඇද වැටුනේ හදිසි හෘදාබාධයක් ඇතිවීමෙනි. ප්‍රතිකාර සඳහා රෝහල් ගත කෙරුනු ඔහු පසුව බන්ධනාගාර ගත කෙරිණි.

චෝදනා ලැබු හත් දෙනා අතර සිටී එවකට භාරතිපුරම් පොලිස්ස්ථානයේ සේවය කළ පොලිස් සැරයන් වරයන් වූ චන්ද්‍රරත්න බණ්ඩාර සහ කේ. එම්. මයුරසේන සියලු චෝදනා වලින් නිදොස් කොට නිදහස් කිරීමට අනුරාධපුර මහේස්ත්‍රාත්වරයා නියෝග කළේය.