සටන්කාමී දෙමළ මාධ්‍යවේදී භාරතීගේ දිවි පුවත නිමා වෙයි

පීඩිත දෙමළ ජනයා නියෝජනය කළ ඉහල පෙලේ ජනමාධ්‍යවේදියකු හා මාධ්‍ය ක්‍රියාධරයකු වූ රාජනායගම් භාරතී සිය දිවි සැරිය නිමා කර තිබේ.

හැට තුන් වියේ පසුවූ ඔහු රෝගාතුරව මාස කිහිපයක් රෝහල් ගතව සිට සිය නිවෙසට පැමිණ දින කිහිපයකින් අනතුරුව අවසන් සුසුම් හෙළුවේ පෙබරවාරි නම වැනිදායි.

හතළිස් වසක මාධ්‍ය ජීවිතයකට හිමිකම් කියන භාරතී මිය යන විට යාපනය “වීරකේසරී“ පුවත් පත් කාර්යාලයේ ප්‍රධානියා ලෙස කටයුතු කළේය .

යාපනේ, තිරුනෙල්වේලි ග්‍රාමයේ කීර්තිමත් ගණිත ගුරුවරයෙකු වූ රාජනායගම් හා සිවයෝගම් යුවලට දාව 1962 සැප්තැම්බර් 06 වැනිදා උපන් භාරතීට, භදීරන් හා සුරාබි නම් සොහොයුරන් දෙදෙනෙකි.

සිය ජනමාධ්‍ය දිවිය අරඹමින් යාපනේ පළවූ `ඊළමුරුසු` පුවත් පතට 1984 වසරේදී එක්වූ ඔහු ඉන් වසරකට පසු `මුරසෝලි` පුවත් පතට එක්විය. 1987 දී යාපනය අත්හැර කොළඹට පැමිණෙන භාරතී `තිනක්කුරල්` පුවත්පතට සම්බන්ධ වී පසුව එහි වෙබ් අඩවියේ මෙන්ම පුවත් පතේද ප්‍රධාන සංස්කාරකවරයා ලෙසින් දිගුකලක් සේවය කළේය.

දෙමළ ජනයාට එරෙහිව ජන සංහාරයක් දියත් කර තිබු සමයක උතුරු නැගෙනහිර පළාත් වලට අමතරව කොළඹ අගනගරයේ ද සාමන්‍ය වැසියන් මෙන්ම මාධ්‍යවේදීන් ද අතුරුදහන් කිරීම්, මරා දැමීම් මැද මාධ්‍ය මර්දනයට එරෙහිව මාධ්‍ය අයිතීන් වෙනුවෙන් සටන් කළ ක්‍රියාධරයෙක් ලෙස භාරතී කැපී පෙනුනි.

පළමු රාජපක්‍ෂ පාලනය ඇරඹෙන 2005 වසරේදී ශ්‍රී ලංකා දෙමළ මාධ්‍යවේදීන්ගේ සංගමයේ සභාපතිධුරයට පත් ඔහු 2008 තෙක් එය හොබවා පසුව ලේකම්වරයා ලෙස කටයුතු කර යළිත් 2015 දී සංගමයේ සභාපති විය.

ශ්‍රී ලංකා දෙමළ මාධ්‍යවේදීන්ගේ සංගමය නිරන්තරයෙන්ම කොළඹ කේන්ද්‍රීය අනෙකුත් මාධ්‍ය සංවිධාන, දෙමළ ජන සංහාරක යුද්ධයට එරෙහි වූ ප්‍රගතිශීලි කණ්ඩායම් සමඟ ද සමීපව ක්‍රියා කළේය.

ඉකුත් යුද සමයේ මරා දැමුණු, අතුරුදහන් කෙරුණු ජනමාධ්‍යවේදීන් හා මාධ්‍ය සේවකයන් අතර බහුතරය දෙමළ ජන ප්‍රජාවට අයත් වුවන්ය. මරා දැමුණු හා අතුරුදහන් කළ ජනමාධ්‍යවේදීන් හා සේවකයන් පිළිබඳව ශ්‍රිලංකාවේ ප්‍රජාතන්ත්‍රවාදය උදෙසා ජනමාධ්‍යවේදියෝ [JDS] ප්‍රකාශයට පත් කොට ඇති වාර්තාව මීට සාක්ෂි දරයි.

නිමලරාජන් මයිල්වාගනම්, ධර්මරත්නම් සිවරාම්, සුබ්‍රමානියම් සුගිර්දරාජන්, අයියාතුරෙයි නඩේසන්, සුබ්‍රමානියම් රාමචන්ද්‍රන්, චන්ද්‍රබෝස් සුදාහර්, සෙල්වරාසා රජීවර්මන්, සහදේවන් නිලක්ෂන්, පරනිරුපසිංහම් දේවකුමාර්, පුණ්‍යමුර්ති සත්‍යමුර්ති, තිරුකුලසිංහම් තවබාලන්, කන්දසාමි අයියර් බාලනඩරාජා, රේලංගි සෙල්වරාජා, ඉසෛවිලි චෙම්පියන්, ඉසෛප්‍රියා ඇතුළු දෙමළ මාධ්‍යකරණයේ නිරතවූවන් රැසක් ඝාතනයට ලක් කෙරිණි.

දෙස් -විදෙස් මාධ්‍ය හා මානව හිමිකම් සංවිධාන කෙතරම් බලපෑම් කළද මරා දැමුණු හා අතුරුදහන් කරනු ලැබූ ජනමාධවේදීන් හා මාධ්‍ය සේවකයන් ගැන විමර්ෂණය කිරීමට මෙතෙක් බලයට පැමිණි කිසිදු ආණ්ඩුවක් උත්සහ දරා නොමැත. වත්මන් ජනපති අනුර කුමාර දිසානායක මැතිවරණයට පෙර පොරොන්දු වුයේ මේ අතරින් ධර්මරත්නම් සිවරාම් මරා දැමීම ගැන විමර්ශනය කරන බවයි. එහෙත් මෙතෙක් ඒ පිලිබඳ පරීක්ෂණ අරඹා නොමැත.

ගෝඨාභය රාජපක්‍ෂ ජනාධිපති කාලය එළඹීමත් සමග සිය බිරිඳ දේවකී හා පුතු ප්‍රදීපන් කැටුව යළි සිය උපන් ගම වූ තිරුනෙල්වේලි, කරා යළි සංක්‍රමණය වූ භාරතී යාපනයේ පලවූ `ඊළනාඩු` පුවත්පතේ ප්‍රධාන සංස්කාරකවරයා වුයේ ඉන් අනතුරුවයි. කෙටි කලකින් ඔහු ඉන් ඉවත්ව `වීරකේසරී` යට එක්විය.

මහජන ගෞරවය සඳහා තිරුනෙල්වේලි, පලාලි පාරේ අංක 105/1 නිවසේ තැන්පත් කර ඇති භාරතිගේ නිසල දේහය 13 වැනි බ්‍රහස්පතින්දා අවසන් කටයුතු සඳහා කොකුවිල් හින්දු සුසාන භූමියට රැගෙන යන බවයි පවුලේ සාමාජිකයන් පවසන්නේ.