නව ආණ්ඩුක්‍රම ව්‍යවස්ථාවක් සකසා කුමන වෙනස්කමක් කළද 13 වැනි ආණ්ඩුක්‍රම ව්‍යවස්ථා සංශෝධනය අනිවාර්යයෙන්ම ඊට ඇතුලත් විය යුතු බවට ආණ්ඩුවේ හවුල් කාර පාර්ශවයක් දැඩිව අවධාරණය කර තිබේ.
“මොන විදිහට ව්‍යවස්ථාව වෙනස් කළත් බලය විමධ්‍යගත කරන විෂයන් සම්පුර්ණයෙන්ම ඇතුලත් විය යුතුයි. 13 අනිවාර්යෙන්ම තියෙන්න ඕනෑ,“යැයි ඊළාම් ජනතා ප්‍රජාතන්ත්‍රවාදී පක්ෂයේ නායක,ධීවර ඇමැති ඩග්ලස් දේවානන්දා පවසයි.
ආණ්ඩු පක්ෂයේ සාමාජිකයන් අතර පැවති හමුවකදී ඇමැති දේවානන්දා මේ ගැන අවධාරණය කරමින් ප්‍රකාශ කර තිබේ.
ආණ්ඩුක්‍රම ව්‍යවස්ථා ප්‍රතිසංස්කරණ කමිටු වාර්තාව මේ වනවිට ජනාධිපතිවරයා වෙත බාර දී තිබේ. ජනාධිපති ලේකම් ගාමිණි සෙනරත් නිවේදනය කර ඇත්තේ අදාළ වාර්තාවේ අන්තර්ගතය ආණ්ඩුව විසින් සලකා බලන බවයි.
ව්‍යවස්ථා වෙනසක් යටතේ විධායක ජනාධිපති ක්‍රමය ද වෙනස් කිරීමට ඉල්ලීමක් පවතින බව පෙන්වා දුන් ඩග්ලස් දේවානන්ද කියා සිටියේ ජනාධිපති ගෝඨාභය රාජපක්‍ෂ ද මෙම අදහසේ සිටින බවකි.
“දෙමළ ජනතාවගේ ජාතික නායක අප්පාපිල්ලෙයි අමිර්තලිංගම්, කඳුකරයේ දෙමළ ජනතාවගේ ජාතික නායක සෞම්‍ය මුර්ති තොණ්ඩමාන්, මුස්ලිම් ජනතාවගේ ජාතික නායක එම්.එච්.එම් අශ්රොෆ් වැනි දිවංගත නායකයන් විධායක ජනාධිපති ක්‍රමය සුළුතර ජනතාවට හොදයි කියලා කිව්වා. ඒත් අද සුළුතර ජනතාව නියෝජනය කරන පක්‍ෂ ඇතුළු අනෙකුත් සියළුම දේශපාලන පක්‍ෂ විධායක ජනාධිපති ක්‍රමය අහෝසි කරන්න කියනවා.“
ඇමැති ඩග්ලස් දේවාන්නදා කියා සිටියේ කිනම් සංශෝධනය ගෙනාවත් 13 වැනි සංශෝධනය දිගටම පවත්වා ගත යුතු බවට EPDP තීන්දු කර ඇති බවයි.
Facebook Comments
