රජයේ සේවකයන් පිරිසකට යුද හමුදාවේ ඉහළ නිලධාරීන් විසින් කළ පහරදීමක් යට ගැසීමේ උත්සාහයක නිරත වන බවට යුද හමුදා බලධාරීන්ට සහ රජයේ අමාත්‍යවරයකුට චෝදනා කරමින් ජනාධිපතිවරයාට පැමිණිල්ලක් යොමු කර තිබේ.
ආරක්ෂක අමාත්‍යවරයාද වන ජනාධිපති ගෝඨාභය රාජපක්ෂ යටතේ වන යුද හමුදාවට එරෙහිව එම පැමිණිල්ල ලිඛිතව ඉදිරිපත් කර ඇත්තේ මුල් පෙලේ පාරිසරික සංවිධානයකි.
“විල්පත්තුව ජාතික වනෝද්‍යානයේ නිලධාරීන්ට පහරදී දේපළ වලට හානි කිරීම සම්බන්ධව සිද්ධිය මේ වනවිට හමුදා මුලස්ථානය විසින් යට ගැසීමට වනජීවී අමාත්‍යාංශයට බලකර ඇති අතර වනජීවි අමාත්‍යවරයා වනජීවි අමාත්‍යංශයට උපදෙස් දී ඇත්තේ මේ සිද්ධිය සම්බන්ධව කිසිදු චෝදනාවක් යුද හමුදාවට එල්ල නොකරීමට සැවොම වග බලාගත යුතු බවයි.”
පරිසර හා සොබාදහම් අධ්‍යයන මධ්‍යස්ථානයේ ජාතික සම්බන්ධීකාරක රවීන්ද්‍ර කාරියවසම් ජුලි 27 සඳුදා ජනාධිපතිවරයා වෙත ලියා ඇති එම ලිපියෙන් කියා ඇත්තේ විල්පත්තු ජාතික උද්‍යානයේ මහවැව සංචාරක බංගලාව වෙන්කොට ගෙන පැමිණ සිටි පුත්තලම හමුදා කඳවුරේ ආරක්ෂක අංශයේ ඉහල නිලධාරීන් පිරිසක් බීමත් ව එහි බංගලා භාරකරුට හා මාර්ගෝපදේශකට පහර දී ඇති බවයි.
එමෙන්ම වනජීවි සංරක්ෂණ දෙපාර්තමේන්තුව සතු රජයේ දේපළ වලට ද දැඩි අලාභ හානි සිදුකොට උද්‍යාන මූලස්ථානය වෙත පැමිණ එහිදී ද කලහකාරී ලෙස හැසිරෙමින් නිලධාරීන් ට පහර දීමට උත්සාහ කොට ඇති බව එම ලිපියේ වැඩි දුරටත් සදහන්ය.
රටක ආරක්ෂක අංශයන් කෙරෙහි සිවිල් ජනතාව විශ්වාසය තබනුයේ එම හමුදාව පොදු ජනයාගේ ආරක්ෂාව තහවුරු කරනු ඇතැයි යන අදහසින් බව සේනාධිනායක ද වන ජනාධිපති ගෝඨාභය රාජපක්ෂට සිහිපත් කර දෙන පරිසරවේදියා සිය ලිපිය මගින් වැඩි දුරටත් අවධාරණය කර ඇත්තේ එහෙත් එම ආරක්ෂක අංශයන්ම සිවිල් ජනතාව තුළ භීතිකාව උපදවන බැවින් ජනතාව ඒ පිළිබදව අවදි විය යුතු බවයි.
පරිසර සංරක්ෂණය උදෙසා දායක වන වනජීවි දෙපාර්තමේන්තුවේ නිළධාරීන්ට පහරදීම සමිබන්ධව විධිමත් පරික්ෂණයක් කරන ලෙස පරිසර හා සොබාදහම් අධ්‍යයන මධ්‍යස්ථානය ජනාධිපතිවරයාගෙන් ඉල්ලා ඇති අතර විනාශ වු දේපළ සදහා යන වියදම් පහරදීමට සම්බන්ධ හමුදා සොල්දාදුවන්ගෙන් ලබා ගන්නා ලෙසත් වැඩිදුරටත් ඉල්ලා තිබේ.
Facebook Comments
