පින්කෙත හෙළ රන් දෙරණේ ළමා අපයෝජන පැමිණිළි ලක්ෂ පහමාරක්

ජාතික ළමා ආරක්‍ෂක අධිකාරියේ 1929 කෙටි දුරකථන ඇමතුම් අංකයට වාර්ෂිකව ළමා අපයෝජන පිළිබඳ පැමිණිලි 550,000 ක් ලැබී ඇති බව අනාවරණය වී තිබේ.

එමෙන්ම 2015 සිට 2019 දක්වා කාලය තුළ ළමා අපයෝජන සම්බන්ධ පැමිණිලි 47,177 ක් ජාතික ළමා ආරක්‍ෂක අධිකාරිය වෙත ලැබී ඇති බවයි ආරක්ෂක අමාත්‍යාංශය පවසන්නේ.

මෙම කම්පා කරවන සුළු තොරතුරු ප්‍රසිද්ධියට පත් කරනු ලැබුවේ දරුවන් කිහිප දෙනකු අපයෝජනය කිරීමේ චෝදනාවට රුපවාහිනී නාලිකාවක එක් පසුතල නිර්මාණ ශිල්පියකු අත් අඩංගුවට ගැනීමත් සමගය.

ජාතික ළමා ආරක්‍ෂක අධිකාරියේ සභාපති මහාචාර්ය මුදිත විදානපතිරණ, ජාතික ළමා ආරක්‍ෂණ අධිකාරියේ නියෝජ්‍ය සභාපති, හිටපු මහාධිකරණ විනිසුරු සුජාතා අලහප්පෙරුම, ජාතික ළමා ආරක්‍ෂක අධිකාරියේ අධ්‍යක්‍ෂක ජෙනරාල් අනෝමා සිරිවර්ධන යන අය විසින් මෙම තොරතුරු අනාවරණය කර ඇත්තේ ආරක්‍ෂක අමාත්‍යාංශය සහ ජාතික ළමා ආරක්‍ෂක අධිකාරිය එක්ව ජුලි 27 සදුදා සංවිධානය කළ රැස්වීමකදී ය.

කැඳවන ලද රැස්වීමේ අරමුණ වූයේ ජනාධිපතිවරයාගේ මැතිවරණ ප්‍රතිපත්ති ප්‍රකාශනයේ “රට හදන සෞභාග්‍යයේ දැක්ම” අනුව පස් අවුරුදු සැලැස්මක් ක්‍රියාත්මක කිරීම සඳහා තාක්‍ෂණික කමිටුවක් පිහිටුවීම බව ආරක්ෂක අමාත්‍යාංශය සදහන් කරයි.

ආරක්‍ෂක, අධ්‍යාපනය, සෞඛ්‍ය, අධිකරණ, සමාජ සුභසාධන, කම්කරු, සංචාරක, ජනමාධ්‍ය යන අමාත්‍යාංශ ඇතුළු පාර්ශවකරුවන් සමග එක්ව කටයුතු කරන ජාතික ක්‍රියාත්මක කිරීමේ කමිටුව, අපේක්‍ෂිත අරමුණු සාක්ෂාත් කරගැනීම සඳහා ළමා ආරක්‍ෂණය පිළිබඳ ජාතික සැලැස්ම ක්‍රියාවට නැංවීම සහ අධීක්‍ෂණය යටතේ බලාත්මක කිරීම හා අධීක්‍ෂණය කිරීම සිදුකරනු ලබන බව එම අමාත්‍යාංශය පෙන්වා දෙයි.

ප්‍රතිපත්ති ක්‍රියාත්මක කිරීමේ අරමුණු යටතේ, ළමා හිතකාමී සුරක්‍ෂිත පරිසරයක් නිර්මාණය කිරීම සඳහා වන අරමුණු තුනක් සාක්ෂාත් කරගැනීම, ඵලදායී හා කාලෝචිත ලෙස නීතිය ක්‍රියාත්මක කිරීම සහතික කිරීම, පොලිසිය හරහා සිදුකරවීම කෙරෙහි ආරක්‍ෂක අමාත්‍යාංශය ප්‍රධාන වශයෙන් අවධානය යොමු කරන බව ආරක්ෂක අමාත්‍යාංශය වැඩි දුරටත් අවධාරණය කර තිබේ.

එම රැස්වීමේදී ආරක්‍ෂක ලේකම් මේජර් ජෙනරාල් (විශ්‍රාමික) කමල් ගුණරත්න වැඩි දුරටත් පවසා ඇත්තේ “සියලු ආකාරයේ අපයෝජනයන්ගෙන් ළමයින් ආරක්‍ෂා විය යුතු අතර ඔවුන් සඳහා වඩා සුරක්‍ෂිත පරිසරයක් නිර්මාණය කිරීම අත්‍යවශ්‍ය වෙනවා,” යනුවෙනි.

පසුගියදා පොලිසිය විසින් ප්‍රකාශයට පත් කර තිබූ 2019 සංඛ්‍යාලේඛන අනුව ශ්‍රී ලංකාවේ සෑම පැය දෙකකට වරක්ම කුඩා දරුවකු අපචාරයට ගොදුරු වන අතර දිනකට අඩුම වශයෙන් ස්ත්‍රී දූෂණ හතරක් සිදුවේ.

දහස් ගණනින් ලැබෙන පැමිණිලි විභාග කර කී දෙනකුට දඬුවම් කළේද යන්න ආරක්‍ෂක අමාත්‍යාංශය හෝ ජාතික ළමා ආරක්‍ෂක අධිකාරිය හෝ ප්‍රසිද්ධියට පත් කර නැත.