දැඩි ආර්ථික අර්බුදයකට මුහුණ දී සිටින රාජපක්‍ෂ ආණ්ඩුව, පසුගිය වසරේ විශ්‍රාම ගිය රාජ්‍ය සේවකයන් දොළොස් දහසකට අධික පිරිසකට විශ්‍රාම පාරිතෝෂික දීමනාව ගෙවා නොමැති බව දිවයිනේ ප්‍රමුඛතම වෘත්තීය සමිති නායකයකු හෙළි කර තිබේ.
“2021.12.31 වැනිදා වෙන කොට විශ්‍රාමිකයෝ දොළොස්දාස් හාරසිය අසු තුනකට කෝටි එක්දාස් තුන්සිය තිස් හතරක් දෙන්න තියනවා පාර්තෝෂිත මුදල් ලෙස ”
විශ්‍රාම වැටුප් දෙපාර්තමේන්තුව විසින් එම මුදල් තවමත් ලබා දී නොමැති බව ලංකා ගුරු සංගමයේ ප්‍රධාන ලේකම් ජෝසප් ස්ටාලින් සදහන් කළේ පෙබරවාරි 17 වැනි බ්‍රහස්පතින්දා කොළඹදී මාධ්‍ය හමුවක් පවත්වමිනි.
ආණ්ඩුව මේ ආකාරයෙන් විශ්‍රාමික පාරිතෝෂික මුදල් ගෙවීම පැහැර හැරීම පමණක් නොව විශ්‍රාම ගිය දින සිට විශ්‍රාම වැටුප ගෙවීමත් නිසි ආකාරයෙන් සිදු කර නොමැති බව වෘතතීය සමිති නායකයා වැඩි දුරටත් සදහන් කළේය.
ජෝසප් ස්ටාලින් ගුරු සංගම් නායකයා සදහන් කරන පරිදි රාජ්‍ය සේවයෙන් විශ්‍රාම ගිය පසු විශ්‍රාමිකයන්ට මාසිකව ලැබෙන විශ්‍රාම වැටුප මෙන් විසි හතර ගුණයක් ,විශ්‍රාම පාරිතෝෂිකය මුදල ලෙස විශ්‍රාම වැටුප් දෙපාර්තමේන්තුව විසින් ගෙවනු ලබයි.
Facebook Comments
