ක්‍රිකට් වල වගකීම අකිල බාර ගනී

0

ශ්‍රී ලංකා ක්‍රිකට් කණ්ඩායම දිගින් දිගටම ලැබූ පරාජයන් සඳහා පාසල් ක්‍රිකට් ක්‍රීඩකයින් නිසි පරිදි සංචිතයකට ඇතුළත් නොවීම ද හේතුවක් වී ඇති බව අධ්‍යාපන අමාත්‍යවරයා පවසයි.

ක්‍රිකට් ක්‍රීඩාව මුහුණ දී ඇති අභාග්‍ය සම්පන්න තත්ත්වය සඳහා පාසල් මට්ටමෙන් ගත යුතු ක්‍රියාමාර්ග පිළිබඳව කරුණු සාකච්ඡා කිරීම සඳහාත්, ඒ සඳහා නිසි වැඩපිළිවෙළක් සකස් කිරීම සඳහාත් අධ්‍යාපන අමාත්‍ය අකිල විරාජ් කාරියවසම් විසින් පාසල් ක්‍රිකට් සංගමයේ නිලධාරීන් හමුවකට එක්වෙමින් මේ බව පැවසීය.

පාසල් ක්‍රිකට් සංගමය නියෝජනය කරන පාසල් කිහිපයක විදුහල්පතිවරුන් සහ නිලධාරීන් රැසක් මෙම සාකච්ඡාව සඳහා සහභාගී වූ අතර පසුගිය කාලයේ පාසල් ක්‍රිකට් ක්‍රීඩකයන් අතුරින් පාසල් සංචිත පත්කිරීමේදී සහ ඔවුන් අතරින් ජාත්‍යන්තර කණ්ඩායම් නියෝජනය කිරීම සඳහා ක්‍රීඩකයින් තෝරා ගැනීමේදී සිදු වූ විවිධ අකටයුතුකම් ක්‍රීඩාවේ ඇඳ වැටීමට හේතු වී ඇති බව පාසල් ක්‍රිකට් සංගමය නිලධාරින් අවධාරණය කර තිබේ.

පාසල් මට්ටමින් දක්ෂ ක්‍රීඩකයන් නිර්මාණය කර දීමේ වගකීම අධ්‍යාපන අමාත්‍යාංශය සතුව ඇති බැවින්, ප්‍රවීණ ක්‍රිකට් ක්‍රීඩකයන්ගේ සහ පුහුණුකරුවන්ගෙන් සමන්විත කමිටුවක් සකස් කොට එහි ද උපදෙස් ලබා ගනිමින් පාසල් ක්‍රිකට් ක්‍රීඩාව නංවාලීම සඳහා විශේෂ වැඩපිළිවෙළක් දියත් කිරීමට තමා නායකත්වය ලබාදෙන බව අමත්‍යවරයා මෙහිදි සඳහන් කර ඇත.

එමෙන්ම පාසල් ක්‍රිකට් ක්‍රීඩකයින් ගෙන් සැදුම්ලත් සංචිතය නම් කිරීමේදී ඒ සඳහා විනිවිද භාවයෙන් යුත් තෝරාගැනීමේ නිර්ණායක සකස් කිරීමේ අවශ්‍යතාවයද අධ්‍යාපන අමාත්‍යවරයා පෙන්වා දී ඇති අතර පාසල් ක්‍රිකට් ක්‍රීඩාව නංවාලීම සඳහා ගතයුතු ක්‍රියාමාර්ග පිළිබඳ විශේෂ වාර්තාවක් ලබාදෙන ලෙසද පාසල් ක්‍රිකට් සංගමයේ නිලධාරීන්ට උපදෙස් ලබා දුන් බව අධ්‍යාපන අමාත්‍යංශය පවසයි.

ඒ අනුව ලබන 12 වැනි ශ්‍රී ලංකාව නියෝජනය කළ දක්ෂ ක්‍රිකට් ක්‍රීඩකයන්ගේ සහ පුහුණුකරුවන්ගේ ද සහභාගීත්වයෙන් අදාළ වාර්තාව පිළිබඳව ද අවධානය යොමු කරමින් විශේෂ රැස්වීමක් අධ්‍යාපන අමාත්‍යාංශයේදී පැවැත්වීමට ද තීරණය කළ බව අධ්‍යාපන අමාත්‍යාංශය වැඩිදුරටත් සඳහන් කරයි.

Facebook Comments

wedding people