හිටපු මහ බැංකු අධිපති අර්ජුන මහේන්ද්‍රන් එම තනතුරට පත්කිරීමේදී ඔහුගේ බෑණනුවන් වන අර්ජුන ඇලෝසියස් පර්පෙචුවල් ට්‍රේෂරිස් සමාගමෙන් ඉවත්විය යුතු බව තමන් අර්ජුන මහේන්ද්‍රන්ට මෙන්ම අර්ජුන අලෝසියස්ට දන්වා තිබුණු බව අගමැති රනිල් වික්‍රමසිංහ පවසනවා.
අර්ජුන ඇලෝසියස් පර්පෙචුවල් ට්‍රේෂරිස් සමාගමෙන් ඉවත්වුවත් එයට සම්බන්ධ සමාගමක් වූ පර්පෙචුවල් හෝල්ඩින්ග්ස් ආයතනයේ කටයුතු කළ බව තමන් දැන නොසිටි බව භාණ්ඩාගාර බැඳුම්කර නිකුත්කිරීම පිළිබඳ පරීක්ෂා කිරීමේ සහ විමර්ශනය කිරීමේ ජනාධිපති විමර්ශන කොමිෂන් සභාව ඉදිරියේ 20 සඳුදා අගමැතිවරයා මේ බව කියා සිටියේය.
කෙසේ වෙතත් ඔහුසතු කොටස් හුවමාරු කිරීම සඳහා යම් කාලයක් ලබාදෙන ලෙස අර්ජුන ඇලෝසියස් ඉල්ලා සිටි බව අගමැතිවරයා කොමිසම හමුවේ සඳහන් කළේය.
අගමැතිවරයාට ඔක්තෝබර් මස 10 වෙනි දින කොමිසම විසින් යවන ලද ප්‍රශ්න 28 ට හා නීතිපති දෙපාර්තමේන්තුව විසින් යවන ලද ප්‍රශ්න 20 ට අදාළව අගමැතිවරයා ලබාදුන් පිළිතුරැ කිහිපයක් සම්බන්ධයෙන් වැඩිදුර කරුණු විමසීම මෙහිදී සිදුවිය.
කොමිසමේ කටයුතු ආරම්භයේදී එහි සභාපති විනිසුරු කේ.ටී චිත්‍රසිරි ප්‍රකාශ කළේ අග්‍රමාත්‍යවරයා ඉදිරිපත් කළ දිවුරුම් ප්‍රකාශ දෙක සම්බන්ධයෙන් කරුණු පැහැදිලි කර ගැනීමට කොමිසම හමුවට පැමිණීම පිළිබඳ ස්තූතිය පළ කරන බවයි.
බැඳුම්කර අලෙවි කිරීමේ සෘජු ක්‍රමවේදයේ විනිවිදභාවයේ පැවැති ගැටළු හේතුවෙන් වෙන්දේසි ක්‍රමය භාවිත කරන ලෙස තමා හිටපු මහ බැංකු අධිපතිවරයාට උපදෙස් ලබා දුන් බව අග්‍රමාත්‍යවරයා කොමිසම හමුවේ ප්‍රකාශ කර තිබේ.
එහිදී පිළිපැදිය යුතු නෛතික රාමුව සහ ක්‍රියාදාමය හිටපු මහ බැංකු අධිපතිවරයා විසින් අනුගමනය කරනු ඇති බවට තමා විශ්වාස කළ බවද අගමැති රනිල් වික්‍රමසිංහ සඳහන් කළේය.
අගමැතිවරයාගෙන් සාක්ෂි විමසීම සඳහා නීතිපති දෙපාර්තමේන්තුව වෙනුවෙන් කටයුතු කළේ නීතිපති ජනාධිපති නීතිඥ ජයන්ත ජයසූරියයි.
මෙරට ඉතිහාසයේ ජනාධිපති විමර්ශන කොමිසමක් ඉදිරියේ පෙනි සිටි පළමු අගමැතිවරයා වන රනිල් වික්‍රමසිංහ කොමිසම විසින් අසනු ලැබූ සියලු ප්‍රශ්නවලට සවිස්තරාත්මකව පිළිතුරු දුන්නේය.
Facebook Comments
