මුස්ලිම් විරෝධි ප්‍රහාර වැලැක්වීම සඳහා ගිංතොට ප්‍රදේශයට ඇඳිරි නීතිය පනවා තිබියදී නිවසකට සහ මුස්ලිම් දේවස්ථාන දෙකකට ප්‍රහාර එල්ල කර තිබේ.
අම්පිටිය පාරේ නිවසකට සහ හිරිඹුර ප්‍රදේශයේ මුස්ලිම් දේවස්ථාන දෙකකට මෙසේ පහර දී ඇති බවයි ප්‍රදේශවාසියෙකු වන එම්.කේ.එම් රස්මි සිලෝන් ජර්නල්ස් වෙත කියා සිටියේ.
මෙම ප්‍රහාර ඇඳිරි නීතිය පනවා ඇති ප්‍රදේශ වල 18 සෙනසුරාදා ඇඳිරි නීතිය පනවා තිබියදී සිදුව ඇති අතර අම්පිටිය පාරේ පිහිටි නිවසට ගිණි තබා ඇත.
මේ අතර හිරිඹුර පුදේශයේ මුස්ලිම් දේවස්ථානයකට යතුරු පැදි වලින් පැමිණි පිරිසක් ගල් ප්‍රහාරයක් එල්ල කර ඇති අතර ගිංතොට කොළඹ පාරේ පිහිටි මීරාන් මොස්තික් දේවස්ථානයට පෙට්‍රල් බෝම්බ ප්‍රහාරයක් එල්ල කර ඇති අතර එම ප්‍රහාර වලින් දේවස්ථාන වලට කිසිඳු හානියක් සිදු ව නොමැති බවද එම්.කේ.එම් රස්මි සිලෝන් ජර්නල්ස් හා කියා සිටියේය.
රිය අනතුරකින් අනතුරුව 17 සිකුරාදා ගැටුම හටගත් බව ප්‍රදේශවාසීන් පවසන අතර පොලිසිය හා විශේෂ කාර්ය බලකාය යොදා ගැටුම පාලනය කරනු ලැබු බව පොලිසිය ප්‍රකාශ කළේය.
එම ගැටුම සම්බන්ධයෙන් මේ වනවිට පුද්ගලයින් 19 දෙනෙකු අත්අඩංගුවට ගෙන රක්ෂිත බන්ධනාගාර ගත කල බව පොලිසිය පවසයි.
මහා මාර්ගයේ විශේෂ කාර්ය බලකාය මුරකාවල් යොදා තිබුනත් අවි ගත් පිරිස් අතුරු මාර්ග ඔස්සේ ගම් වලට කඩා වැඳි බව ප්‍රදේශවාසීන් චෝදනා කරති.
ප්‍රහාරයන්ගෙන් නිවාස 30 සහ රථ වාහන 11 වැඩි ප්‍රමාණයකට හානී සිදුව ඇති බව පැවසු එම්.කේ.එම් රස්මි නිවාස හැර ගොස් සිටින මුස්ලිම් ගම්මාන වල කොල්ලකෑම් සිදුවන බව වැඩි දුරටත් කියා සිටියේය.
Facebook Comments
