ශ්‍රී ලංකාව තුළ නිරන්තරයෙන් වධ බන්ධන සහ ලිංගික හිංසන සිදු වන අතර වැඩිම අඩන්තේට්ටම් ප්‍රමාණයක් සිදු කොට ඇත්තේ අපරාධ පරීක්ෂණ දෙපාර්තුමේන්තුවෙන් බව වධහිංසාවට එරෙහි එක්සත් ජාතීන්ගේ කමිටුව චෝදනා කර ඇත.
අප පුවත මඟින් අනාවරණය කළ පරිදී ශ්‍රී ලංකාවේ රජයට දොස් නඟමින් වධහිංසාවට එරෙහිව ගන්නා පියවර පිලිබඳ තොරතුරු සැපයීම සඳහා රජය විසින් නීතිපති ජයන්ත ජයසුරියගේ ප්‍රධානත්වයෙන් ජිනීවා නුවරට යවන ලද එකොලොස් පුද්ගල නියෝජිත මණ්ඩලයෙන් ලබා දුන් පිළිතුරු සම්බන්ධයෙන් සෑහීමකට පත් නොවන බවද එම කමිටුව පවසා තිබේ.
වධහිංසාවට එරෙහි එක්සත් ජාතීන්ගේ කමිටුව (UNCAT) විසින් පිටු 14 කින් යුත් පස්වැනි වාරික සමාලෝචන වාර්තාව එළී දක්වමින් කමිටුව මේ බව සඳහන් කර ඇත.
එජා විශේෂඥයන්, මානව හිමිකම් සංවිධාන, මාධ්‍යවේදී සංවිධාන පමණක් නොව ශ්‍රී ලංකා රජයද ලබා දුන් ලිඛිත හා වාචික තොරතුරු පදනම් කොටගෙනයි මෙම වාර්තාව සකස් කර ඇත්තේ.
බුද්ධී ප්‍රධානියාට දොස්
බුද්ධී අංශ ප්‍රධානි සිසර මෙන්ඩිස් රජය වෙනුවෙන් මෙම සමුළුවට සහභාගී වු අතර ඔහු රහස් පොලිසියේ හා ත්‍රස්ත විමර්ශණ ඒකකයේ ප්‍රධානියාව සිටි සමයේ සිදුවුවා යැයි කියන ලද වධහිංසා හා ලිංගික හිංසා සම්බන්ධව බුද්ධි ප්‍රධානියාගෙන් පිළිතුරු නොලැබීම සම්බන්ධව කමිටුව සිය අප්‍රසාදය පළ කළේය.
බුද්ධි ප්‍රධානියා හෝ ශ්‍රී ලංකා නියෝජිත කණ්ඩායමේ කිසිවෙක් අසන ලද ප්‍රශ්න වලට වාචිකව හෝ ලිඛිතව නිසි පිළිතුරු ලබා නොදුන් බවට වධහිංසාවට එරෙහි කමිටුව මඟින් දොස් නඟා ඇත.
සිසිර මෙන්ඩිස් හට යොමු කරන ලද ප්‍රශ්න වලට නැවත නිසි පිළිතුරු ලබා දෙන ලෙස වධ හිංසා කමිටුව විසින් ශ්‍රී ලංකා රජයෙන් නැවත ඉල්ලීමක් ද කර තිබේ.
නිර්දේශ
දෙමළ වැසියන්ට එරෙහිව අත් අඩංගුවේ සිදු කරන ලද ලිංගික අපරාධ ඇතුළු වධ හිංසා පිලිබඳ චෝදනා සම්බන්ධයෙන් ද අපක්ෂපාතී ස්වාධීන විමර්ශනයක් වහාම කරන ලෙස රජයට නිර්දේශ කර සිටී.
ත්‍රස්වාදය වැළැක්විමේ පණත යටතේ කෙරෙන පුනරුත්ථාපනයද නතර කරන ලෙසට එම කමිටුව මඟින් රජයට නිර්දේශ කර තිබේ.
පොලිස් නිලධාරින්ගෙන් තොර ස්වාධීන පරීක්ෂණ මණ්ඩලයක් මඟින් පොලිසියට එල්ලවන වධ හිංසා සම්බන්ධව විභාඟ කළ යුතු බවටද නිර්දේශ කර ඇත.
මෙම චෝදනා විභාඟ කිරීම සඳහා ස්වාධින ආයතනයක් පිහිටුවන ලෙසද සමාලෝචන වාර්තාවේ නිර්දේශ මඟින් යෝජනා කර ඇති අතර එය පොලිසියෙන් තොර ආයතනයක විය යුතු බවටද අවධාරණය කර තිබේ.
රජය අසමත්
වධහිංසා කමිටුව මඟින් අසන ලද ප්‍රශ්න සඳහා රජයේ නියෝජිතයින් වාචිකව හෝ ලිඛිතව සෑහීමකට පත් විය හැකි පිළිතුරු ලබා දීමට අසමත් වීම සම්බන්ධව කමිටුව රජයට දොස් නැඟුවේය.
යහපාලන රජය රහසිගත වධකාගාර නොමැති බව පවසා සිටියේද මේ රජය යටතේද එවැනි වධකාගාර ඇති බවට නැගෙන චෝදනා අඩුවක් නැති බවට කමිටුව චෝදනා කළේය.
වධහිංසා කමිටුව 2013 ලබා දුන් බලහත්කාර පාපොච්චාර නැවැත්වීම, නීතියේ රැකවරණ ලබාදීම හා වධහිංසා සම්බන්ධ චෝදනා විභඟ කිරීම යන ආඳී නිර්දේශ ක්‍රීයාත්මක නොකිරීම සම්බන්ධව කම්ටුව සිය කණගාටුව පළ කළ අතර ඒවා ක්‍රීයාත්මක කරන ලෙස ලංකාවට බල කර සිටියේය.
Facebook Comments
