දොලොස් වසරකට අධික කාලයක් තිස්සේ යුද හමුදාව බලහත්කාරයෙන් වාඩි ලා සිටින දෙමළ මාතාවකගේ ඉඩමක අයිතිය යුද හමුදාවට නිලවශයෙන් පවරා ගැනීමට දැරු උත්සාහයක් ජනතා මැදිහත්වීමෙන් පසුබස්වා තිබේ.
පළාත් බද වාර්තාකරුවන් පවසන්නේ යුද හමුදාවේ 52 වැනි සේනාංකයේ මුලස්ථානය ස්ථාපනය කර ඇත්තේ උතුරේ දෙමළ මාතාවකට අයත් මිරුසුවිල්හි, ආසපිල්ලෙයියේට්‍රම්හි පිහිටි අක්කර හතලිහක පෞද්ගලික ඉඩමේ බවයි.
මිනින්දෝරු දෙපාර්තමේන්තුවත් යොදාගෙන යුද හමුදාව එම ඉඩම පවරාගන්නට උත්සාහ ගෙන ඇත්තේ හිමිකාරිය විසින් සිය අයිතිය ඉල්ලා ගොනු කළ නඩුවක් අධිකරණයේ විභාග වෙමින් තිබියදීය.
දෙමළ ජාතික සන්ධානයේ හිටපු පාර්ලිමේන්තු මන්ත්‍රී එම්.කේ සිවාජිලිංගම් මාධ්‍යවේදීන් හා පවසා ඇත්තේ යුද හමුදාව විසින් වසර 12 ට අධික කාලයක් තිස්සේ බලහත්කාරයෙන් අත්පත්කරගෙන සිටින අතර ඉඩමේ හිමිකාරියට එම කාලය තුලදී කිසිදු වන්දියක් හෝ ලබා දී නොමැති බවයි.
දරුවන් පස් දෙනෙකුගේ මවක් වන ඉඩමේ හිමිකාරිය එම ඉඩම යුද හමුදාවට පවරා දීමට සුදානම් නොමැති බවයි ඔහු වැඩි දුරටත් පවසන්නේ.
“මට සල්ලිත් එපා, වෙන මුකුත් එපා මගේ ඉඩම විතරක් මට දෙන්න දෙයියනේ,” යි එම මාතාව විලාප නගන ආකාරය ප්‍රාදේශීය මාධ්‍යවේදීන් විසින් වීඩියෝ ගත කර තිබුණි.
යුද හමුදා 52 සේනාංක මුලස්ථානය ඉදිරිපිටදී අප්‍රේල් 05 සඳුදා ප්‍රදේශවාසීන් සහ දෙමළ ජනතා නියෝජිතයන් විරොධතා දියත් කර තිබුනේ ප්‍රධාන මාර්ගයේ ගමනාගමනයටද බාධා වන අයුරිනි.
මානක කටයුතු සඳහා පැමිනි මිනින්දෝරු දෙපාර්තමේන්තුවේ නිලධාරියකු 52 සේනාංක මුලස්ථානය තුලට ඇතුළු වීම නිසා කෝපයට පත්ව මාර්ගය අවහිර කළ උද්ඝෝෂකයෝ ඔහු එම ස්ථානයෙන් පිටත්වීමත් සමග විරෝධතාවය නවතා දැමීමට කටයුතු කළහ.
ජනාධිපතිවරයා විසින් ප්‍රකාශිත පෞද්ගලික ඉඩම් පවරා නොගැනීමේ ප්‍රතිපත්තියට පටහැනිව යමින් රජයේ ආරක්ෂක අංශ විසින් උතුරේ දෙමළ ජනයාට අයත් භූමි බලහත්කාරයෙන් අත්පත් කරගැනීමට දැරූ තවත් උත්සාහයන් කිහිපයක්ම මේ වසර මුලදී වාර්තා වී තිබුනි.
යාපනයේ, කරෙයිනගර් නීලන්කාඩු ග්‍රම සේවා වසමේ පදිංචි පවුල් 67 ට අයත් ඉඩම් අක්කර 50ක භූමියක් නාවික හමුදා කඳවුරක් ඉදිකිරීම සදහා මැන වෙන් කිරීමට පෙබරවාරි 19 සිකුරාදා මිනින්දෝරු දෙපාර්තමේන්තුවේ නිලධාරීන් පැමිණ තිබුනි.
පැමිණ සිටි මිනින්දෝරු දෙපාර්තමේන්තුවේ නිලධාරීන්ට ප්‍රදේශයේ දේශපාලනඥයන්ගේ සහ ගම් වැසියන්ගේ බලවත් විරෝධය හමුවේ මැනීම් කටයුතු සිදු නොකරම ආපසු හැරී යන්නට සිදුව තිබේ.
දිගින් දිගටම දරන උත්සාහයන්
නාවික හමුදා කඳවුරක් වෙනුවෙන් උතුරේ දෙමළ වැසියන්ගේ ඉඩම් අත්පත්කරගැනීමට දින කීපයක් තිස්සේ දැරූ තවත් උත්සාහයක් ප්‍රදේශවාසී ජනයාගේ අඛණ්ඩ විරෝධය හමුවේ මේ වසර මුලදී වැළකී ගියේය.
මිනින්දෝරු දෙපාර්තමේන්තුවේ නිලධාරීන්, ප්‍රාදේශීය ලේකම් ද කැටුව නාවික හමුදා කදවුරකට වෙන් කිරීම සදහා, මන්ඩතිව් හි පෞද්ගලික ඉඩම් මැන වෙන් කිරීම 2021 ජනවාරි 18 සඳුදා නැවත වතාවක් උත්සාහ ගෙන තිබුනි.
එයට ප්‍රදේශවාසීන්ගෙන් සහ දෙමළ ජනතා නියෝජිතයන්ගෙන් මතු වූ විරෝධය හමුවේ එම නිලධාරීන්ට ආපසු හැරී යාමට සිදු විය.
යාපනයේ, වේලනෙයි ප්‍රදේශිය ලේකම් කොට්ඨාශයේ මන්ඩතීවූ J-7 ග්‍රාම සේවා වසමේ පිහිටි භූමියක් මන්ඩතීවූ නාවික හමුදා කඳවුර තවත් පුළුල් කිරීම වෙනුවෙන් ඉඩම් හිමියන්ගේ අකැමැත්ත නොතකා මැනීම සදහා 2020 වසරේ නොවැම්බර් 10 අගහරුවාදා නාවික හමුදාව, මිනින්දෝරු දෙපාර්තමේන්තුවේ නිලධාරීන් සමග පැමිණ උත්සාහ දැරුවද දේශපාලනඥයන්ගේ සහ ගම් වැසියන්ගේ විරෝධය හමුවේ අසාර්ථක වී තිබුනි.
යාපනයේ, වේලනෙයි ප්‍රදේශිය ලේකම් කොට්ඨාශයේ මන්ඩතීවූ ග්‍රාම සේවා පිහිටි පුද්ගලයන් සිව් දෙනකුට අයත් අක්කර හතරකට ආසන්න ඉඩම් ප්‍රමාණයක් මන්ඩතීවූ නාවික හමුදා කඳවුර තවත් පුළුල් කිරීම වෙනුවෙන් ඉඩම් හිමියන්ගේ අකැමැත්ත නොතකා නිල වශයෙන් පවරා ගැනීමට 2020 වසරේම අගෝස්තු 28 සිකුරාදා නාවික හමුදාව දැරූ වෑයමත් ප්‍රදේශවාසීන් සහ ගම් වැසියන් එක්ව ව්‍යාර්ථ කර තිබුනි.
ආණ්ඩුවේ ‘ප්‍රතිපත්තිය’
ජීවිකාව පවත්වාගෙන යාමට අවශ්‍ය ඉඩම්වලින් කිසිවකු ඉවත් නොකිරීම අලුත් ආණ්ඩුවේ ප්‍රතිපත්තිය බවට ජනාධිපතිවරයා පසුගිය වසරේ අගෝස්තු 20 ප්‍රකාශ කළේය.
ජනාධිපති ගෝඨාභය රාජපක්ෂ පාර්ලිමේන්තුවේ නව සැසි වාරය අමතමින් කියා සිටියේ “නිසි විකල්පයකින් තොරව පරම්පරා ගණනාවක් තිස්සේ තමන් ජීවත් වූ සහ වගා කටයුතු කළ ඉඩම්වලින් කිසිවෙක් ඉවත් කරන්නේ නැහැ,” යනුවෙනි.
කෙසේවෙතත් දෙමළ ජාතික සන්ධානයේ පාර්ලිමේන්තු මන්ත්‍රී සිවඥානම් ශ්‍රීධරන් ප්‍රකාශ කර ඇත්තේ ශ්‍රී ලංකා රජයේ ආරක්ෂක අංශ විසින් බලහත්කාරයෙන් වාඩිලා ගෙන ඉන්නා ඉඩම් අක්කර අටදහසකට වැඩි ප්‍රමාණයක් තවමත් ආපසු පවරා නැති බවයි.
Facebook Comments
